Pajlug 24:23-25
Nqe cim:
“Vajtswv haivneeg uas niaj hnub niaj hmo thov Vajtswv pab, Vajtswv yuav tsis pab hais lawv zaj los? Vajtswv yuav tos ntev mam li pab lawv los? Kuv qhia rau nej hais tias, Vajtswv yeej yuav pab hais lawv zaj sai sai” (Lukas 18:7-8a)
Lus nug rau sawvdaws xav:
– Qhov uas txiav txim ncaj ncees cuam tshuam txog cov neeg twg?
– Nujnqis ntawm txiav txim tsis ncaj ncees yog dab tsi?
– Thaum Vajtswv cov menyuam txiav txim ncaj ncees, yuav muaj qabhau dabtsi?
Tom qab uas Xalumoos qhia menyuam yuavtsum hwm nomtswv tas lawm, nws rov qhia tej menyuam txog feem xyuam ntawm ib tug thawjcoj yog yuavtsum txiav txim ncaj ncees (nqe 23-25). Tus txiav txim yuav tsum zeem paub, yus lub meejmom yog tus uas tau Vajtswv pub muaj cai txiav txim rau lwm tus, yus kuj yuav raug Vajtswv thiab cov pejxeem txiav txim ib yam thiab. Vim li ntawd, thaum txiav txim yuav tsum txiav txim ncaj ncees, lub ntsiab yog yuav tsum ua ncaj muab qhov yog rau yog, qhov txhaum rau txhaum los ntawm lub siab dawbhuv. Tus neeg muaj txim yuav tsum raug rau txim, tus uas tsis muaj txim yuav tsum pab tiv thaiv. Thaum uas tus nom txiav txim tsis ncaj rau ib leejtwg, tsis yog nws raug tus neeg ntawd thiab tsev neeg ntxub xwb, tiamsis nws tseem yuav raug tej pejxeem ntxub thiab tsawmfoom nws huv tibsi. Hauv lub meejmom yog ib tug thawj kav ib lub tebchaws, tej uas vajntxwv txiav txim tsis ncaj yuav ua rau luag lwm lub tebchaws sab nraud saib tsis taus thiab thuam. Lo lus “foom” hauv nqe 24 qhia hais tias, tus uas raug txiav txim tsis ncaj yuav tos rawv tus Tswv uas ncaj ncees kev rau txim rau tus txiav txim tsis ncaj. Tiamsis, cov nomtswv uas txiav txim ncaj ncees tej pejxeem yuav zoo siab kawg li thiab Vajtswv kuj yuav foom koob hmoov rau lawv.
Hauv zaj lus pivtxwv txog tus nom tsis ncaj ncees, Tswv Yexus hais meej hais tias paub tseeb Vajtswv yeej yuav pab cawm lawv yog sijhawm thaum uas niaj hnub niaj hmo thov Vajtswv pab, Vajtswv yeej yuav pab hais lawv zaj sai sai (Lukas 18:7-8). Peb yog Vajtswv tus uas ncajncees cov menyuam, yog tau lub meejmom txiav txim rau lwm tus, yuav tsum tas siab thov Vaj Ntsujplig coj kev kom ua ncaj hauv kev txiav txim thiaj tsis raug lus foom phem. Txiav txim rau lwm tus yuav tsum nyob rau hauv txoj kev hwm Vajtswv. Vajtswv yuav muab nqi zog lossis yuav rau txim raws li peb txhua tus tau txiav txim rau lwm tus los lawm. Nco ntsoov hais tias, peb txhua tus kuj yuav raug txiav txim hnub uas Tswv Yexus rov qab los. Yog li ntawd, yuav tsum tas siab thov Vajtswv pab, xyuam xim rau tes haujlwm uas Vajtswv tau muab cob rau peb. Niam txiv yuav tsum txiav txim ncaj ncees rau menyuam, kom qhia tshwm Vajtswv kev ncaj ncees rau lawv. Tus thawj saib xyuas pawg ntseeg yuav tsum thov Vaj Ntsujplig coj kev kom muaj tej kev txiav txim siab ncaj ncees, muaj kev hlub, vim yog xaiv ntsejmuag tsis ncaj ncees yuav ua rau muaj kev sib cais, tawg ua pab ua pawg, thiab yuav txhim tsa tsis tau Yexus Khetos lub cev uas yog pawg ntseeg kom loj hlob. Ib tug ntseeg uas tau txais feem xyuas txiav txim rau lwm tus, yuav tsum txawj ntse, txiav txim ncaj ncees tsis xaiv ntsejmuag kom ua rau Vajtswv lub npe tau qhuas. Dhau ntawd. Kev txiav txim ncaj ncees tsis yog vim txhim kho pawg ntseeg lossis cov neeg ua txhaum xwb, tseem yog kev qhia tshwm Vajtswv tus uas ncaj ncees rau cov uas tsis tau paub Vajtswv thiab.
Thov Vajtswv,
Vajtswv, nyuam yaus uas Koj tsaug, vim Koj kev hlub thiaj tuag theej nyuam yaus lub txhoj. Thov pub nyuam yaus muaj kev txawj ntse, muaj lub siab dawbhuv, paub hwm Koj kom txiav txim ncaj ncees. Thov Koj siv nyuam yaus qhia tshwm Koj txoj kev ncaj ncees, kev dawbhuv, kev hlub rau lwm tus. Nyuam yaus tuav Tswv Yexus Khetos lub npe thov. Amees.
Peb puas vamkhom Vaj Ntsujplig coj kev kom txiav txim ncaj ncees rau txhua yam lawm?
Nyeem Vajluskub hauv peb lub xyoos: 1 Petus 4
Kênh Youtube BHKTHN:
