Klei Aê Diê Blŭ: Y-Yôsuê 5:9-12
Êlan kliăng: “Jih jang klei jăk jĭn anei srăng truh kơ diih leh anăn jing dŏ diih tơdah diih gưt asăp Yêhôwa Aê Diê diih” (Klei Mtô Mñă Klei Bhiăn 28:2)
Klei êmuh ksiêm mĭn: Mơ̆ng ya klei Aê Diê bi ruê̆ hĕ klei hêñ phung ƀuôn sang Israel? Ya klei yuôm bhăn Knăm Klei Găn tal êlâo ti Krĭng Lăn Aê Diê ƀuăn? Ya klei bi êdah drei dôk hdĭp gưt asăp Aê Diê ?
Leh jih jang phung êkei Israel tŭ klei khăt klĭt, Aê Diê lač: “Hruê anei kâo bi ruê̆ klei čar Êjip bi hêñ diih” (êlan 9). Hruê êlâo, diñu jing hlŭn Êjip, leh pă pluh thŭn dôk hlăm kdrăn tač kyua amâo gưt asăp Aê Diê, leh anăn hlăm ală mta phung Êjip diñu knŏng jing phung hlŭn tlĕ đuĕ. Ară anei, diñu lă lar amâo lŏ jing hlŭn kơ Êjip ôh. Diñu mâo Aê Diê brei ba hlăm krĭng Lăn Aê Diê Ƀuăn leh anăn srăng jing phung tiŏ suôt phung roh. Kyua gưt asăp tŭ klei khăt klĭt anăn “klei hêñ” diñu dưi “bi ruê̆”, kyua anăn arăng pia anôk anăn jing Gilgal, jing “bi ruê̆”.
Phung ƀuôn sang Israel ngă Knăm Klei Găn pă pluh hruê leh dôk ti Gilgal. Knăm anei mâo Aê Diê mkŏ mjing čiăng bi hdơr kơ klei bi mtlaih phung ƀuôn sang Israel leh Ñu bi kmhal phung anak tal êlâo Êjip, ƀiădah gao hĕ ti sang mâo mmia êrah biăp ti mbah ƀăng bhă. Brei diñu djă pioh knăm anei leh mŭt hlăm krĭng lăn Aê Diê ƀuăn brei leh anăn djă pioh nanao jih klei hdĭp (Klei Kbiă 12:24-27). Ară anei, diñu gưt asăp Aê Diê djă pioh Knăm Klei Găn leh sa wưng sui amâo djă pioh knăm anei kyua klei hdĭp mngăt êdu awăt.
Aê Diê ƀuăn leh srăng brei klei hơêč hmưi kơ phung ƀuôn sang Israel tơdah diñu gưt asăp Aê Diê, thâo răng hlue ngă djăp klei bhiăn Ñu (Klei Mtô Mñă Klei Bhiăn 28). Kyua diñu gưt leh asăp Aê Diê čiăng tŭ klei khăt klĭt leh anăn djă pioh Knăm Klei Găn kyua anăn hruê êdei leh knăm anei, Aê Diê brei kơ diñu ƀơ̆ng mnơ̆ng jăk krĭng anei, sa krĭng “mâo êa ksâo leh anăn êa hnuê êbeh dlai” (Y-Yôsuê 5:6). Hlăm thŭn anăn diñu ăt dưi ƀơ̆ng mnơ̆ng ƀơ̆ng jăk krĭng Kanaan (êlan 12). Klei anăn brei ƀuh Ñu dôk brei krĭng anei kơ digơ̆.
Knăm Klei Găn jing klei găl čiăng dlăng kơ klei leh êgao, hdơr kơ klei bi mtlaih, klei sĭt suôr Aê Diê leh anăn mâo klei mđĭ ai čiăng mđing kơ êdei anăp. Knăm Klei Găn tal êlâo ti Êjip kruăk knăl klei bi mtlaih jing hlŭn čiăng nao phă krĭng Lăn Aê Diê Ƀuăn. Knăm Klei Găn tal êlâo ti lăn Kanaan kruăk knăl klei kbiă mơ̆ng kdrăn tač, mŭt hlăm krĭng Lăn Aê Diê Ƀuăn. Phung ƀuôn sang Aê Diê brei lŏ dơ̆ng gưt asăp čiăng dưi hŏng phung roh leh anăn mâo Aê Diê brei klei hơêč hmưi hlăm ktuê êlan mâo mă krĭng lăn dôk ti anăp.
Jing phung đăo kơ Krist, drei ăt mâo Aê Diê bi mtlaih mơ̆ng klei jing hlŭn kơ klei soh kyua êrah yuôm bhăn Êđai Biăp, jing Khua Yang Yêsu. Klei “hêñ” drei ăt mâo Aê Diê “bi ruê̆”. Drei dôk mâo sa klei mphŭn kčưm hlăm Khua Yang Yêsu, snăn ăt brei lŏ dơ̆ng êbat hlue si klei Yang Mngăt Jăk atăt gai hlăm klei gưt asăp čiăng dưi mâo klei hdĭp tŭ dưi hlăm ktuê êlan phă anăp leh anăn mâo mă klei jăk mơak Aê Diê ƀuăn brei leh.
Drei dôk hdĭp gưt asăp Aê Diê kluôm ênŭm mơ̆?
Wah lač: Ơ Khua Yang, kâo bi mni kơ Ih kyua mă leh jih klei soh, klei hêñ hlăm klei hdĭp kâo kyua kâo tuôm jing hlŭn kơ klei soh. Akâo kơ Ih đru kâo hdĭp gưt asăp Aê Diê, năng hŏng klei mphŭn kčưm mrâo Ih brei leh kơ kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Markôs 7
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
