Klei Aê Diê Blŭ: Rôm 16:17-20
Êlan kliăng: “Ơ phung ayŏng adei, kâo kwưh kơ diih, răng bĕ kơ phung ngă klei bi kah mbha leh anăn klei bi dleh, bi kdơ̆ng hŏng mta klei đăo diih hriăm leh. Ñăk bĕ bi kbưi hŏng diñu” (Rôm 16:17)
Klei êmuh ksiêm mĭn: Ya klei Khua ƀĭng kna Y-Pôl mtă brei phung đăo ti ƀuôn Rôm răng? Si srăng ngă čiăng thâo kral phung ngă klei bi kah mbha Phung Sang Aê Diê? Ya mnơ̆ng đru drei răng mgang klei bi mguôp jing sa hlăm Phung Sang Aê Diê?
Ruê̆ klei kkuh čhưn, Khua ƀĭng kna Y-Pôl bi êdah klei ñu uêñ mĭn kơ klei jing klei hdĭp myang phung đăo ti ƀuôn Rôm. Ñu kwưh kơ Phung Sang Aê Diê răng leh anăn ñăk bi kbưi hŏng phung ngă klei bi kah mbha leh anăn bi dleh, bi kdơ̆ng hŏng mta klei đăo digơ̆ hriăm leh. Phung anei srăng lač diñu jing phung đăo kơ Krist leh anăn mŭt ti krah phung đăo, tăp năng wăt phung mtô soh mtô mta klei đăo soh. Wăt tơdah diñu bi êdah klei sĭt dưn mơh, Phung Sang Aê Diê ăt srăng thâo kral diñu hŏng klei jing diñu msĕ snei: Diñu thâo săng êlam kơ Klei Aê Diê Blŭ ƀiădah diñu amâo mă bruă kơ Krist ôh, ƀiădah mă bruă kơ tian diñu pô, čiăng lač diñu duah klei tŭ dưn kơ diñu pô. Diñu mtô Klei Aê Diê Blŭ thâo snăk ƀiădah amâo hlue ngă ôh. Diñu knŏng uêñ mĭn kơ diñu pô, čiăng mâo klei hing ang, čiăng mâo klei dưi gai jih phung tui hlue diñu. Brei phung đăo răng kơ klei mtô soh mơ̆ng phung pô mtô soh leh anăn phung bi kah mbha Phung Sang Aê Diê (Y-Mathiơ 7:15). Phung anei khăng ktŭng hrip phung đăo hŏng boh blŭ siam, boh blŭ myâo mă čiăng bi mơak kơ arăng ƀiădah klei diñu kñăm jing čiăng đoh ktŭng phung đăo awăt leh anăn thâo săng êđal čiăng bi kah mbha Phung Sang Aê Diê.
Khua ƀĭng kna Y-Pôl mơak leh anăn bi mni kơ Phung Sang Aê Diê ti ƀuôn Rôm mâo klei hing ang hlăm klei gưt asăp. Ñu čiăng kơ digơ̆ thâo mĭn hdĭp tui si klei sĭt nik, thâo kral leh anăn ngă klei jăk, weh đuĕ kơ klei jhat (êlan 19). Klei bi knăl kơ phung đăo kơ Krist sĭt jing mkŏ mjing sa êpul phung đăo bŏ hŏng klei khăp, bi mguôp jing sa, bi mbha, bi krơ̆ng leh anăn bi đru hdơ̆ng phung đăo jing msĕ si Yêsu Krist hĭn. Leh anăn Aê Diê klei êđăp ênang srăng đru phung ƀuôn sang ñu mâo klei ktang dưi hŏng Satan leh anăn hdĭp tui si klei Ñu čiăng jăk (êlan 20).
Phung pô mtô soh, phung ngă klei bi kah mbha ăt mŭt hlăm Phung Sang Aê Diê hruê anei. Čiăng thâo kral leh anăn ñăk đuĕ kbưi mơ̆ng diñu, grăp hruê brei drei hriăm Klei Aê Diê Blŭ. Hmư̆ klei mtô leh anăn dlăng hră, tui knuih phung đăo ti ƀuôn Ƀêrê, ksiêm dlăng leh anăn bi msĕ hŏng Klei Aê Diê Blŭ čiăng thâo thâodah klei mtô anăn djŏ hŏng Klei Aê Diê Blŭ mơ̆: “Phung Yuđa anei mâo knuih jăk hĭn kơ phung Yuđa hlăm ƀuôn Têsalônik, kyuadah digơ̆ tŭ klei Aê Diê blŭ hŏng klei čiăng snăk, ksiêm dlăng grăp hruê Klei Aê Diê Blŭ čiăng thâo tơdah klei mtô anăn jing sĭt” (Bruă Phung Khua Ƀĭng Kna 17:11).Tơdah amâo ksiêm dlăng ôh, huĭdah ênưih kơ drei srăng lĕ hlăm klei diñu mƀlum hŏng asăp blŭ êdu, hŏng klei ƀuăn jăk ktŭng hrip klei kđeh mnuih čiăng. Knŏng hŏng klei hriăm leh anăn ksiêm dlăng Klei Aê Diê Blŭ, thâo săng klă kơ klei sĭt nik yơh phung đăo amâo srăng lĕ ôh kơ klei arăng juh mƀlum.
Ya mnơ̆ng dôk čiăng bi rai klei bi mguôp jing sa hlăm Sang Aê Diê drei leh anăn si ngă drei lŏ bi kdơ̆ng wĭt?
Wah lač: Ơ Khua Yang, kâo dôk hdĭp hlăm hruê knhal tuč mâo lu phung khua pô hưn êlâo soh, phung pô mtô soh hơô klĭt biăp mŭt ti krah Phung Sang Aê Diê čiăng ngă klei bi kah mbha, đru kâo thâo răng leh anăn thâo kral, leh anăn hur har hriăm Klei Ih Blŭ čiăng mâo klei thâo mĭn dưi ñăk đuĕ bi kbưi hŏng phung anăn. Kâo wah lač jlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Bi Hriêng 26
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
