Rôm 16:17-20
“Ơ ‘nhŏng oh, iĕm athei kơchăng hli kơ iĕm lui jrok kiơ̆ lu bơngai lui ưh kơ tat, hli kơ iĕm achăng lê̆ tơdrong lui tơpăt mă đe juăt kơ bơtho; na iĕm athei weh ‘biơ̆ đơ̆ng lu sư. Lu sư wă pơrăm lu bơngai lui bơ̆n, chă pơjah pơjăng păng bơ̆n.” (Rôm 16:17)
Nơ̆r jet tơchĕng pơwao:
– ‘Bok Pôl pơkă khan kơ lu bơngai lui tơ Rôm tơdrong kiơ?
– Pơm thoi yơ wă kơ băt kơnăl lu bơngai wă pơrăm lu bơngai lui bơ̆n?
– Tơdrong kiơ tơgŭm bơ̆n bơwei tơdrong pôm đon lăm khul bơngai lui?
Đơ̆ng rŏng kơ pơih nơ̆r pơma, ‘bok Pôl tơ’bôh tơdrong sư hiơ̆k tơchĕng kơ tơdrong arih gah bơhngol lu bơngai lui tơ pơlei Rôm. Sư đĭ jơhngơ̆m pơkă khan kơ khul bơngai lui athei kơchăng hli kơ lui jrok kiơ̆ lu bơngai ưh kơ tat na jing achăng lê̆ tơdrong lui tơpăt mă đe juăt kơ bơtho, na athei weh wer ‘biơ̆ đơ̆ng lu sư. Lu bơngai ‘nâu khan anăn bơngai lui mơ̆t hơdai hăm lu bơngai lui, mă lu sư bơngai bơtho, mălei bơngai bơtho hơlĕnh, bơtho tơdrong chroih tơ nai. Mă lu sư tơ’bôh tơpă thoi yơ hĭ. Khul bơngai lui kư̆m băt kơnăl kơ lu sư đơ̆ng dôm tơdrong âu: Hlôh băt nơ̆r ‘Bok Kei-Dei lơ mălei lu sư ưh kơ bơ̆jang kơ ‘Bok Krist mă lu sư bơ̆jang kơ hơlŏng klak lu sư kơdih, wă khan chă tơdrong lơi yua kơdih đĕch. Lu sư bơtho nơ̆r ‘Bok Kei-Dei hơgei mălei ưh kơ pơm kiơ̆. Lu sư hiơ̆k kơ akâu sư kơdih đĕch, wă kơ đe ư-ang, ‘maih wă pơgơ̆r lu bơngai kiơ̆ sư. Bơngai lui athei kơchăng kơ tơdrong bơtho ưh kơ trŏ đơ̆ng lu bơngai hơlĕnh khan sư pơtruh nơ̆r ‘Bok Kei-Dei păng lu bơngai kơnê̆ pơm kơ khul bơngai lui tơklah tơklang (Mathiơ 7:15). Lu bơngai ‘nâu ngăl dui bơngai lui hăm nơ̆r pơma pơ’ngam, pôk pơ-ư wă kơ kon bơngai lăp đon mălei lu sư kơnhăm ‘noh jơ̆ dui iŏk lu bơngai lui oei rơdu păng tam gan hlôh tơdrong ‘Bok Kei-Dei wă tơklah đơ̆ng khul bơngai lui. ‘Bok Pôl hiôk chơt păng bơnê kơ khul bơngai lui tơ pơlei Rôm đe ang lu sư gah tơdrong chu yom. Sư hơpơi khan lu sư đei tơdrong gơh hơgei wă kơ arih kiơ̆ nơ̆r ‘Bok Kei-Dei: Băt kơnăl tơdrong ‘lơ̆ng wă pơm kiơ̆ păng tơdrong kơnê̆ wă weh wer (trong 19). Tơdra bơngai lui tơpă ‘noh pơjing tơiung khul bơngai lui hăm tơdrong ‘mêm mơnat, pôm đon, băt kơ klah asong băl, tưk tơiung păng tơgŭm băl jing bơngai wơ̆ tôch tơ̆l thoi Kră Yang Yêsu, păng Kră Yang ‘Bok Kei-Dei hiôk hian gô tơgŭm jơhngơ̆m pran wă kơ kon pơlei Kră Yang kĕ jei hăm yang kơnê̆ păng arih kiơ̆ thoi Kră Yang lăp đon (trong 20).
Tơdrong lu bơngai bơtho hơlĕnh, bơngai pơm khul kơdih oei chur mơ̆t lăm khul bơngai lui dang ei. Wă kơ băt hơđăl păng weh ataih đơ̆ng lu sư, bơ̆n kăl kơ pơhrăm nơ̆r ‘Bok Kei-Dei rim năr. Kơplah mơ̆ng tơdrong bơtho, đŏk hla bơar, bơ̆n athei rok kiơ̆ lu bơngai lui tơ pơlei Bêrê, lu sư mơ̆ng tơpă wă hơlen păng lăng Sơ̆p Hla bơar ‘Bok Kei-Dei wă kơ băt hăm trŏ thoi nơ̆r ‘Bok Kei-Dei ưh: “Lu bơngai pơlei Bêrê ưh kơ sĭ thoi bơngai pơlei Têsalônik ôh. Lu sư wă mơ̆ng kơchăng tơpă. Rim năr lu sư lăng Sơ̆p hla bơar ‘Bok Kei-Dei wă kơ băt tơdrong Pôl bơtho tơpă dah ưh? (Tơdrong jang 17:11). Tơdah ưh, hli kơ bơ̆n ‘bônh kơ puh kơ đe pơhlŭ hăm dôm nơ̆r pơma hiôk rơngơp, nơ̆r pơkă pơ’ngam kiơ̆ kơ sĕch akar kon bơngai ‘maih wă. Bơngai lui athei pơnam kơ pơhrăm păng hơlen nơ̆r Kră Yang, chĕp kơjăp tơdrong ‘lơ̆ng tơpăt ‘Bok Kei-Dei na huay kơ puh kơ đe pơhlŭ pơlung.
Ơ Kră Yang, inh oei arih lăm năr mă hơtuch ‘nâu đei lơ bơngai bơtho hơlĕnh. Bơngai bơtho ưh kơ tơpă, lu sư pơm thoi triu, chur mơ̆t lăm khul bơngai lui wă kơ tơklah dih băl. Apinh Kră Yang ăn kơ inh kơchăng wă kơ băt kơnăl, păng pơnam pơhrăm nơ̆r Kră Yang wă kơ gơh hơgei na weh ataih đơ̆ng lu bơngai ‘noh. Yua anăn Kră Yang Yêsu Krist, Amen.
Tơdrong kiơ oei wă pơrăm tơdrong pôm đon lăm khul bơngai lui bơ̆n păng bơ̆n athei pơjăng thoi yơ?
Lăm năr wă jê̆ tôch hli dêh
Hơlĕnh, pơdăr, ‘bĕnh ‘bang kơ teh đak
Khŏm lăng nơ̆r Kră Yang mă nhen
‘Nhŏng oh pôm đon, kơjăp đon lui
Đŏk Sơ̆p Hla bơar ‘Bok Kei-Dei lăm pêng sơnăm: Tơdrong Pơđơ̆k 26
Kênh Youtube BHKTHN:
