Mathais 21:42-46
Nqe cim:
“Lub pobzeb no tseemceeb rau nej txhua tus uas ntseeg, tiamsis tsis tseemceeb rau cov uas tsis ntseeg: “Lub pobzeb uas cov kws ua tsev muab povtseg lawm, Vajtswv twb muab lub pobzeb ntawd los ua lub thawj lawm.” (I Petus 2:7)
Lus nug rau sawvdaws xav:
– Vim li cas Tswv Yexus nug cov thawj ntawm cov povthawj txog ntu Vajluskub uas hais txog thawj lub pobzeb?
– Cov thawj ntawm cov povthawj thiab cov Falixais hais li cas?
– Peb cheemtsum muaj lub plag kev ntseeg zoo li cas?
Tom qab uas tham cov lus pivtxwv txog cov neeg tu lub vaj txiv hmab uas siab phem, Tswv Yexus thiaj nug cov thawj ntawm cov povthawj thiab cov Falixais hais tias lawv tsis nyeem Vajtswv Txojlus hauv Phau Ntawv Nkauj 118:22-23 uas hais txog lub pobzeb los yog ua cas? Lub sijhawm thaud, thaum yuav ua ib lub tsev, cov kws ua tsev pheej xaiv cov pobzeb uas xwmfab xwmmeem zoo los tib ua ke. Thawj lub pobzeb yog feem uas tseemceeb heev rau qhov uas ua rau lub tsev ruaj. Yog thawj lub pobzeb txiav tso tsis haum ces yuav ua hiam lub tsev nyob, yog li cov kws ua tsev thiaj xaiv cov pobzeb zoo ua. Tiamsis cov kws uas tsis paub ua tsev, lawv pheej xaiv cov pobzeb tsis zoo los ua.
Muab Vajtswv Txojlus los ua tabpov txog thawj lub pobzeb, Tswv Yexus xav qhia hais tias txawm yog ntau leej tsis ntseeg Nws, los Nws yeej yog thawj lub pozeb, muaj nqis heev nyob hauv Nws tsevneeg uas yog Pawg Ntseeg (Tes Haujlwm 4:11). Tus Tswv kuj qhia tshwm tej uas “peb xav tsis thoob” uas Nws ua rau Nws haivneeg yog yuav pub Vajtswv lub Tebchaws rau lwm haivneeg, lawv yuav ua ib haivneeg tawg paj txi txiv rau Nws. Cov neeg uas tsis lees yuav Tswv Yexus, muab Nws tshem tawm hauv lub neej mus yuav raug puastsuaj “ib yam li tej npluag nplej uas nyob hauv tshav ntaus nplej thaum lub caij ntuj qhua”, qhov no tus Tswv yuav ua thaum Nws los txiav txim rau txhua haivneeg (Daniyees 2:34-35). Cov povthawj thiab cov txwjlaug hnov tej lus no ces lawv paub tias tus Tswv tabtom hais txog lawv ntag, twb tsimnyog lees txim, los lawv cia li nrhiav tswvyim ntes tus Tswv thiab muab Nws tua povtseg. Tiamsis vim ntshai tej pejxeem lawv tsis kam ua tamsim ntawd.
Vajtswv Pawg Ntseeg nimno tau tsim tsa los ntawm Tswv Yexus uas yog thawj lub pobzeb, Timthawj Paulus hais txog qhov muaj nqis ntawm peb thaum nyob hauv Vajtswv Pawg Ntseeg, “Vajtswv muab nej los ua rau saum lub qua tsev uas cov timthawj thiab cov cev Vajtswv lus twb ncaws tau cia lawm. Tus ncej tas ntawd yog Yexus Khetos ntag.” (Efexus 2:20). Peb cheemtsum ua tib zoo saib txojkev xav tias yus tus kheej twb ncaj ncees txaus lawm es tsis vamkhom Vajtswv, lossis raug kev ntseeg cuav coj mus cog dua lwm lub plag uas tsis yog Tswv Yexus, Timthawj Paulus twb muab ceebtoom rau Pawg Ntseeg Kauleethaus: “Rau qhov yeej tsis muaj leejtwg yuav muaj cuabkav tsa dua lwm lub tsev hloov lub uas Vajtswv twb tsa tau lawm, lub ntawd yog Yexus Khetos ntag” (I Kauleethaus 3:11). Peb tau kev txhawb zog los ntawm Vajtswv Txojlus uas hais tias “Nej yuav tsum muab siab rau ntseeg Yexus Khetos ib yam li tus cag ntoo uas ntsia av tob tob. Thiab nej yuav tsum sawv khov kho ib yam li lub tsev uas cov ncej txhos tob tob. Nej yuav tsum muab siab npuab tej uas nej twb kawm los lawm. thiab nej yuav tsum niaj hnub nco ntsoov ua Vajtswv tsaug.” (Kaulauxais 2:7).
Thov Vajtswv,
Tus Tswv, thov Koj zam txim rau nyuam yaus, vim muaj ntau zaus nyuam yaus muab Koj tshem tawm hauv kev ua neej lawm. Thov Koj pab kom nyuam yaus zeem paub tias Koj yog thawj lub Pobzeb nyob mus ibtxhis uas nyuam yaus cog kev ntseeg rau. Nyuam yaus tuav Yexus Khetos lub npe thov, Amees.
Muaj cov lus hais, kev ua haujlwm twg uas peb ua tabtom muab tus Tswv tso tawm hauv peb lub neej mus?
Nyeem Vajluskub hauv peb lub xyoo: II Xwmtxheej Vajntxwv 20
Kênh Youtube BHKTHN:
