Mathiơ 21:18-19
“Thoi noh na Inh wă roi kơ iĕm mă nhên dơ̆ng: Inh thoi lĕ kơ tơm ‘long, iĕm thoi lĕ kơ dơng, tơ’bla, sơdrai. Bơngai bu oei kơjăp lăm Inh, Inh oei lăm sư mơ̆n, bơngai ‘noh sư gô đei plei trem. Dah ưh kơ đei Inh, iĕm ưh kơ gơh pơm kiơ ôh.” (Yôhan 15:5)
Nơ̆r jet tơchĕng pơwao:
– Pơge năr đơ̆ng rŏng kơplah oei rok trong wă mơ̆t tơ pơlei Jêrusalem, Kră Yang ‘bôh minh tơnơm ‘long hơra thoi yơ?
– Yua kơ kiơ Kră Yang sơkat kơ ‘long hơra noh khan “Đơ̆ng âu tơ anăp e ‘nĕ pă plei dơ̆ng”?
– Dang ei, Kră Yang hơpơi kơ khul bơngai lui kơ Sư păng rim ‘nu bơ̆n tơdrong kiơ?
Đang kơ pơdơh kơmăng tơ Bethani, pơge năr đơ̆ng rŏng Kră Yang Yêsu năm dơ̆ng tơ pơlei Jêrusalem, na Sư pơngot ‘bôh minh tơnơm ‘long hơra ‘bơ̆t cheng trong đei pôm hla đĕch, Kră Yang hơmĕng ngeh kơ đei plei wă sa yua kơ hmă sư ‘long hơra đei plei adrol na chăt hla, mălei sư năm jê̆ ‘bôh pôm hla đĕch. Mă khan ưh kơ trŏ bơyan hơra plei mălei ‘long hơra đei hla, na tam mă đei plei noh pha ‘biơ̆. Kră Yang Yêsu sơkat kơ ‘long hơra “đơ̆ng âu tơ anăp e ‘nĕ pă đei dơ̆ng! sĭt tơpă tơnơm ‘long hơra ‘noh kro lôch hloi (trong 19).
Tơdrong ‘long hơra ‘nâu đei hla mălei ưh kơ đei plei ‘noh bơih tơdrong lu kon pơlei chăl Kră Yang Yêsu sơ̆. Sư ưh kơ lăp đon ôh tơdrong hơlĕnh thoi ‘long hơra gah ‘nguaih đei ‘bĕnh kơ hla mălei ưh kơ đei plei. Kon pơlei Isơrael ưh kơ pran gah bơhngol mă khan gah ‘nguaih lu sư adrin păng pơyom kơ tơdrong lui ră, lu sư đei hnam akŭm Jêrusalem pơhrôp ‘lơ̆ng dêh rŏ đei lơ bơngai năm akŭm rim sơnăm. Nơ̆r Kră Yang sơkat “Đơ̆ng âu tơ anăp e ‘nĕ pă plei” đei ‘bôh hloi tơpă lăm sơnăm 70 ĐK. Kơplah bơngai Rôm tơgar iŏk pơlei tih păng hnam akŭm Jêrusalem, kơplah ‘noh sơ̆ kon pơlei Isơrael hiong teh đak păng hiong hnam akŭm dang ‘bar rơbâu sơnăm.
Kră Yang Yêsu kư̆m hơpơi wă kơ “đei plei” lăm khul bơngai lui kơ Kră Yang păng rim kon Kră Yang dang ei kư̆m lei lăi. Kră Yang kư̆m hơpơi tơdrong, “yua kơ ‘Bok Kei-Dei huai iŏk bơ̆n păng tơmam gĭt Sư tơpă. Thoi noh na bơ̆n dah pơyơ̆r bĕ akâu bơ̆n kơ Sư wă pơư pơang anăn Sư.” (I Kôrintô 6:20). Kră Yang ưh kơ lăp đon kơ bơ̆n gah ‘nguaih pơma pơkă pơkăm mălei gah bơhngol ưh kơ đei plei ăn kơ Sư. Lăm Yôhan 15:2, Kră Yang Yêsu bơtho gah tơdrong ‘nâu, “Na dôm lu bơngai lui kơ Inh thoi lĕ dơng tơ’bla, sơdrai mă chăt đơ̆ng Inh. Dơng mơ’nah ưh kơ đei plei, ‘Bă Inh chre tŭk …” yua kơ kiơ mưh ưh kơ đei plei, bơ̆n gô đei tơdrong phak trăp thoi noh? Bơ̆n ưh kơ hiơ̆k kơ tơdrong Kră Yang mơnat ăn, ưh kơ đei pơm kiơ̆ tôm tơdrong Kră Yang kơnhăm lăm chăl arih bơ̆n păng pơm pơ’brơh ‘mê̆ ‘mach Anăn Kră Yang. Dah tơdrong arih ưh kơ đei plei ăn kơ Kră Yang bơ̆n oei lăm tơdrong dơnuh kơ’bah gah bơhngol, bơ̆n dang hrŭk ao bơngai lui ‘lơ̆ng rŏ mălei tơdrong arih gah lăm bơhngol hrĕng kro dêh. Kră Yang bơtho ““Thoi noh na Inh wă roi kơ iĕm mă nhên dơ̆ng: Inh thoi lĕ kơ tơm ‘long, iĕm thoi lĕ kơ dơng, tơ’bla, sơdrai. Bơngai bu oei kơjăp lăm Inh, Inh oei lăm sư mơ̆n, bơngai ‘noh sư gô đei plei trem. Dah ưh kơ đei Inh, iĕm ưh kơ gơh pơm kiơ ôh.” (Yôhan 15:5). Kră Yang ling lang hơpơi Khul Bơngai Lui kơ Sư păng rim ‘nu kon Kră Yang athei arih đei plei ăn kơ Sư, yua kơ mưh ưh kơ đei plei, bơngai ‘noh oei gah ‘nguaih Kră Yang!
Ơ Kră Yang, apinh Ih tơgŭm ăn kơ inh ling lang arih lăm Kră Yang wă arih đei plei kơ Ih, apinh Ih dŏng inh klaih đơ̆ng tơdrong arih hơlĕnh, arih ưh kơ đei plei ăn kơ Kră Yang na đơ̆ng noh gô đei nơ̆r chrih trăp đơ̆ng Ih. Yua anăn Kră Yang Yêsu Krist, Amen.
Tơdrong arih gah bơhngol bơ̆n hăm đei plei ăn kơ Kră Yang ưh?
Inh thoi tơ’bla sơdrai
Pơklep ‘bơ̆t tơm ‘long tih, Ih pơm wơ̆ pran
Tơdrong arih inh gơh tơpŭ ming ‘nao
Rai đei plei, hơdah Anăn ‘Bok Kei-Dei
Đŏk Sơ̆p Hla bơar ‘Bok Kei-Dei lăm pêng sơnăm: I Pêtrôs 5
Kênh Youtube BHKTHN:
