Tơdrong Pơđơ̆k 6:6-11
“Ơ lu bơngai hơlah, năm lăng bĕ kơtu hmôch; Lăng mă nhen păng hŏk iŏk wă kơ hlôh wao.” (Tơdrong Pơđơ̆k 6:6)
Nơ̆r jet tơchĕng pơwao:
– Kon kơtu hmôch sư thoi yơ?
– Pơtao Sôlômôn yua iŏk rup kơtu hmôch wă bơtho kơ lu bơngai alah pơhrăm iŏk tơdrong kiơ?
– Lu bơ̆n đei pơhrăm iŏk ‘Bok Kei-Dei ‘mêm mơnat păng tơpăt thoi yơ đơ̆ng tơdrong pơtih gia ‘nâu?
Mă khan ưh kơ đei bơngai pơgơ̆r, bơngai wei lăng păng bơtho tơ’bôh, pơchŭt, mălei kiơ̆ kơ Kră Yang ăn, đĭ đăng lu kơtu hmôch tă kơ jang pơnam ngăl, hơdrin. Hloh kơ ‘noh dơ̆ng, lu sư kư̆m băt chă mong lê̆ tơmam sa wă kơ huay kơ pơngot chă pơdŭ ‘măn lê̆ kơ bơyan ‘mi hngach noh bơyan mă anat kơ chă tơmam sa. Lu bơngai mă chă hơlen pơnhen dang ei đei lăng hơlen păng ‘bôh kơtu hmôch kăp hla iă dêh, lu sư yua hăm sơnĕnh kăp lu hla dreng wă pơm tơpu lu sư tơ lăm teh. Đơ̆ng noh lu khul kơtu hmôch nai kăp hơmet iĕ iĕ lu hla noh wă kơ jing đei mua na pơm tơmam sa kơ lu kơtăp kơtu hmôch ‘nao cheh păng kơtu hmôch yŏng.
Lăp sơ̆p hla bơar Blŭng a chăl 41 păng 42 chih roi pơdeh gah tơdrong Kră Yang ăn tơdrong gơh hơgei kơ ‘bok Jôsep wă kơ sư tơgŭm dêh Êyiptơ mong ‘măn lê̆ phe ‘ba lăm tơpơh sơnăm mă đei ‘ba lơ. Thoi ei na dêh ‘nâu huay kơ đei pơngot rơwĕt lăm tơpơh sơnăm đơ̆ng rŏng noh păng kư̆m oei rơkah wă tĕch kơ lu dêh char nai mă tơ’bơ̆p tơdrong pơmat, lăm noh na đei dŏng hnam dơnŏ Jôsep klaih đơ̆ng tơdrong pơngot rơwĕt.
‘Bok Kei-Dei ‘mêm mơnat bơtho pơjĭ lu bơngai alah đơ̆ng nơ̆r gơh hơgei lăm Tơdrong Pơđơ̆k. Sư yua iŏk rup pơtih gia thoi kơ lu hmôch wă pơma kơ lu bơngai alah, ‘maih tep hloh kơ bơ̆jang, lu bơngai mă ưh kơ adrin, chu iŏk pơmat, chă tơdrong wă weh hơdĕ kơ tơdrong jang (Tơdrong Pơđơ̆k 22:13). Hloh kơ noh dơ̆ng, bơngai mă alah ưh kơ jang keh tơdrong jang đei pơjao, brah brư dôm tơmam đơ̆ng Kră Yang ăn (Tơdrong Pơđơ̆k 12:27), na lu bơngai tơpăt mă khan pơ̆k tơpơh wơ̆t mălei oei iung adrin jang dơ̆ng (Tơdrong Pơđơ̆k 24:16).
‘Bok Kei-Dei ‘lơng tơpăt lăp đon ăn tơdrong truh dah bơ̆n ưh kơ chu kiơ̆ nơ̆r. Sư ưh kơ dŏng tơdrong alah dah ưh kơ băt hiơ̆k pŭ iŏk lăm chăl nơ̆r ‘Bok Kei-Dei ‘nâu, Pơtao Sôlômôn chrih khă kơ lu bơngai alah thoi âu tơdrong dơnuh ‘noh gô truh tơ lu sư ưh kơ tom băt thoi bơngai tơtông păng tơdrong kơ’bah kơ’bôch gô truh thoi bơngai tơgar iŏk chĕp tơmam tơblah (trong 11). Đei yua đơ̆ng bơngai alah gô iŏk noh tơdrong tơpăt păng lăp trŏ.
‘Bok Kei-Dei ưh kơ sĭ chrih khă đĕch ôh, na Sư kư̆m tơ’bôh tơdrong ‘mêm Sư, tơ’bôh kơ bơ̆n kơmĭl pơnam đơ̆ng kon kơtu hmôch. Kră Yang iơ̆m dim ăn jơ năr wă kơ kon Kră Yang ‘bôh tơdrong ưh kơ ‘lơ̆ng păng tơplih, arih gơh hơgei wă kơ iŏk tơdrong đei yua ‘lơ̆ng đơ̆ng Kră Yang ăn. Apinh Kră Yang tơbăt kơ inh ‘bôh lu tơdrong glăi ưh kơ ‘lơ̆ng bơ̆n, păng kư̆m ‘bôh tơdrong ‘lơ̆ng tơpăt păng tơdrong ‘mêm mơnat Kră Yang tih dêh wă kơ adrin gơh hơgei băt hiơ̆k wă kơ tơdrong arih bơ̆n ưh kơ sĭ chơt hiôk lăp đon đĕch na kư̆m đei Kră Yang yua đei yua kơ Kră Yang păng lơ bơngai.
Kơkuh kơ Ih Kră Yang, inh bơnê kơ Ih yua kơ nơ̆r Ih bơtho hơgei đơ̆ng rup pơtih gia thoi kơtu hmôch. Apinh Ih ăn kơ inh ‘nĕ kơ alah lăm tơdrong arih, tơ’bôh tơdrong tơpăt păng tơdrong ‘mêm Ih lăm jơhngơ̆m pơnam hăm tơdrong jang Ih pơjao, krao khan yua anăn Kră Yang Yêsu Krist, Amen.
Bơ̆n tơ’bôh tơdrong tơpăt păng tơdrong ‘mêm Kră Yang đơ̆ng tơdrong jang thoi yơ?
Đŏk Sơ̆p Hla bơar ‘Bok Kei-Dei lăm pêng sơnăm: Amôt 5
Kênh Youtube BHKTHN:
