II Hơ’mon 32:9-20
“Kră Yang ‘Bok Kei-Dei jơ̆ anih kơ’nơp păng tơdrong pran kơtang lu nhôn. Sư gôa tơgŭm hloi ‘bơ̆t năr anat anot. Thoi noh, na lu nhôn huay kơ hli mă teh tơplih. Kông pơpơ̆ păng huŏng tơ lăm đak dơsĭ.” (Hơriso 46:1-2)
Nơ̆r jet tơchĕng pơwao:
– Kơplah băt kơ wă bơwang, pơtao Hesekia chă đon thoi thoi yơ wă kơ gơh bơwei kơdih?
– Pơtao pơtrut lu yŏng pơgơ̆r păng kon pơlei thoi yơ?
– Kơplah tơ’bơ̆p tơdrong anat, lu bơ̆n đei thoi yơ đơ̆ng Nơ̆r Kră Yang?
Senacherip pơtao Asiri kơplah wang pơlei Lakis jê̆ Jêrusalem, đei wơh lu đĭch đam sư năm pơma tơ hli kon pơlei Juđa tơ Jêrusalem wă kơ kon pơlei hli tơrơ jing ưh kơ pơ̆n, pơtao Sancherip năm khan hăm nơ̆r jet “Lu iĕm gơnang kơ tơdrong kiơ, mă oei pơjăng pơlei Jêrusalem mă nhôn wang tăp boih thoi noh!” (trong 10 BTTHĐ). Lu iĕm ưh kơ băt hă mă dôm tơdrong đơ̆ng pơtao Asiri đei pơm ăn kơ dêh char nai, păng lu yang ayơ mă dŏng pơklaih lu sư đơ̆ng ti pơtao Asiri? Thoi noh ‘nĕ kơ lui ngeh, ‘nĕ kơ mơ̆ng nơ̆r pơma hơlĕnh chông anhăk đơ̆ng pơtao Hêsekia yua kơ thoi yơ ‘Bok Kei-Dei kon Pơlei Juđa gơh dŏng pơklaih lu sư, lu yŏng linh kang pơma kơnê̆ kơ Kră Yang ‘Bok Kei-Dei păng ayăt kơ Hesekia đĭch đam sư, đơ̆ng rŏng kơ noh, pơtao Senacherip chih hla bơar pơjăm Kră Yang Yêhôwa păng khan Lu yang lăm dêh char nai ưh kơ kĕ dŏng pơklaih kon pơlei char lu sư đơ̆ng ti inh kư̆m lei-lăi mơ̆n Kră Yang ‘Bok Kei-Dei Hesekia kư̆m ưh kơkĕ pơklaih kon pơlei sư đơ̆ng ti inh. Pơtao athei lu đĭch đam sư ôr tơkĕch re hăm nơ̆r Hêbrơ khan kơ lu kon pơlei Jêrusalem oei tơ kơpal dur pơlei kơtơ̆ng, wă kơ lu sư hli tơrơ. Lu sư khan kơ Kră Yang ‘Bok Kei-Dei pơlei Jêrusalem thoi lu yang kon pơlei đơ̆ng ti kon bơngai pơm. Pơtao Senacherip chă trong hơlĕnh pơdăr lăm pêng tơdrong: yua nơ̆r pơma jet wă pơm ăn jing ưh kơ ngeh, chih hla bơar wă tơhli, pơm kơ jơhngơ̆m kon pơlei kơdŭn wă kơ lu sư hli păng ưh kơ pơ̆n, pơtao blah lăm jơhngơ̆m lu bơngai Juđa mă oei lui tơpă kơ ‘Bok Kei-Dei. Tơ’ngla mă lu sư lui gơnang, yua nơ̆r pơma hơlĕnh khan tơdrong mơsêh ‘Bok Kei-Dei oei gơh pơtŏ pơting hăm lu yang nai.
Wă kơ gơh pơjăng, pơtao Hesekia Păng Êsai ‘bok khan lê̆ adrol “krao khan kơ tơdrong ‘nâu, krao khan ôr tŏk truh tơ plĕnh” (trong 20 BTTHĐ). Tơ’bơ̆p hăm tơdrong pơtao Asiri pơma pơjăm, ‘bar ‘nu đĭch đam Kră Yang jang tơnăp gơnang kơ ‘Bok Kei-Dei, lăng tơ Kră Yang păng krao khan apĭnh Sư dŏng pơklaih.
Tơdrong mă yang kơnê̆ chă trong pơm kơ lu bơ̆n ưh kơ lui ngeh, hli tơ rơ păng hiong đon lui kơ Kră Yang, mă loi hloh kơplah đei tơdrong gleh anat, Pôl Jơ̆ng ‘Bang Kră Yang đei tơ’blŏk, Tơdrong noh ưh kơ sĭ tơblah tơduă bơ̆n kon bơngai ôh, bơ̆n tơblah hăm lu yŏng yang kơnê̆, (Êphêsô 6: 12). Yang kơnê̆ pơhlŭ lu bơ̆n lui Kră Yang ưh kơ đei dŏng pơklaih, sư jao iĕm pơngot rơhing na lôch dah kiơ? (trong 11). Phŏ lu sư kư̆m rei tơdrong ưh kơ lui ngeh khan Kră Yang ưh kơ đei tơdrong mơsêh păng Kră Yang ưh kơ đei tơpă! kon pơlei Kră Yang ‘nĕ kơ mơ̆ng nơ̆r yang kơnê̆ “yua kơ sư ưh kơ layơ pơm tơpăt. Sư hơlĕnh ling lang. Sư pơm yŏng pơjing gah tơdrong hơlĕnh.” (Yôhan 8:44). Athei đĭ jơhngơ̆m lui gơnang kơ Kră Yang, lăng tơ Sư, krao khan păng Sư yua kơ kơnăl ‘Bok Kei-Dei Tơ’ngla đei tơpă, mơsêh păng ‘mêm mơnat ling lang oei hơdai lu bơ̆n.
Kơkuh kơ Ih, ơ Kră Yang apinh tơgŭm inh pơ̆n nuih tơl tơwih hăm tơdrong ala teh păng yang kơnê̆ mă khan tơdrong gleh anat thoi yơ hĭ inh oei lui kơ Ih đĕch krao khan yua anăn Kră Yang Yêsu Krist. Amen.
Hăm đei lai yơ lu bơ̆n ưh kơ gan lui ngeh gah tơdrong mơsêh păng tơdrong ‘mêm Kră Yang?
‘Nĕ kơ mơ̆ng Satan chă đon hơlĕnh
Ưh kơ lui ngeh, hli tơrơ, ưh kơ đơ̆ng rim năr
Ơ Kră Yang inh lui gơnang kơ Ih
Ih bơih Tơ’ngla ‘lơ̆ng tơpăt, Tơ’ngla mơsêh mơyang
Đŏk Sơ̆p hla bơar nơ̆r ‘Bok Kei-Dei lăm pêng sơnăm: I Pêtrôs 2
Kênh Youtube BHKTHN:
