II Hơ’mon 33:12-13
“Kơplah sư đei tơdrong gleh truh pơmat-tat, na sư krao apinh Kră Yang ‘Bok Kei-Dei sư păng tơ jur akâu tơbral tơpă ‘bơ̆t anăp Kră Yang ‘Bok Kei-Dei lu ‘bok sư.” (II Hơ’mon 33:12)
Nơ̆r jet tơchĕng pơwao:
– Kơplah đei tơdrong truh, pơmat-tat oei lăm hnam phak, Pơtao Manase pơm tơdrong kiơ?
– Kră Yang tơl tơwih nơ̆r pơtao Manase thoi yơ?
– Lu bơ̆n kăl kơ pơm thoi yơ kơplah tơdrong gleh truh pơmat-tat pơlong lăng?
Yua kơ bơngai Asiri pơm kơnê̆ dêh kơ lu bơngai bơnă, na lu sư chô̆ pơtao Manase hăm tơlei glang păng dui ba tơ dêh char Babilôn ưh kơ phara kiơ kơ sem dơrong, pơm kơnê̆ krưp tơpă. Lăm hnam phak gleh glăn, Pơtao krao apinh Kră Yang ‘Bok Kei-Dei. Ding mah hiong đĭ đăng tôm tơdong ‘lơ̆ng rŏ ‘mơ̆i, na băt kơdih mơn ‘brĕng. Đơ̆ng minh ‘nu bơngai tơnăp kơkuh kơ lu rup yang, jơ âu jing oei chĭt lăm hnam phak yua kơ đơ̆ng lăm minh kon pơlei kơkuh kơ rup yang thoi noh pơtao hlôh băt lu rup yang drĕch nai ưh kơ gơh dŏng pơklaih sư, adrol ki pơtao pơ-ang păng “pơm tơblĕk” Kră Yang (trong 6), jơ ‘noh hloi pơtao tơjur akâu ‘bơ̆t anăp Kră Yang, tơbral, krao khan apĭnh Kră Yang mơnat păng dŏng pơklaih. Kơplah pơtao Manase krao khan apĭnh Kră Yang na “ Sư tơl tơwih nơ̆r Manase apĭnh păng mơ̆ng nơ̆r sư krao” (trong 13 BTTHĐ). Kră Yang pơm tơpă, yơ̆r ti dŏng tơgŭm, ăn kơ pơtao wih brŏk tơ Jrusalem wơ̆t pơgơ̆r dêh Juđa, kơplah noh, pơtao Manase hlôh băt tơpă Yêhôwa bơih Kră Yang ‘Bok Kei-Dei, Sư bơih Kră Yang ‘Bok Kei-Dei kơ đĭ đăng pơtao, minh Sư đĕch dŏng pơklaih pơtao păng mơ̆ng nơ̆r sư krao khan đơ̆ng lăm hnam phak tơ dêh char nai.
Kơplah tơdrong gleh truh pơmat-tat, đe nai ngăl đei lăm jơhngơ̆m ‘bar tơdrong, dah rai arăng kơ̆l hloh, thoi pơtao Ahas, ‘bok gah ‘bă pơtao Manase, Sơ̆p hla bơar Nơ̆r Kră Yang tơbăt “ Lăm kơplah đei tơdrong truh pơmat-tat, Ahas rai pơm yoch hăm Kră Yang” (II Hơ’mon 28: 22). Dah tơbral thoi pơtao Manase “ Lăm kơplah đei tơdrong truh pơmat-tat ” pơtao tơbral, đĭ jơhngơ̆m “ tơ jur akâu tơbral tơpă ‘bơ̆t anăp Kră Yang ‘Bok Kei-Dei lu ‘bok sư.” (II Hơ’mon 33: 12). Gơnang, pơtao Manase đei Kră Yang mơnat ăn păng tơiung dơ̆ng, na pơtao Ahas ưh kơ đei đơ̆ng Kră Yang dŏng pơklaih.
Kră Yang gơh yua tơdrong truh pơmat-tat wă kơ pơm tơ hiong tơdrong mă lu bơ̆n ‘mêm dêh, tơdrong mă lu bơ̆n lăng trŏ lăp lăm tơdrong arih kơdih, wă kơ lu bơ̆n ‘blŏk dơ̆ng, achăng tŭk tơdrong pơ-ang, arăng kơ̆l, dah mă tơdrong kiơ nai pơm kơ ‘Bok Kei-Dei ưh kơ lăp đon. Kơplah đei tơdrong truh gleh glăn, pơmat-tat. Kơplah hiong đĭ lơ tơdrong, đe nai ngăl ‘bônh kơ băt mơn tôm tơdrong bơ̆n đei noh đơ̆ng Kră Yang păng đơ̆ng Sư ăn ngăl. Dah Kră Yang wă Sư iŏk đĭ tôm tơdrong thoi ‘bok Jop khan: “ Kră Yang asong ăn, Kră Yang pơdrâu iŏk dơ̆ng; trŏ bơnê kơ anăn Kră Yang!” (Jop 1: 21 BTTHĐ). Kơplah lu bơ̆n tơ’bơ̆p lơ tơdrong gleh truh lăm tơdrong jang sa, lăm tơdrong arih v.v… thoi noh bơih na lu bơ̆n kăl kơ đei Kră Yang hloh kơ đĭ đăng. Lu bơ̆n gô ‘bôh kơdih pă gơh gơnang kơ tơdrong kiơ nai dah dôm tơdrong kiơ lĕch đơ̆ng teh đak âu mă-lei mĭnh Kră Yang đĕch trŏ kơ lu bơ̆n lui gơnang hloh. Yua kơ thoi noh, kơplah tơ’bơ̆p tơdrong pơlong, gleh glăn, apĭnh lu bơ̆n ‘nĕ kơ arăng kơ̆l, mă-lei băt adrĭ đĭ jơhngơ̆m tơjur akâu kơdih ‘bơ̆t anăp Kră Yang păng krao apinh Sư.
Kơkuh kơ Ih, ơ Kră Yang lăm tơdrong truh gleh glăn Ih drơ̆ng ăn tơdrong truh kơ inh, apinh Ih tơgŭm inh băt tơjur akâu kơdih, tơbral păng krao apĭnh Ih, yua kơ mĭnh Ih đĕch Tơ’ngla mơ̆ng tơl tơwih nơ̆r krao apinh păng dŏng pơklaih inh, krao khan yua anăn Kră Yang Yêsu Krist. Amen.
Lu bơ̆n hăm tơjur akâu kơdih krao apinh Kră Yang kơplah tơ’bơ̆p tơdrong truh pơmat-tat?
Đŏk sơ̆p hla bơar nơ̆r ‘Bok Kei-Dei lăm pêng sơnăm: II Hơ’mon 16
Kênh Youtube BHKTHN:
