Pajlug 30:13-14
Nqe cim:
“…lawv yuav tsis sib hlub, tsis zam txim rau lwm tus, nyiam taug xaiv, tsis tswj lawv lub siab, ua neeg tsivtsaim thiab tsis nyiam ua zoo; 4lawv yuav ua neeg ntxeev siab, ua neeg siab heev, thiab lawv saib lawv tsimtxiaj dua lwm tus; lawv nyiam kev lomzem heev dua nyiam Vajtswv” (2 Timautes 3:3-4)
Lus nug rau sawvdaws xav:
– Ob qhov cim txuas ntxiv ntawm cov xeebntxwv phem uas hais txog ntawm no yog dabtsi?
– Cov cim no tabtom tshwm muaj rau tiam peb nyob li cas?
Qhov cim tim peb ntawm cov xeebntxwv phem yog khavtheeb (nqe 13). Ankus siv tus duab “lub qhov muag saib tsis taus lwm tus” (nqe 13 HMOWSV) lub ntsiab yog qhov saib khavtheeb ua saib tsis taus lwm tus. Cov neeg no tsis saib ncaj nraim mus rau txhua tus qhovmuag kom totaub thiab sib raug zoo li sawvdaws pheej xeeb (bình đẳng) ib yam. Tiamsis lawv saib lwm tus zoo li ib yam cuabyeej nrhiav noj thiab txhawb tus duab ntawm lawv tus kheej. Cov xeebntxwv “taubhau siab” thiab “lub qhov muag saib tsis taus lwm tus” yog piav txog ib tiam neeg khavtheeb, saib tsis taus lwm tus, siab hlob. Niaj hnub no coob tus tabtom tsa “lub qhov muag saib tsis taus lwm tus” thaum uas txaus siab rau cajces, meejmom, kev txawj ntse, npluanuj lossis tej yam uas yus ua tau. Ntawd yog cov neeg txhaum uas tsis kam lees yuav feem xyuam hwm niam txiv, ntxeev siab tawmtsam Vajtswv, saib yus tseemceeb dua, yog qhov zoo rau luag xyaum, tsa hau siab, txaus siab rau yus kev txhaum, khav thiab ua saib tsis taus tus neeg ncaj ncees (2 Thexalaunikes 2:4).
Qhov cim tim plaub ntawm cov xeebntxwv phem yog ua nruj tsiv (nqe 14). Nqe pajlug no piav txog ib tiam neeg uas siv dag zog ua phem, tsis muaj tibneeg txoj kev hlub. Txoj kev phem huam loj heev lawv mus huab cov neeg tsis muaj leejtwg pab uas yog “cov pluag” thiab “cov txomnyem tug” kom qhia pom lawv muaj meejmom thiab hwjchim. Niaj hnub nim no, txoj kev nruj tsiv thiab siv lub dag zog ua phem tsis yog muaj tshwm hauv tej plawv nroog xwb tiamsis tseem muaj tshwm txhua hnub rau saum tej huab cua. Peb pheej pom muaj tej pab neeg coob quabyuam ib leeg saum huab cua, nrhiav tua kom txog thaum kawg thiab zoo siab thaum ua tiav, txaus siab vim yus yog neeg zoo, ua zoo thiab tiv thaiv txoj kev ncaj ncees!
Txawm yog Ankus hais txog ntau hom neeg sib txawv, tiamsis los rau ntawm ib seem, tagnrho cov nqe pajlug no puavleej hais txog kev khavtheeb, mas qhov no raug suav hais tias yog ua kom puastsuaj thiab piamsij txhua txoj kev sib raug zoo. Khavtheeb ua rau tibneeg ntxub niam txiv txoj cai, vim li ntawd thiaj tawmtsam niam txiv (nqe 11). Khavtheeb ua rau tibneeg digmuag tsis pom yus tej kev phem (nqe 12). Tsis tas li ntawd, khavtheeb tseem ua rau tibneeg saib tsis taus lwm tus (nqe 13). Thiab qhov kawg, khavtheeb ua rau tibneeg qia dub, saib yus tus kheej tseemceeb dua, dhau los ua tus neeg siab heev thiab ua tsis ncaj rau cov uas tsis muaj peevxwm li yus (nqe 14). Hais rau lwm seem, khavtheeb yog txoj kev txhaum limhiam rau txhua fab, twb kuj vim yog khavtheeb mas Luxifaws thiaj ntxeev siab tawmtsam Vajtswv. Kev khavtheeb txawv “lub siab hlub” Tswv Yexus txo hwjchim, mloog lus thiab txaus siab tuag theej (Filipis 2:5-8).
Tsev neeg, cov xeebtxwv ua neej raws Vajtswv Txojlus yog lub plag ua rau lub tebchaws ua neej noj qab hnav sov, kaj siab. Peb cia li thov Vajtswv los ncig xyuas lub tebchaws thiab yus cov xeebntxwv.
Thov Vajtswv,
Vajtswv, thov pab nyuam yaus ceev lub siab li Tswv Yexus lub, ua neej muaj kev hlub thiab paub txo hwjchim tabmeeg tus Tswv thiab tibneeg. Nyuam yaus tuav Yexus Khetos lub npe thov, Amees.
Peb puas tau thov Vajtswv los ncig xyuas peb lub tebchaws?
Nyeem Vajluskub hauv peb lub xyoos: Kaulaixais 1
Kênh Youtube BHKTHN:
