Êphêsô 6:10-20
“Păng bơ̆n ‘nĕ hiơt krao khan kơ ‘Bok Kei-Dei, wă kơ bơ̆n hưch-hanh kơ tơdrong krao khan ling lang, gô mơ̆ng kơ Yang Bơhngol ‘Lơ̆ng wă kơ bơ̆n krao khan tơdrong kiơ, krao khan tơgŭm băl tơduă lu kon ‘Bok Kei-Dei dah krao khan kơ tơdrong kiơ nai.” (Êphêsô 6:18)
Nơ̆r jet tơchĕng pơwao:
– Khul bơngai lui athei kăl pơm kiơ wă kơ kĕ jei lăm chăl arih gah bơhngol?
– Yua kơ kiơ athei krao khan kơ đĭ đăng bơngai lui?
– Lu bơ̆n athei krao khan tơgŭm dih băl thoi yơ?
Lăm Êphêsô 6:10-18, ‘Bok Pôl roi ăn kơ Khul Bơngai Lui băt, bơngai lui kơ Yêsu Krist dang oei lăm tơblah gah bơhngol hăm yang satan, thoi noh na athei krăng hơmet “tơmam tơblah đơ̆ng ‘Bok Kei-Dei”. Sư yua thoi rup Linh bơngai Rôm wă roi tơ’bôh tơm jơhngơ̆m pran gah bơhngol ‘măn ăn kơ Khul Bơngai Lui lăm tơdrong tơblah hăm jơhngơ̆m tơdrong kơnê̆ lăm teh đak. Khul linh Krist athei gơnang kơ jơhngơ̆m pran păng tơmam tơblah đơ̆ng Kră Yang ‘Bok Kei-Dei wă kơ kĕ dơ̆ng kơjăp lăm đon lui păng tơgar iŏk kĕ jei tuch luch. Kơplah “tơmam tơblah” tơgŭm lu bơ̆n bơwei păng năm blah ayăt, lei na “jơhngơ̆m pran” wă kơ lu bơ̆n yua tơmam gơh yua.
Jơhngơ̆m pran đơ̆ng Kră Yang đei ăn kơ lu bơ̆n noh đơ̆ng Yang Bơhngol ‘Lơ̆ng kơplah bơ̆n krao khan (trong 18). Kơplah bơ̆n yua nơ̆r “mă krao khan tơdrong kiơ” “oei kơjăp lăm tôm tơdrong”, “đĭ đăng bơngai lui”, Sư wă kơ đĭ đăng Bơngai lui athei krao khan mă kơplah hơyơ, gah dôm tơdrong păng rim ‘nu bơngai. Yua kơ kiơ athei krao khan kơ “đĭ đăng bơngai lui?” Lăm tơdrong tơblah gah sĕch akar kư̆m thoi gah bơhngol, lu linh ưh kơ sĭ tơblah kơdrô̆ minh ‘nu, mălei ling lang tơblah hăm minh khul linh, wang tơgŭm dih băl wă kơ kĕ jei. Sơ̆p Hla bơar ‘Bok Kei-Dei bơtho lu bơ̆n akâu jăn jơ̆ akâu jăn ‘Bok Krist, rim ‘nu lu chăl lăm akâu jăn, đei tơdrong tơgŭm dih băl lăm akâu jăn Kră Yang (I Kôrintô 12:12-27). Yua kơ thoi noh, krao khan tơgŭm băl jơ̆ minh tơdrong kăl dêh. Kơdih Kră Yang Yêsu kư̆m krao khan tơgŭm ‘bok Pêtrôs wă kơ sư oei dơ̆ng kơjăp lăm đon lui, kĕ hlôi đơ̆ng tơdrong pơlong păng pơlung tơiung bơngai nai (Luka 22:31-32). Yang Bơhngol ‘Lơ̆ng păng Kră Yang Yêsu Krist dang ei oei krao khan ăn kơ đĭ đăng lu bơ̆n (Rôm 8:26, 34). Yua kơ thoi noh, ‘Bok Pôl krao pơtơm lu bơ̆n krao khan ưh kơ sĭ krao khan kơ Khul bơngai lui lăm pơlei đĕch, mălei krao khan tơgŭm “đĭ đăng Khul bơngai lui”. Kơdih kâu sư kư̆m kăl kơ Khul bơngai lui krao khan tơgŭm sư (trong 19). Sư đei pơma tơpă hăm lu kon pơlei Kră Yang tơ Têsalônik khan: “Inh wă kơ iĕm krao khan tơgŭm inh hai mơ̆n.” (I Têsalônik 2:25). Athei chơ̆n jơhngơ̆m, kơchăng, krao khan tang ăn kơ đĭ đăng bơngai lui, ‘noh jơ̆ minh tơdrong kăl dêh (trong 18).
Dang ei, rim ‘nu Bơngai lui dang ei oei lăm tơdrong tơblah gah bơhgnol, kon pơlei Kră Yang athei ‘blŏk tơtăm kơ rim bơngai wă kơ krao khan tơgŭm dih băl ling lang. Lu bơ̆n kư̆m kăl kơ krao khan mă hơđăl tơdrong kiơ, ăn kơ rim ‘nu bơngai, lăm rim tơdrong truh, hăm pơm kiơ̆ thoi jơhngơ̆m ‘nhŏng oh hơpơi wă, wă kơ gơh đei pŭn hiôk, gơh klaih, wei lăng gơh klaih… Hăm tơdrong krao khan tơgŭm ‘nhŏng oh lu bơ̆n lăm đon lui, lu bơ̆n tơgŭm dih băl lăm tơdrong tơblah gah bơhngol, pơm tơ’bôh tơdrong ‘mêm mơnat, pôm đon wă kơ lu bơ̆n tơblah gơh kĕ jei.
Ơ ‘Bă mă ‘mêm kơeng! Apinh Ih tơgŭm inh păng đĭ đăng ‘nhŏng oh bơngai lui wă kơ ling lang krao khan tơgŭm dih băl wă kơ rim ‘nu đei Kră Yang chông anhăk, ăn jơhngơ̆m pran, bơwei, păng kư̆m wăng kĕ jei lăm tơdrong tơblah gah bơhngol âu. Yua anăn Kră Yang Yêsu Krist, Amen.
Lu bơ̆n hăm ‘blŏk tơtăm krao khan dih băl ưh?
Đŏk Sơ̆p Hla bơar ‘Bok Kei-Dei lăm pêng sơnăm: II Hơ’mon 7
Kênh Youtube BHKTHN:
