Klei Aê Diê Blŭ: Y-Mathiơ 21:42-46
Êlan kliăng: “Kyuanăn kơ diih phung đăo leh, boh tâo anei jing yuôm; ƀiădah kơ phung amâo đăo ôh, “Boh tâo phung ngă sang hngah leh, jing hĕ leh boh tâo phŭn ti kiêng” (I Y-Pêtrôs 2:7)
Klei êmuh ksiêm mĭn: Ya ngă Khua Yang Yêsu êmuh phung knơ̆ng gĭt gai klei đăo kơ trăn Klei Aê Diê Blŭ blŭ djŏ kơ boh tâo phŭn ti kiêng? Si phung knơ̆ng gĭt gai klei đăo lŏ wĭt ngă? Si drei srăng mdơ̆ng atur klei đăo drei?
Leh yăl dliê bi hriêng kơ phung mưn đang boh kriăk ƀâo jhat ƀai, Khua Yang Yêsu êmuh phung knơ̆ng gĭt gai klei đăo Yuđa si ngă diñu ka tuôm dlăng hĕ Klei Mmuñ Hđăp 118:22-23 čih kơ boh tâo phŭn ti kiêng sang? Đưm adih, tơdah mdơ̆ng sang, phung mdơ̆ng sang ruah boh tâo kiêng pioh bi mkĕ jih jang mtih mbĭt. Boh tâo phŭn ti kiêng jing mnơ̆ng yuôm snăk pioh bi kjăp sang. Tơdah boh tâo kiêng arăng phat amâo djŏ hnơ̆ng ôh, sĭt nik srăng bi hmăi lu snăk kơ klei kjăp sang anăn, kyuanăn phung mdơ̆ng sang ruah klă snăk. Ƀiădah ăt mâo mơh pô mdơ̆ng sang kƀah klei thâo, khăng mâo klei čhuai tơdah lui hĕ boh tâo jăk leh anăn ruah boh tâo jhat.
Hrêč yua Klei Aê Diê Blŭ kơ boh tâo phŭn ti kiêng, Khua Yang Yêsu čiăng lač wăt tơdah mâo lu mnuih hlăm phung ƀuôn sang hngah kơ Ñu, ƀiădah Ñu ăt jing boh tâo phŭn ti kiêng, jing boh tâo yuôm hĭn hlăm sang mrâo Ñu, jing Phung Sang Aê Diê (Bruă Phung Khua Ƀĭng Kna 4:11). Khua Yang brei thâo msĕ mơh kơ “klei yuôm bhăn” Aê Diê srăng ngă ti anăp phung ƀuôn sang Ñu ruah leh jing Ñu srăng brei ƀuôn ala mtao Aê Diê kơ sa găp djuê mkăn jing găp djuê srăng mâo boh kơ Ñu. Bi hlei pô hngah kơ Khua Yang Yêsu, čŏng čiăng lui hĕ Ñu srăng mčah rai “msĕ si kam hlăm anôk juă mdiê êjai yan bhang”, Aê Diê srăng ngă klei anei hlăm hruê Ñu phat kđi jih jang găp djuê mnuih (Y-Đaniel 2:34-35). “Tơdah phung knơ̆ng khua ngă yang leh anăn phung Pharisi hmư̆ klei bi hriêng Yêsu blŭ anăn, diñu thâo săng kơ Yêsu blŭ djŏ kơ diñu, hrô kơ klei kmhal kơ klei soh, diñu duah êlan čiăng dưi bi mdjiê Yêsu. Ƀiădah diñu huĭ kơ phung lu, kyuanăn diñu ka dưi ngă mtam ôh.
Phung Sang Aê Diê hruê anei mdơ̆ng ti dlông Khua Yang Yêsu pô jing Boh Tâo Kiêng, Khua ƀĭng kna Y-Pôl lač leh kơ ênoh yuôm phung drei tơdah dôk hlăm Phung Sang Aê Diê Khua Yang, arăng mdơ̆ng leh diih “ti dlông atur phung khua ƀĭng kna leh anăn phung khua pô hưn êlâo dưm leh, Krist Yêsu pô jing boh tâo phŭn ti kiêng” (Êphêsô 2:20). Brei drei răng kơ klei mĭn bi mni kơ klei kpă ênô drei pô leh anăn hngah hĕ kơ Aê Diê, amâodah tŭ klei bi hmăi mơ̆ng klei đăo soh ruah sa atur mkăn êngao kơ Khua Yang Yêsu, Khua ƀĭng kna Y-Pôl mtă kơ Phung Sang Aê Diê ƀuôn Kôrantô răng snei: “Kyuadah amâo mâo atur mkăn ôh Aê Diê dưi dưm, knŏng atur Ñu dưm leh, jing Yêsu Krist” (I Kôrantô 3:11). Drei mâo klei mtrŭt brei “mtrŭn agha, mdơ̆ng hlăm Ñu, leh anăn dôk kjăp hlăm klei đăo, tui si klei diih hriăm leh, leh anăn hdơr bi mni kơ Aê Diê nanao” (Kôlôs 2:7).
Mâo mơ̆ klei blŭ amâodah bruă ngă brei ƀuh drei dôk hngah kơ Khua Yang mơ̆ng klei hdĭp drei?
Wah lač: Ơ Khua Yang, pap brei kơ kâo đa kyuadah mâo lu blư̆ kâo hdĭp msĕ si hngah kơ Ih mơ̆ng klei hdĭp kâo. Đru kâo thâo kral Ih yơh jing Boh Tâo dôk kjăp hlŏng lar kơ kâo čiăng kâo krơ̆ng kjăp klei đăo kâo hlăm Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: II Klei Yăl Dliê 20
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
