Phau Ntawv Nkauj 116:15-19
Nqe cim:
“Kuv yuav muab khoom fij ua koj tsaug thiab thov koj” (Phau Ntawv Nkauj 116:17)
Lus nug rau sawvdaws xav:
– Tus sau rov qhia tshwm kev nco tus Tswv txiajntsig li cas?
– Yam no tau qhia tshwm hauv tus sau lub neej li cas?
– Yam dabtsi pheej thaiv peb kev nco tus Tswv txiajntsig?
Yam tseeb meej hauv kev nco tus Tswv txiajntsig yog pehawm thiab hu nkauj txhawb nqa Nws (nqe 17). Peb pehawm tus Tswv vim Nws yog tus tsim ib puas tsav yam thiab tsim peb; Nws yog tus Cawmseej, coj peb tawm hauv qhov tsaus ntuj los nyob qhov pom kev; thiab Nws yog tus uas saib xyuas, coj thiab yug peb txhua hnub. Timthawj Paulus hais tias: “Txawm yog nej raug kev txomnyem thiab tau zoo los nej yuavtsum ua Vajtswv tsaug”(1 Thexalaunikes 5:18), txhais tau hais tias txhua yam, txhua lub tsamthawj los puavleej yuavtsum ua Vajtswv tsaug. Thaum lub sijhawm nyuaj siab tshaj plaws, poob kev ntseeg siab ntawm tibneeg los peb kuj muaj vimchiv ua Vajtswv tsaug , vim peb muaj ib tug Tswv ncaj ncees, mloog ntsoov peb, txhawb peb zog, thiab cawm peb (nqe 10-11). Thaum ntsib kev ploj tuag, yog ib tug ntseeg, peb yeej tseem hu nkauj qhuas Vajtswv vim Nws yog tus tau saib xyuas tus ntawd tiam no, thiab tseem yuav saib xyuas tus ntsujplig thaum ncaim lub ntiajteb no lawd (nqe 15). Yog peb tus kheej raug ploj tuag, los peb tseem yuav qhuas Vajtswv vim: “Txawm yog kuv taug txoj kev tsaus ntuj nti, los kuv tsis ntshai dabtsi, rau qhov koj nrog nraim kuv ” (Phau Ntawv Nkauj 23:4). Cia li qhia tshwm kev nco Vajtswv txiajntsig dhau los ntawm kev pehawm thiab hu nkauj qhuas Vajtswv thaum raug kev txomnyem, kev quaj ntsuag vim peb ntseeg hais tias “Peb paub tias Vajtswv siv txhua yam uas tshwmsim los ua yam zoo pub rau cov uas hlub Nws, cov ntawd yog cov uas Nws tau hu los rawsli Nws lub homphiaj” (Loos 8:28).
Rov mus saib thawj nqe ntawm Phau Ntawv Nkauj ua ntej uas tus sau hais tias nws hlub tus Tswv vim tus Tswv twb xub los nrhiav nws, mloog nws, cawm nws, tu thiab saib xyuas nws. Timthawj Yauhas hais hauv 1 Yauhas 4:19: “Peb muaj kev hlub, rau qhov Vajtswv twb xub hlub peb lawm”. Puas muaj tej zaum peb rov cim civ nug peb tus kheej hais tias vim li cas kuv twb nseeg Vajtswv lawm tiamsis lub neej tseem qhuav qhawv, qaug zog zis, thiab ua tsis tau lub neej ua tim khawv? Lo lus teb yog tej zaum peb tsis tau hlub Vajtswv tiag, txhua tes haujlwm uas peb ua yog ib tes haujlwm ntawm kev ntseeg, haujlwm tuamtsev, yeej tsis yog ib tes haujlwm ntawm leej tub uas hlub Leej Txiv! Peb tsis hlub Vajtswv vim peb hnov qab hais tias Vajtswv hlub peb npaum li cas lawm! Peb cia tej kev tabkaum, teebmeem, kev lomzem, kev tau zoo hauv ntiajteb txeeb qhov chaw uas hlub Vajtswv lawm (Tshwmsim 2:4). Cia li nco hais tias Vajtswv twb hlub peb npaum li cas lawm , Vajtswv los nrhiav thiab pub kev cawmdim rau yus li cas, txhua hnub Vajtswv pub koobhmoov rau yus li cas. Cia li ua kom kev hlub Vajtswv rov tshiab tuaj, peb yuav paub hais tias peb yuav ua dabtsi pauj rau tej yam zoo uas tus Tswv tau ua rau yus lawm.
Thov Vajtswv,
Tus Tswv, thov coj nyuam yaus rov los nyob hauv Koj thiab Koj txoj kev hlub. Nyuam yaus txaus siab hlo muab lub neej no fij rau Koj vim paub hais tias Koj twb muab Koj tus kheej pub rau nyuam yaus ua ntej lawm. Nyuam yaus tuav Tswv Yexus Khetos lub npe thov, Amees.
Ib tsoom mloog uas hmov tshua,
Peb puas pehawm thiab nco Vajtswv txiajntsig txhua hnub?
Nyeem Vajluskub hauv peb lub xyoo: Yelemis 25
Kênh Youtube BHKTHN:
