Yakơ 5:13-15
“Tơ̆ng đei bu lăm lu iĕm đei tơdrong gleh kiơ truh kơ lu sư, sư athei krao khan hloi; jơhngơ̆m bu hiôk chơt sư athei hơri bơnê kơ ‘Bok Kei-Dei.” (Yakơ 5:13)
Nơ̆r jet tơchĕng pơwao:
– ‘Bok Yakơ athei lu bơngai lui blah tơdrong pơlong lăng, blah hăm kiơ?
– Kră Yang pơkă sĭt kơ bơ̆n tơtơdrong kiơ mưh bơ̆n krao khan?
– Bơ̆n yua iŏk tơdrong sĭt ‘nâu thoi yơ?
Chăl arih bơ̆n đei lu jơ năr phara băl. Đei jơ năr hiôk chơt, tơproh, wă pơm kiơ jang kiơ kư̆m ‘bônh tĕnh,kư̆m đei lu jơ năr ‘bĕnh kơ tơdrong pơlong lăng, pơmat tat anat anot, jĭ jăn păn hnong. Nơ̆r Kră Yang lăm Hla bơar Yakơ 5:13-15 bơtho kơ lu bơngai lui Juđê kơplah lu sư arih tơklah tơklang tơ pơlei âu pơlei to yua kơ đơ̆ng đe pơm kơnê̆ kơ tơdrong lui, nơ̆r Kră Yang bơtho lu sư gah tơdrong mơsêh pran lăm tơdrong krao khan kơplah tơ’bơ̆p tơdrong pơlong lăng.Lu bơngai lui kơ Kră Yang bơih,athei băt kơnăl kơ Kră Yang Tơ’ngla gơh pơm tôm tơdrong, păng pơgơ̆r tôm tơdrong,lei na kon pơlei Kră Yang kăl kơ blah tơdrong pơlong,blah hăm tơdrong krao khan: Krao khan apinh kơplah pơmat tat; krao khan hăm nơ̆r bơnê ư-ang kơ Kră Yang kơplah hiôk chơt (tr.13); krao khan tơgŭm kơplah kơplah đei tơdrong jĭ jăn (tr.14)
Rim ‘nu athei krao khan ăn kơdih akâu, mă-lei, bơ̆n bơngai lui ‘nâu, Kră Yang ăn kơ bơ̆n minh tơdrong kăl dêh,’lơ̆ng dêh, noh gơh krao khan tơgŭm dih băl, năr bơ̆n đei tơdrong anat, bơ̆n roi ăn bôl buăl,na bôl buăl krao khan dŏng tơgŭm bơ̆n.Lu bơngai jĭ jăn gơh krao lu kră wei lăng lăm Khul Lui krao khan tơgŭm lu sư.Hiôk dêh mưh đei lu ‘nhŏng oh pôm tơdrong lui pŭ dŏng dih băl tơdrong trăp,băt rơđah kơ bơ̆n tơdrong anat na wang dŏng hơdai bơ̆n wă kơ jơhngơ̆m bơ̆n rơhơi, hơnhơl ‘biơ̆. Rup Khul Lui pôm jơhngơ̆m đon krao khan tơgŭm lu bơngai jĭ jăn ‘noh ‘lơ̆ng pă băt dang yơ! Nơ̆r Kră Yang pơkă sĭt khan bơngai jĭ-jăn noh Sư gô “tơiung”, wă khan Sư pơklaih, ăn gơh klaih praih hiôk. Dah đêl bơngai ei pơm yoch đei jĭ-jăn lei Kră Yang kư̆m mơnat huay kơ jô̆ yo tơdrong yoch bơngai jĭ-jăn ei mơ̆n.(tr.15). Hmă sư, ưh kơ trŏ kơ dôm lu bơngai jĭ-jăn noh yua kơ đêl sư yoch ngăl ôh,tơdrong kăl sư‘nâu wă kơ bơ̆n lăng ‘bôh tơdrong lui, tơdrong arih gah bơhngol bơ̆n păng wă kơ bơ̆n băt ‘bai hŏk ayơ Kră Yang wă bơtho bơ̆n.Mă loi, kăl kơ băt tơdrong bơ̆n gơh klaih noh đơ̆ng Kră Yang pơklaih păng Sư gơh yua trong ‘nâu trong ‘noh wă ba ăn kơ lu bơngai lui kơ sư gơh klaih đơ̆ng tơdrong jĭ-jăn păn hnong noh.
Thoi noh na lăm dôm tơdrong pơlong lăng mă bơ̆n tơ’bơ̆p noh, tơdrong kăl ngơ-ngei noh bơ̆n athei krao khan. Bơ̆n tơ’bôh bơ̆n kơdih ưh kơ gơh, ưh kơ kĕ ôh pơjăng pơjăr hăm tơdrong anat truh noh, lei na ‘maih wă krao khan roi ăn kơ Kră Yang dôm tơdrong bơ̆n kăl wă , tơ’bôh jơhngơ̆m bơ̆n gơnang kơ Kră Yang,hơđŏng kơ sư dŏng tơgŭm, hơmet ăn keh ‘lơ̆ng. Kră Yang pơkă khan Sư gô mơ̆ng păng tơl tơwih dôm nơ̆r bơ̆n krao khan kiơ̆ kơ Sư wă ‘lơ̆ng ăn kơ bơ̆n, hloh kơ tơdrong bơ̆n gô păng hloh kơ tơdrong bơ̆n tơchĕng. Kơplah dang ei ‘nâu, ih tơ’bơ̆p tơdrong anat kiơ? Ih athei đĭ jơhngơ̆m krao khan apinh Kră Yang dŏng tơgŭm. ‘Nĕ kơ kơ hrơ ôh, athei roi pơdah tơdrong anat bơ̆n noh kơ lu ‘bok wei lăng păng lu‘nhŏng oh bơngai lui jih‘ma kơ bơ̆n wă kơ lu sư krao khan tơgŭm bơ̆n.Kră Yang krao bơ̆n thoi âu:“Bơ̆n athei pơjao kơ Sư dôm tơdrong bơ̆n sơ’ngon jơ̆l hăt phăt-ol,yua kơ Sư wei lăng bơ̆n” (I Pêtrôs 5:7).
Kơkuh kơ Ih Kră Yang, lăm tơdrong pơlong truh gleh glăn pơmat tat,inh băt kơ akâu inh rơdu tơrăn dêh,inh bơngai ưh kơ kĕ tơpă. Apinh Ih tơgŭm inh băt tơkan tơ Ih gơnang kơ Ih, yua kơ Ih Tơ’ngla ‘mêm mơnat păng ling-lang wei lăng inh.Apinh Ih pơklaih tơdrong jĭ-jăn inh, tơgŭm hlôi đơ̆ng tơdrong pơlong mă inh tơ’bơ̆p ‘bơ̆t anăp.Inh krao khan yua năn Kra Yang Yêsu Krist, Amen!
Đei tơdrong anat kiơ bơ̆n pơjao kơ Kră Yang năr ‘nâu?
Đŏk Sơ̆p hla bơar’Bok Kei-Dei lăm pêng sơnăm: II Pơtao 21
Kênh Youtube BHKTHN:
