I Petus 3:1-7
Nqe cim:
“Ib yam nkaus li ntawd, nej cov uas yog pojniam, nej yuav tsum mloog nej cov txiv lus, txawm yog nej cov txiv muaj qee leej tsis ntseeg Vajtswv txojlus los thaum lawv pom nej coj nej lub neej zoo, lawv yuav los ntseeg tsis tas nej yuav hais ib los li” (I Petus 3:1)
Lus nug xav:
– Tus pojniam ntseeg Yexus cheemtsum ua neej li cas nrog nws tus txiv?
– Yuav kom hloov tau tus txiv lub siab, tus pojniam ntseeg Yexus cheemtsum xyaum ua raws li Xalas tus qauv ntawm yam dabtsi?
– Tus txiv ntseeg Yexus cheemtsum coj cwjpwm li cas nrog nws tus pojniam?
– Zaj kawm ceebtoom dabtsi rau peb txoj kev txijnkawm?
Nyob rau tiam ntawd, tus txiv muaj hwjchim siab tshaj tus pojniam. Yog li ntawd qhov uas tus pojniam xav tau kev ywjpheej qhia tawm txojkev ntseeg tus Tswv yog ib qhov uas nyuaj heev yog tias tus txiv tsis pom zoo. Thaum zoo li ntawd, Vajtswv Txojlus ntuas cov pojniam uas xub ntseeg tus Tswv ua ntej nws tus txiv, tsis yog qhia Txoj Moo Zoo rau tus txiv, tiamsis yuav tsum ua neej mloog lus, Vajtswv Txojlus tias: “thaum lawv pom nej coj nej lub neej zoo, lawv yuav los ntseeg tsis tas nej yuav hais ib los li, rau qhov lawv yeej yuav pom qhov uas nej coj nej lub neej zoo thiab hwm lawv” (nqe 1-2). Tus Tswv xav kom tus pojniam ntseeg Nws ua neej qhia tawm qhov zoo nkauj uas tsis lwj tsis puas nyob rau hauv tsev neeg. Tsis tsimnyog kho kom zoo nkauj sab nraud los ntawm tej saw kub, ris tsho,… tiamsis Vajtswv Txojlus hais tias: “Tsis yog li ntawd, qhov uas nej zoo nkauj yog qhov uas nej muaj lub siab dawb siab zoo thiab paub cai, thiaj yog qhov uas Vajtswv pom hais tias muaj nqis” (nqe 3-4).
Yuav kom hloov tau tus txiv lub siab, tus pojniam ntseeg Yexus yuav tsum ua raws li Xalas tus qauv raws li Vajluskub qhia hais tias: “Cov pojniam txheej thaum ub mloog Vajtswv lus thiab muab siab rau ntseeg, lawv muaj lub siab zoo li ntawd thiab lawv mloog lawv tej txiv lus. Xalas muaj lub siab zoo li ntawd, nws mloog Anplahas lus thiab hu Anplahas hais tias tus tswv…” (nqe 5-6). Ua neej txijnkawm nrog tus txiv uas tsis tau ntseeg Vajtswv, ntau tus pojniam twb tso kev ntseeg tseg, lossis ntshai thaum xav qhia lawv txojkev ntseeg rau tus txiv. Vajtswv Txojlus pub rau lawv muaj kev cia siab tias yuav dhau los ua Xalas cov ntxhais yog tias lawv pheej cia siab rau tus Tswv, ua neej raws li Xalas tus qauv hauv kev mloog tus txiv lus thiab ua yam zoo, ces yuav nyob ruaj khov hauv txhua lub tsamthawj (nqe 6).
Timthawj Petus kuj ntuas tus txiv ntseeg Yexus kom txawj ntse hauv kev coj cwjpwm, saib taus nws tus pojniam zoo li ib tug uas tsis muaj zog, coj los tiv thaiv, pab thiab ua ncaj ncees rau. Yog tias tus txiv ua saib tsis taus nws tus pojniam, ua limhiam, tsis ncaj ncees, ces nws tej lus thov yuav raug tabkaum. Vim txojkev sib raug zoo nrog tus Tswv nyob txij ntawm tej kev sib raug zoo ncaj ncees nrog lwm tus (nqe 7). Yog tias tus txiv ua neej tsis zoo, yuav ua rau tus pojniam uas tsis tau ntseeg nyuaj los ntseeg tus Tswv, lossis tus pojniam uas twb ntseeg tus Tswv lawm yuav mob siab, plam tus Tswv txoj koob hmoov.
Zaj kawm no pab peb rov tig ntsia peb txojkev txijnkawm. Qhov uas tus pojniam lossis tus txiv muaj peev xwm hloov tau tus txijnkawm uas tsis tau ntseeg tus Tswv, lossis ob niam txiv puavleej tau txais tus Tswv txoj koob hmoov, ces nyob txij ntawm nkawd nyias kev totaub thiab nyias kev ua neej. Thov tus Tswv pab peb ua neej thiab coj cwjpwm zoo nrog tus txiv lossis tus pojniam raws li Vajtswv Txojlus qhia kom txawm nyob hauv lub tsamthawj twg los kuj zoo siab hlo nrog lub cuabyig.
Thov Vajtswv,
Tus Tswv, Koj yog tus Tswv ntawm nyuam yaus tsev neeg. Thov pab nyuam yaus zeem paub tej yam uas tseem tsis tau tiav hauv nyuam yaus ob niam txiv txojkev ua neej. Thov Koj pub koob hmoov kom nyuam yaus paub txhim kho raws li Vajtswv Txojlus qhia, kom nyuam yaus txoj kev sib yuav haum Koj siab. Nyuam yaus tuav Yexus Khetos lub npe thov, Amees.
Peb cheemtsum ua neej li cas los hloov peb tus txijnkawm lub siab?
Nyeem Vajluskub hauv peb lub xyoos: Hauxeyas 11
Kênh Youtube BHKTHN:
