Chivkeeb 7:1-24
Nqe cim:
“Tus TSWV ua rau ib puas tsav yam uas muaj sia nyob hauv ntiajteb no, neeg, tsiaj thiab noog tuag tu noob nrho. Tsuas tshuav Nau-es thiab cov uas nrog nws mus nyob hauv lub nkoj thiaj seem thiab muaj sia nyob xwb” (Chivkeeb 7:23)
Lus nug xav:
– Piav txog Vajtswv txoj kev rau txim hnyav npaum li cas?
– Leejtwg tau Vajtswv cawm thiab cawm li cas?
– Vim li Vajtswv yuav cawm lawv?
– Peb yuav ua dabtsi pab rau cov neeg ib ncig ntawm yus ua ntej Vajtswv yuav rau txim?
Thaum txoj kev phem kev qias huam puv mus thoob ntiajteb, Vajtswv thiaj tau txiav txim siab rhuav tshem lub ntiajteb no los ntawm tso dej nyab. Dej nyab zaum no tsis yog nyab rau qee thaj chaw xwb, tiamsis yog nyab thoob plaws lub ntiajteb no, thiab nyab tagnrho saum tej npoo av, txawm yog cov roob uas siab tshaj plaws los kuj nyab tagnrho thiab ua rau txhua tsav yam puastsuaj tas (nqe 19-23). Hais tau hais tias nov yog ib txoj kev rau txim uas txaus ntshai heev, tsis muaj leej twg yuav khiav dim tau.
Tiamsis tseem tshuav ib txhia tibneeg tau cawmdim. Nqe 7 qhia hais tias: “Nau-es thiab nws pojniam, nws cov tub thiab cov nyab puavleej mus nyob rau hauv lub nkoj kom tsis raug dej nyab” Nrog rau Nau-es tsev neeg yim leej, kuj muaj txhua yam tsiaj txhu saum nruab nqhuab ib yam ib nkawm mus rau hauv nkoj(nqe 8-9). Vajtswv ceev tibneeg thiab txhua yam tsiaj txojsia cia Nws tsim dua ib lub ntiajteb tshiab tom qab uas dej nyab. Vajtswv cawm lawv dim kev rau txim dhau los ntawm qhov uas tso lawv mus nkaum hauv lub nkoj. Vajluskub qhia paub hais tias thaum Nau-es tsev neeg thiab cov tsiaj uas raug xaiv nce mus rau hauv nkoj tas lawd “Ces tus TSWV mam li kawd lub qhovrooj nkoj rau” (nqe 16). Vajtswv yog tus cawm thiab saib xyuas tibneeg thiab txhua yam tsiaj uas Nws xaiv lawd txojsia ntag.
Vajluskub sau tseg Vajtswv tej lus uas hais rau Nau-es: “Koj thiab koj tsevneeg cia li mus nyob hauv lub nkoj. Tagnrho tej neeg uas nyob hauv ntiajteb tiam no, kuv pom koj tib leeg xwb thiaj li ua lub neej ncaj ncees” (nqe 1). Vajtswv cawm Nau-es thiab nws tsev neeg vim Nws pom hais tias Nau-es yog neeg “ncaj ncees”. Tiamsis qhov tseemceeb uas ua rau Nau-es dhau los ua neeg ncajncees tabmeeg Vajtswv mas yog los ntawm kev ntseeg, raws li Vajtswv Txojlus hauv Henplais 11:7 hais tias: “Twb yog vim Nau-es ntseeg, Nau-es thiaj mloog Vajtswv lus. Vajtswv qhia rau Nau-es txog tej xwm txheej uas yav tom ntej yuav muaj los uas Nau-es qhovmuag tsis pom, Nau-es thiaj txua ib lub nkoj, Nau-es thiab nws tsevneeg thiaj dim kev ploj kev tuag. Vajtswv ua li ntawd twb yog nws rau txim rau tej neeg uas tsis ntseeg. Vim Nau-es ntseeg, Vajtswv thiaj suav hais tias Nau-es yog tus uas ncaj ncees” Ua ib tug neeg nyob hauv lub ntiajteb no, yeej paub tseeb hais tias Nau-es tsis yog ib tug neeg zoo tag nrho txhua yam. Nws txoj kev ncaj ncees yog “los ntawm txoj kev ntseeg” xwb thiab txoj kev ntseeg ntawd qhia tshwm dhau ntawm kev hwm Vajtswv thiab mloog Nws lus.
Txhua tus tibneeg nyob hauv ntiaj teb no puavleej tau ua txhaum, thiab txhua tus puavleej tsimnyog raug rau txim. Tiamsis ua Vajtswv tsaug vim Nws txoj kev hlub, Nws pub kev zam txim thiab cawm txhua tus uas ntseeg txais yuav Tswv Yexus. Thiab Vajtswv xav kom txhua tus uas tau txais kev cawmdim lawm, tshaj qhia Txojmoo Zoo uas hais txog Tswv Yexus txoj kev Cawmdim rau tibneeg sawvdaws, kom lawv kuj tau txais kev cawmdim rau hnub uas txiav txim zaum kawg.
Thov Vajtswv,
Vajtswv, nyuam yaus paub hais tias nyuam yaus muaj txim tsimnyog raug txim. Tiamsis los ntawm Koj txoj kev hlub thiab los ntawm kev ntseeg txais yuav Tswv Yexus, Koj cawm nyuam yaus dim ntawm txojkev rau txim uas txaus ntshai kawg nkaus. Thov pab nyuam yaus ua neej txhua hnub kom tsimnyog qhov uas Koj tau cawm nyuam yaus thiab tshaj qhia Koj txoj kev hlub rau lwm tus uas tsis tau paub. Nyuam yaus tuav Tswv Yexus Khetos lub npe thov, Amees.
Peb coglus li cas hauv kev ua neej kom qhia tshwm kev ua Vajtswv tsaug vim Nws cawm peb dim ntawm txoj kev rau txim?
Nyeem Vajluskub hauv peb lub xyoos: Tshwmsim 15
Kênh Youtube BHKTHN:
