1 Kauleethaus 7:1-11
Nqe cim:
“Neb ob niamtxiv tsis txhob sib cais chaw pw, yog nej yuav cais, neb yuav tsum sib hais kom haum tso mam li cais hmo puav thiaj muaj sijhawm thov Vajtswv; tiamsis tom qab ntawd neb yuav tsum rov los pw ua ke. Yog neb tsis ua li ntawd nyob tsam neb tswj tsis tau neb lub siab, ces dab Ntxwgnyoog yuav ntxias tau neb ua txhaum” (1 Kauleethaus 7:5)
Lus nug xav:
– Cov ntseeg hauv Kauleethaus tau nug timthawj Paulus txog yam dabtsi?
– Timthawj Paulus teb lolus nug ntawd txhij txhua li cas?
– Peb siv cov lus qhia no li cas rau hauv peb txoj kev txij nkawm?
Tej uas timthawj Paulus teb tsis thooj li cov ntseeg hauv Kauleethaus txojkev xav uas ywjpheej siv yus lub cev ua nkauj ua nraug (hauv cov lus xaus tshooj 6). Ib pab cov ntseeg hauv Kauleethaus nug timthawj Paulus hais tias: Yog kev sib deev phem, ces cov ntseeg puas yuav tsum cais tu nrho kev pw ua niam txiv los ntawm qhov uas nyob ib leeg tsis yuav pojniam yuav txiv lossis yog muaj txij nkawm lawm, puas yuav tsum tsis txhob nyob ua txij nkawm ntxiv lawm?
Timthawj Paulus teb lolus nug no hais tias, raws nws kev xav nyob ib leeg mas zoo kawg nkaus, tiamsis tsis yog rau tagnrho txhua tus neeg (nqe 7). Yog tus uas muaj pojniam muaj txiv lawm tsis tau sib nrauj (nqe 10-11), tseeb tiag “Tus txiv yuav tsum tsis txhob cais nws tus pojniam, thiab tus pojniam los tsis txhob cais nws tus txiv, nkawd ib leeg yuav tsum txaus siab rau ib leeg” (nqe 3). Lolus “tsis txhob cais” qhia meej hauv nqe 4 thiab nqe 5 yog tsis txhob cais kev pw ua niam txiv txij nkawm. Raws li timthawj Paulus, ib feem uas cia kom muaj txij nkawm vim homphiaj yog qaij “kev nkauj kev nraug” (nqe 2). Kev pw ua niam txiv yog Vajtswv tsim pub rau tibneeg hauv txoj kev txij nkawm ua ntej uas tibneeg tsis tau poob kev txhaum. Kev pw ua niam txiv hauv txoj kev txij nkawm yog yam uas zoo thiab dawbhuv. Vajtswv twb pub cai hais txog txoj kev pw ua niamtxiv txij nkawm hauv Vajluskub, yog li ntawd, tsis tsimnyog peb saib txoj kev pw ua niamtxiv hauv txoj kev txij nkawm yog yam phem, yog yam uas yuav tsum cais lossis yuav tsum qaij. Vim li ntawd, niamtxiv txij nkawm “tsis txhob sib cais”, tsuas yog tshwj tej lub sijhawm uas yuav cais los muaj sijhawm thov Vajtswv xwb (nqe 5a). Kev qaij, sib cais kev pw ua niamtxiv txij nkawm ua kev rau dab Ntxwgnyoog ntxias thaum tus txiv lossis tus pojniam tswj tsis tau nws lub cev (nqe 5b). Tseeb tiag, qhov uas “tsis txhob sib cais” no kuj cheem tsum yuav tsum to taub kom mus tagnrho rau ntawm tej uas Vajluskub hais txog niamtxiv yuavtsum sib hlub, sib mloog lus hauv (Efexus 5:21-33).
Ib yam li ntawd tej zaum muaj qee tus ntseeg niaj hnub nim no txoj kev xav kuj zoo li cov ntseeg hauv Kauleethaus txoj kev xav saib kev pw ua niamtxiv hauv kev txij nkawm yog kev phem yog ib yam uas yuav tsum zam kom ntau li ntau tau. Vajlugkub qhia meej hais tias ua nkauj nraug yog thaum ib tug neeg cia nws lub hlwb xav puv npo tej duab sib deev, deev ua ntej sib yuav, deev luag txij nkawm, pojniam deev pojniam, txivneej deev txivneej… Nov yog yam uas phem kawg nkaus ntawm Vajtswv lub qhovmuag saib tuaj. Tiamsis txoj kev txij nkawm yeej yog cai, kev pw ua niamtxiv yog yam uas yuav tsum tsis sib cais tiamsis ob leeg yuav tsum zoo siab hlo thiab sib hlub. Ntawd yog yam uas yuav coj kev zoo siab los rau hauv txoj kev ua txij ua nkawm.
Thov Vajtswv,
Tus Tswv, nyuam yaus ua Koj tsaug rau tej lus qhia meej tseeb hauv lub neej txij nkawm. Thov pab kom nyuam yaus to taub kom yog txojkev pw ua niamtxiv uas Koj pom hais tias yog yam zoo thiab paub saib yam uas Koj ntxub yog yam phem kom khiav deb. Nyuam yaus tuav Tswv Yexus Khetos lub npe thov, Amees.
Puas muaj qhov kev xav yuam kev twg hauv peb kev pw ua niam txiv yuav tsum tau kho?
Nyeem Vajluskub hauv peb lub xyoos: Malakaus 4
Kênh Youtube BHKTHN:
