II Hơ’mon 32:20-23
“Năr inh krao apinh, lu ayăt kơ inh gô kơdŭn tơrŏng; Inh băt kơ tơdrong ‘nâu, Kră Yang ‘Bok Kei-Dei oei hơdai inh.” (Hơriso 56:9)
Nơ̆r jet tơchĕng pơwao:
– Pơtao Hesekia pơm tơdrong kiơ kơplah pơtao Asiri pơma kơnê̆ păng roi tơdrong ưh kơ trŏ?
– Kră Yang ‘Bok Kei-Dei đei dŏng kon pơlei pơla Juđa thoi yơ?
– Lu bơ̆n pơm thoi yơ kơ plah đei bơngai pơma kơnê̆ kơplah lu bơ̆n pơm kiơ̆ Nơ̆r ‘Bok Kei-Dei?
Kon pơlei Juđa jơ̆ lu bơngai Asiri blah iŏk, lu bơngai Asiri wă năm blah tơlăm pơlei Jêrusalem. Pơtao Senacherip đei yua tơdrong gơh hơgei pơma ưh kơ trŏ sư pơma pơang pơma blông kơ ‘Bok Kei-Dei păng pơma hơlĕnh hăm Kră Yang wă kơ kon pơlei pơla ưh pă đei đon lui na yơ̆r ti thuơ ưh pă tơblah. Hăm tơdrong thoi noh na pơtao Hesekia đei tŏk tơ hnam akŭm Kră Yang na iŏk kơ thơ đơ̆ng Asiri gơih noh dan ‘bơ̆t anăp Kră Yang păng krao khan apinh Kră Yang mơ̆ng hăm dôm tơdrong mă đêl pơtao Asiri pơma kơnê̆ kơ Kră Yang noh mơ̆n. Pơtao sư lui ngeh kơ Kră Yang ‘Bok Kei-Dei sư jơ̆ tơ ‘ngla arih ling lang, pha ra kơ dôm lu yang mă đe pơm păng ‘long dah tơmo mă pơtao Asiri đei pơrăm lê̆ đĭ bơih. Pơtao Hesekia krao pinh Kră Yang dŏng lu sư đơ̆ng pơtao Sanecherip, wă kơ đĭ đăng rim dêh char băt kơ minh Kră Yang Yêhôwa noh jơ̆ ‘Bok Kei-Dei (lăng thim II Lu Pơtao 19:14-19).
Kơplah pơtao Hesekia păng bơngai pơtruh nơ̆r ‘Bok Kei-Dei Êsai krao khan apinh ‘Bok Kei-Dei tơ kơpal plĕnh ti lăm tơdrong âu, Kră Yang Yêhôwa athei minh ‘nu linh jang ‘lơ̆ng pơlôch lê̆ đĭ lu bơngai linh pran,linh tih lăm lu bơngai Asiri. Kơplah đei ‘bôh lu linh sư ưh pă đei jơhngơ̆m pran wă tơblah na pơtao Asiri brŏk tơ pơlei sư kơ dih đei tơdrong mơlâu yua kơ sư đei pơma blông na ưh kơ đei gơh pơm kiơ kơ pơlei Jêrusalem. Ưh kơ minh tơdrong mơlâu đĕch ôh pơtao Sanecherip đei tơdrong phak đơ̆ng Kră Yang ‘Bok Kei-Dei kơplah sư mơ̆t tơlăm hnam akŭm yang sư kơdih na lu kon sư kơdih pơlôch hăm đao. Bơngai pơma blông kơ ‘Bok Kei-Dei păng đei pơjăm Kră Yang ‘Bok Kei-Dei ưh kơ gơh wă dŏng lu kon pơlei pơla sư kơdih na tơplơ̆ kơ ‘noh yang ưh kơ tơpă ưh kơ gơh dŏng pơtao Sanecherip!
Thoi noh, Kră Yang ‘Bok Kei-Dei dŏng pơklaih pơtao Hesekia păng kon pơlei pơla Jêrusalem đơ̆ng tơpang ti pơtao Asiri păng dôm lu bơngai ayăt nai; Kră Yang đei tơ’bôh Sư jơ̆ Kră Yang ‘Bok Kei-Dei yua kơ tơdrong sư trŏ kơ ư-ang. Pơtao Hesekia đei tơdrong ư-ang ưh kơ đei bu kĕ blah sư dơ̆ng “đơ̆ng jơ noh tơ rŏng, sư đei pôk pơ-ư bơ̆t anăp lu teh đak nai” (trong 23).
Dang ei yang kơnê̆ kŭm yua dôm tơdrong wă blah lu kon ‘Bok Kei-Dei nhen thoi sư đei wă blah pơtao Hesekia păng lu bơngai Juđa noh sơ̆. Lu sư đei lơ pơma blông kơ ‘Bok Kei-Dei, pơma kơnê̆, pơma ưh kơ trŏ wă pơm kơ bơ̆n đei tơdrong ngĭl ngŭl lăm đon lui. Pơhrăm đơ̆ng kơmĭl pơtao Hesekia păng Êsai, lu bơ̆n ưh kơ hli tơrơ, ưh kơ bơ̆l hăl yua kơ bơ̆n băt tơ’ngla oei hơdai bơ̆n pran hloh kơ lu yang kơnê̆, lu bơ̆n ưh kơ wă pơma pơjah hăm yang kơnê̆ ôh mă lei bơ̆n dan dôm tơdrong hơnat bơ̆n kơ ‘Bok Kei-Dei păng chang gô Sư wă bơ̆jang. Apinh Kră Yang ăn kơ bơ̆n bơwei đon lui lăm Kră Yang hăm tơdrong kơjăp ‘lơ̆ng nhen thoi pơtao Đa-wĭt: “Năr inh krao apinh, lu ayăt kơ inh gô kơdŭn tơ rŏng; Inh băt kơ tơdrong ‘nâu, Kră Yang ‘Bok Kei-Dei oei hơdai inh.” (Hơriso 56:9)
Ơ Kră Yang, kơplah đe đei pơma tơ an kơ inh, apinh ih tơgŭm inh oei ling lang krao khan kơ Ih ling lang mă khan ưh tam mă ‘bôh tơdrong Ih tơl thoi yơ. Apinh Ih nĕ ăn kơ inh hơmet tơdrong kơdih mă lei pơjao kơ Ih dôm tơdrong lăm tơpang ti Kră Yang mơsêh tăp pang mơyang tăp dăr. Yua anăn Kră Yang Yêsu Krist. Amen
Lu bơ̆n pơm thoi yơ kơplah đe đei chă tơdrong păng pơma kơnê̆?
Mă lu ayăt đei wang kơ inh tăp dăr
Tơnăp lăm tơdrong krao khan măng năr ưh kơ pơdơh
Jơhngơ̆m ling lang gơnang lăm tơdrong kơjăp
Chang gô tơdrong Kră Yang wă lăm chăl arih
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: I Pêtrôs 3
Kênh Youtube BHKTHN:
