Klei Aê Diê Blŭ: Klei Mtô Mñă Klei Bhiăn 15:7-11
Êlan kliăng: “Jăk mơak yơh phung thâo pap, kyuadah Aê Diê srăng pap kơ diñu.” (Y-Mathiơ 5:7).
Klei êmuh ksiêm mĭn: Kơ hlei pô čiăng kơ drei pap? Ti klei kƀah prŏng phung riêng gah čiăng kơ drei đru brei? Si drei dôk bi êdah klei pap kơ pô mkăn?
Hlăm klei jăk mơak tal êma Khua Yang Yêsu knŏng lač kơ “phung thâo pap” ƀiădah Ñu amâo lač ôh kơ hlei pô srăng pap brei. Snăn yơh, Khua Yang mtă kơ phung anak ƀuôn sang Ñu brei pap kơ phung kƀah knap. Klei anei bi klă leh hlăm klei Khua Yang Yêsu mtô hŏng klei bi hriêng kơ sa čô Samari jăk. Pô čiăng mâo klei pap jing pô kƀah mnơ̆ng măng ai hlei gơ̆ jing. Klei bhiăn Aê Diê mtă: “Tơdah mâo ti krah diih sa čô mnuih ƀun ƀin, sa čô hlăm phung ayŏng adei diih hlăm ƀuôn diih hlăm čar Yêhôwa Aê Diê diih brei kơ diih, đăm bi khăng ai tiê amâodah kpăt kngan kơ ayŏng adei diih ƀun ƀin ôh, ƀiădah brei diih mblang kngan diih kơ gơ̆, leh anăn brei gơ̆ čan bi djăp mnơ̆ng gơ̆ kƀah, ya dŏ gơ̆ čiăng…(đăm) dlăng hŏng ală jhat kơ ayŏng adei diih ƀun ƀin, leh anăn diih amâo brei sa mnơ̆ng kơ gơ̆ ôh,… Brei diih brei kơ gơ̆ hŏng klei ênưih, leh anăn diih amâo srăng mâo ai tiê ktrŏ ôh êjai brei kơ gơ̆.” (Klei Mtô Mñă Klei Bhiăn 15:7-11).
Wăt Khua ƀĭng kna Y-Yôhan leh anăn Y-Yakơ lač msĕ sơăi kơ klei sa čô khăp leh anăn đăo kơ Aê Diê srăng bi êdah hŏng klei pô anăn khăp leh anăn đru phung ƀun ƀin (I Yôhan 3:17; Y-Yakơ 2:15-16). Wah lač bĕ akâo Khua Yang yua drei pô, prăk kăk, klei suaih pral, hruê mmông, leh anăn Phung Sang Aê Diê čiăng drei dưi nao đru phung kƀah knap, leh anăn bi êdah bĕ klei khăp Khua Yang Yêsu kơ lu mnuih hŏng bruă ngă sĭt.
Ƀiădah đăm wơr bĭt ôh kơ mnuih ăt mâo klei čiăng mơh hlăm klei hdĭp mngăt, kyuanăn, jing sa čô mnuih thâo pap, brei drei uêñ mĭn mơh kơ klei jing klei hdĭp myang phung ƀuôn sang leh anăn phung riêng gah drei. Snăn yơh, mnuih thâo pap jing mnuih hur har hưn Klei Mrâo Mrang Jăk, hŏng jih ai tiê wah lač brei kơ klei awăt klei hdĭp myang lăn čar, Phung Sang Aê Diê leh anăn gŏ sang pô…Lu mnuih ênưih snăk mâo klei pap tơdah ƀuh phung êka êkeh kyua klei bi blah ngă, phung anak êrĭt arăng lui,…ƀiădah dŭm čô phung đăo mâo klei ênguôt tơdah ƀuh phung găp djuê pô, mah jiăng pô, phung riêng gah pô,…djiê ƀiădah amâo thâo kral Klei Mrâo Mrang Jăk ôh?
Khua Yang Yêsu lač mnuih thâo pap jing mnuih mâo klei jăk mơak (Y-Mathiơ 5:7). Mtao Salômôn lač msĕ mơh, “…jăk mơak yơh hlei pô pap kơ phung ƀun ƀin” (Klei Bi Hriêng 14:21). Snăn yơh, pô ngă klei thâo pap rông mngăt ñu hŏng klei jăk, leh anăn mơak kyuadah thâo kơ ñu ngă leh klei bi mơak kơ Aê Diê.
Jing phung thâo pap wăt tơdah drei amâo tuôm mă tŭ klei pap mơ̆ng pô mkăn dưn, sĭt nik drei ăt srăng mă tŭ klei Aê Diê pap, drei mă tŭ leh klei pap Aê Diê hŏng klei Ñu bi mtlaih, leh anăn Aê Diê ăt srăng pap nanao, kiă kriê, răng mgang grăp hruê jih hruê drei dôk hdĭp ti lăn ala anei (Klei Mmuñ Hđăp 18:25).
Drei tŭ ư mơ̆ srăng bi êdah klei pap kơ jih jang mnuih tui si knuih êkei Samari jăk anăn?
Wah lač: Ơ Khua Yang, brei bĕ ai tiê Ih kơ kâo, brei kâo mâo klei thâo pap msĕ si êkei Samari jăk čiăng bi êdah klei khăp Ih kơ lăn ala knap mñai anei. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Êskiêl 43.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
