Loos 16:3-16
Nqe cim:
“Nej ib leeg hais noj qab nyob zoo rau ib leeg ntawm txojkev sib hlub. Cov ntseeg Yexus Khetos puavleej xa lus noj qab nyob zoo tuaj rau nej” (Loos 16:16)
Lus nug rau sawvdaws xav:
– Timthawj Paulus hais lus noj qab nyob zoo rau leejtwg ntawm xaus tsab ntawv no?
– Dhau qhov ntawd, peb pom Paulus tej kev hlub li cas?
– Peb kawm tau dabtsi ntawm Paulus tus qauv ua Vajtswv haujlwm?
Xaus tsab ntawv sau xa mus rau cov ntseeg hauv nroog Loos, timthawj Paulus xa lus noj qab nyob zoo mus rau ntau tus uas muaj kev sib raug zoo tshwjxeeb nrog nws. Cov neeg uas Paulus hais txog ntawd yog cov phoojywg uas nrog nws ua Vajtswv haujlwm ua ke; yog cov ua ntau tes haujlwm khwv pab pawg ntseeg, yog cov uas siv zog ua Vajtswv haujlwm khwv kawg nkaus pub rau Vajtswv; yog cov uas nrog nws raug kaw hauv tsev lojcuj; cov uas nws coj los cuag Vajtswv, tsis hais cov Yudais lossis lwm haivneeg, yog cov kwvtij nkauj muam uas sib paub zoo; yog cov uas saib xyuas pawg ntseeg; txhua tus uas koom tsev neeg sab ntsujplig thiab tagnrho txhua tus ntseeg uas sib sau tuaj pehawm Vajtswv ua ke… Paulus hais txog lawv npe thiab qhuas lawv, hais tawm nplooj siab ua tsaug rau txhua yam uas lawv tau ua rau nws thiab rau Vajtswv tes haujlwm. Thaum kawg, Paulus txhawb lawv sawvdaws zog, kom ib leeg hais noj qab nyob zoo rau ib leeg los ntawm txoj kev sib nwj dawbhuv (nqe 16). Nwj yog ib txoj kevcai tiam ntawd ib tug ua rau tug ntawm cov phoojywg zoo. Hais lus noj qab nyob zoo yog yam ibtxwm muaj hauv kev coj noj coj ua rau txhua lub sijhawm ntawm kev sib raug zoo.
Txawm yog tsis tau mus txog ib zaug hauv nroog Loos, los Paulus kev hlub yeej muaj puv npo pub rau cov ntseeg hauv nroog Loos! Vajtswv pub rau Paulus ntsib lawv cov ntawd hauv tsev lojcuj, lossis hauv tej ncua kev xa Moo Zoo ntawm ntau thaj tsam. Paulus ceev txoj kev sib raug zoo nrog lawv thiab los ntawm lawv, ua rau Paulus paub ntau tsab xov pawg ntseeg hauv nroog Loos. Paub tseeb hais tias, cov uas Paulus hais txog npe thaum lawv nyeem tsab ntawv no, yuav txhawb lawv zog heev, thiab ua rau lawv muaj zog ua Vajtswv haujlwm mus ntxiv. Tseeb tiag, peb yeej tsis muaj peevxwm yuav ntsuas tau kev ua zoo ntawm muaj lub siab hlub tshua txog lwm tus, kev pab cawm lwm tus lossis kev txhawb lwm tus lub zog, tiamsis paub meej hais tias, thaum ua tej haujlwm ntawd los ntawm qhov tseeb yuav muaj nqis heev rau ntau tus ntawm kev ntseeg thiab kev ua Vajtswv haujlwm.
Dhau ntawm tej lus hais noj qab nyob zoo peb pom timthawj Paulus yog ib tug neeg puv npo kev hlub, txawm yog tau zoo thiab txomnyem los nws tseem nco ntsoov hais txog ib tug npe zuj zus, hais txog tej kev khwv uas lawv tau ua pub rau Vajtswv, tsis hais pojniam txivneej, tus saib xyuas pawg ntseeg mus rau tus ntseeg…. Txawm yog haujlwm loj lossis me, nws kuj nco txog, qhuas thiab saib txhua yam puavleej muaj nqis ib yam nkaus, lossis tsis yog tsuas hais txog tej uas ua tiav ntawm cov ua haujlwm xwb, tiamsis hais txog tagnrho txhua tus ntseeg thiab cov pojniam uas raug ntiajteb saib tsis muaj nqis los nws kuj hais txog npe, muaj lus noj qab nyob zoo rau lawv huv tibsi. Tsis tas li ntawd xwb, Paulus kuj muaj lus ua tsaug ntau rau txhua tus uas tau pab nws thiab lawv tas siab ua Vajtswv haujlwm vim nws. Paulus lub siab qhia tshwm meej hauv nws tej lo lus hais noj qab nyob zoo, tej lus qhuas, tej lus qhia tshwm kev sib raug zoo thaum nws siv cov lus “tus phoojywg zoo”, “tug phoojywg”, “tus phoojywg zoo nrog kuv”, … Tej no yog qauv zoo ntawm ib tug neeg kub siab ua Vajtswv haujlwm, paub txhawb sawvdaws lub zog uas tsimnyog peb cov ntseeg yuav tau kawm xyaum los ua Vajtswv haujlwm.
Thov Vajtswv,
Vajtswv, thov pab nyuam yaus paub xyaum hmov tshua txog tej phoojywg, saib tej phoojywg txhua tus muaj nqis, nco ntsoov nug moo txog lwm tus thiab paub ua tsaug rau txhua tus uas koom tes nrog nyuam yaus ua Koj tes haujlwm. Nyuam yaus tuav Tswv Yexus Khetos lub npe thov, Amees.
Peb puas pheej nco txog leejtwg, nug moo thiab thov Vajtswv pab rau nws lawm tau?
Nyeem Vajluskub hauv peb lub xyoos: Ntawv Nkauj 58-59
Kênh Youtube BHKTHN:
