Klei Aê Diê Blŭ: Klei Bi Hriêng 24:23-25
Êlan kliăng: “Leh anăn amâo djŏ hĕ Aê Diê srăng mkra brei bi kpă kđi kơ phung Ñu ruah leh, phung krao kwưh kơ Ñu hruê mlam? Ñu srăng bi kdung hruê đru digơ̆ mơ̆? Kâo hưn kơ diih, Ñu srăng mkra brei bi kpă kđi kơ digơ̆ djăl.” (Y-Luk 18:7-8a)
Klei êmuh ksiêm mĭn: Boh tŭ bruă phat kđi bi kpă bi hmăi kơ klei pô? Si boh jhat mơ̆ng klei phat kđi dôk tĭng sa nah? Ya klei tŭ dưn tơdah phung ƀuôn sang Aê Diê phat kđi bi kpă?
Leh mtô anak brei mpŭ kơ phung mâo klei dưi, Mtao Salômôn mñă kơ anak hlăm bruă klam gĭt gai brei phat kđi bi kpă (êlan 23-25). Pô phat kđi brei thâo klei dưi diñu mâo jing mơ̆ng Aê Diê brei, leh anăn diñu pô ăt srăng tŭ klei Aê Diê phat kđi leh anăn mơ̆ng phung ƀuôn sang mơh. Kyua anăn, tơdah phat kđi kpă, jing brei kpă ênô leh anăn klă mngač. Mnuih mâo klei soh brei tŭ klei phat kđi, phung amâo mâo klei soh brei dưi mgang. Tơdah sang phat kđi amâo kpă hŏng sa čô mnuih, amâo djŏ knŏng tŭ klei pô anăn amâodah gŏ sang digơ̆ bi êmut ôh ƀiădah jih djuê ana srăng tăm pah. Hlăm bruă klam jing khua gĭt gai lăn čar, ya klei mtao phat kđi amâo kpă ăt srăng ngă kơ ala čar mkăn bi êmut, tlao mưč msĕ mơh. Boh blŭ “tăm pah” hlăm êlan 24 lač kơ mnuih tŭ klei arăng ktư̆ juă čang guôn Yêhôwa kpă ênô srăng ngă klei ƀuăn leh anăn bi kmhal pô phat kđi amâo kpă ênô. Bi phung khua phat kđi kpă ênô srăng ngă kơ ƀuôn sang mơak, leh anăn Aê Diê ăt srăng hơêč hmưi klei jăk mơak kơ digơ̆.
Hlăm klei bi hmô kơ klei phat kđi amâo kpă ênô, Khua Yang Yêsu bi mklă Aê Diê klă sĭt srăng bi mtlaih phung arăng ktư̆ juă djŏ mmông tơdah diñu krao kwưh hruê mlam, leh anăn Ñu srăng ruăt phat kđi bi kpă kơ digơ̆ (Y-Luk 18:7-8).
Jing anak Pô kpă ênô, hlăm djăp anôk Aê Diê mdưm, brei drei jih ai tiê kwưh akâo kơ Yang Mngăt Jăk ktrâo atăt, brei klei thâo mĭn čiăng mkra kđi bi kpă. Klei phat kđi brei dưm mơ̆ng tur knơ̆ng huĭ mpŭ kơ Aê Diê. Ñu srăng bi kmhal amâodah bi mni hlue si klei phat kđi mơ̆ng grăp čô drei. Brei hdơr nanao drei pô ăt srăng tŭ klei phat kđi hlăm hruê Khua Yang lŏ hriê, kyua anăn brei jih ai tiê wah lač, thâo răng hlăm djăp bruă Aê Diê jao. Amĭ ama brei phat kđi kpă ênô hŏng anak čô čiăng bi êdah klei kpă ênô mơ̆ng Aê Diê brei kơ anak. Pô gĭt gai phung Sang Aê Diê brei akâo kơ Yang Mngăt Jăk ktrâo atăt čiăng mâo klei bi mklă kpă ênô, klei khăp, kyua tơdah dôk sa tĭng nah srăng ba klei bi kah, mbha phung, leh anăn amâo dưi mkŏ mjing ôh asei mlei Yang Krist. Phung đăo tơdah mâo jao bruă klam phat kđi phung mkăn, brei klă mngač čiăng phat kđi kpă ênô, bi guh kơang Anăn Khua Yang. Mơ̆ng klei mkra kđi bi kpă mơ̆ng phung ƀuôn sang Aê Diê, amâo djŏ drei knŏng hrăm mbĭt bi đru mkŏ mjing gŏ sang phung đăo kơ Krist, phung Sang Aê Diê ôh, ƀiădah wăt lŏ đru bi êdah klei kpă ênô Aê Diê kơ hlei pô ka thâo kral Ñu.
Drei jih ai tiê đăo knang kơ Yang Mngăt Jăk leh anăn knang kơ Ñu čiăng mkra kđi bi kpă hlăm djăp boh klei mơ̆?
Wah lač: Ơ Ama, kâo bi mni kơ Ih khăp leh kơ kâo, tŭ klei djiê hrô brei klei soh kơ kâo. Akâo kơ Ih đru kâo mâo klei thâo mĭn, ai tiê doh čiăng mkra kđi bi kpă. Akâo kơ Khua Yang yua kâo bi êdah klei kpă ênô, doh jăk, klei khăp Khua Yang kơ grăp čô mnuih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Y-Pêtrôs 4
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
