I Pêtrôs 1:13-16
“Sơ̆ iĕm ưh kơ hlôh tơdrong ‘Bok Kei-Deina iĕm hưch hanh lơ tơdrong kơnê̆. Dang ei iĕm jing kon ‘Bok Kei-Dei bơih, iĕm athei chu kơ ‘Bok Kei-Dei, ‘nĕ pă pơm tơdrong kơnê̆ dơ̆ng” (I Pêtrôs 1:14)
Nơ̆r jet tơchĕng pơwao:
– Kon băt chu yom nơ̆r Kră Yang kăl kơ athei arih thoi yơ?
– Yua kơ kiơ kon băt chu yom athei ‘lơ̆ng rơgoh lăm tơdrong arih sa sư kơdih?
– Nơ̆r Kră Yang pơdrŭt lu bơ̆n arih thoi yơ wă kơ kon băt chu yom kơ Sư?
Kơplah oei răp gô năr Kră Yang Yêsu Krist wă jur dơ̆ng, ‘Bok Pôl bơtho Bơngai Lui bơngai Juđê păng lu bơngai tơmoi arih tơ rak ‘brak jơ̆p jang anih, athei arih mă trŏ noh “kon băt chu yom”. ‘Bok Pôl yua nơ̆r âu wă pơma tơdrong tơplơ̆ hăm” kon hơ’lơ̆p ưh kơ chu yom”( Êphêsô 2:2). Adrol hloh, kon băt chu yom athei đei jơhnơ̆m mă kơjăp, jơhngơ̆m đon mă hơđơ̆ng, khŏm pơgŏ bơ̆n pơm kiơ̆, lui gơnang lăm tôm tơdrong mă pŭn hiôk ling-lang đơ̆ng Kră Yang ăn(tr.13). Mă ‘bar, kon hơ’lơ̆p lăm hnam dơnŏ Kră Yang ‘noh jơ̆ lu bơngai đei tơdrong arih tơplih ‘nao, lei ưh kơ pơm kiơ̆ kơdih wă lăm todrong yoch, ‘noh pơgơ̆r lăm jơhngơ̆m mă adrol sơ̆ mă lu bơ̆n hưch wă (tr.14). Mă pêng, athei arih lăm tơdrong arih ‘lơ̆ng rơgoh lăm tơdrong oei sa pơma dơnuh, yua kơ Tơ’ngla mă krao lu bơ̆n lĕch đơ̆ng teh đak tơdrong yoch ‘noh jơ̆ Tơ’ngla ‘lơ̆ng rơgoh (tr.15).
Lăm anih mă bơngai kon băt chu yom,Bơngai Lui oei ling -lang gơnang jơhngơ̆m pran đơ̆ng Kră Yang wă kơ gơh arih ‘lơ̆ng rơgoh rim năr.Mă khan jing kon ‘Bok Kei-Dei, mă lei Bơngai Lui oei tơ’bơ̆p hăm tơdrong”kơplah inh ‘maih pơm tơdrong ‘lơ̆ng oei klep kiơ̆ inh”(Rôm 7:21). Arih ‘lơ̆ng rơgoh ‘noh pơm tơ’bôh jing kon băt chu yom Kră Yang. ‘Noh jơ̆ pơsĭt hơđăl dêh kơ Tơ’ngla bơ̆n lui jơ̆ Tơ’ngla ‘lơ̆ng rơgoh “yua kơ đei chih khan: athei ‘lơ̆ng tơpăt yua kơ Inh ‘lơ̆ng tơpăt”(tr.16). Chăl arih ‘lơ̆ng rơgoh ‘noh jơ̆ kơnhăm Bơngai Lui rĕng truh “ lăp Yêsu Krist jur tơ ala teh âu ning mônh, bơ̆n gô jing thoi Sư, kơlih kơ bơ̆n gô ‘bôh Sư tơpă”( I Yôhan 3:2b). Mă bu bu mưh jing ‘Bok Kei-Dei bơih mă lei oei arih pơm kiơ̆ kơdih wă lăm tơdrong yoch nhen thoi tam mă băt kơ Kră Yang.
Nơ̆r Kră Yang pơdrŭt lu bơ̆n oei wei kơjăp đon lui, weh ataih đơ̆ng tơdrong yoch, arih mă trŏ kơ kon Kră Yang băt kơ chu yom. Lăm tơdrong arih, tơdrong yoch hăm dôm tơdrong pơm ưh kơ ‘blep trŏ thoi Kră Yang wă oei tơklep hăm bơ̆n, tơdrong pơhlŭ pơlung păng wă kơ lu bơ̆n pơm kiơ̆. Lăm kơplah noh, kơdih rim ‘nu Bơngai Lui ưh kơ gơnang kơ jơhngơ̆m pran kơdih wă kơ gơh arih ‘lơ̆ng rơgoh, chu yom nơ̆r Kră Yang. Thoi noh,kon pơlei Kră Yang kăl kơ chơchă Kră Yang hloh đơ̆ng tơdrong krao khan, pơhrăm Nơ̆r Kră Yang hăm jơhngơ̆m hưch hanh, weh ataih đơ̆ng tơdrong yoch…Đơ̆ng Yang Bơhngol ‘Lơ̆ng tơgŭm bơ̆n arih ‘lơ̆ng tơpăt rim năr,arih pơchrang hơdah Anăn Kră Yang păng răp gô tơdrong apah lăm năr Kră Yang Yêsu Krist jur.
Ơ Kră Yang jơ̆ mă ‘mêm mơnat , ‘lơ̆ng rơgoh. Apinh tơgŭm inh ling lang ‘blŏk inh jơ̆ minh ‘nu kon băt chu yom Ih wă kơ inh arih ‘lơ̆ng tơpăt lăm tơdrong arih sa pơma dơnuh. Apinh ‘Bă thim ăn jơhngơ̆m pran wă kơ inh oei arih rok kiơ̆ trong ‘lơ̆ng tơpăt dĭng truh năr tơ’bơ̆p Ih. Yua anăn Kră Yang Yêsu Krist, Amen.
Lu bơ̆n hăm pơm tơ’bôh tơdrong arih minh ‘nu kon Kră Yang băt chu yom ‘noh thoi yơ ?
Đŏk Sơ̆p Hlâr ‘Bok Kei-Dei lăm pêng sơnăm: II Hơ’mon 33
Kênh Youtube BHKTHN:
