Klei Aê Diê Blŭ: Klei Kbiă 15:22-26
Êlan kliăng: “Ñu lač, ‘Tơdah ih dôk hmư̆ bi nik kơ asăp Yêhôwa, Aê Diê ih, leh anăn ngă klei djŏ ti anăp ală Kâo, tơdah ih mđing knga kơ klei Kâo mtă leh anăn gưt jih jang klei bhiăn Kâo, kâo amâo srăng bi truh kơ ih ôh sa mta klei ruă Kâo ngă leh kơ phung Êjip; kyuadah Kâo jing Yêhôwa, Pô bi hlao ih.’” (Klei Kbiă 15:26)
Klei êmuh ksiêm mĭn: Tui si êlan 26, Khua Yang lač hŏng hlei pô, hlăm ya klei truh? Ya klei kñăm čiăng, Khua Yang brei klei bhiăn hlăm Êma hdruôm hră Y-Môis čih? Ya klei brei drei ngă čiăng dôk nanao hlăm klei Khua Yang kiă kriê răng mgang?
Boh klei hlăm klei yăl dliê anei truh êjai Khua Yang bi mtlaih phung ƀuôn sang Aê Diê ruah jing phung Israel, kbiă mơ̆ng klei jing hlŭn kơ phung Êjip, Aê Diê brei diñu găn Êa ksĭ Hrah leh anăn nao phă čư̆ Sinai. Tơdah truh hlăm kdrăn tač Sur, diñu êbat êjai tlâo hruê leh ƀiădah amâo ƀuh êa ôh. Truh ti Mara mâo êa, ƀiădah êa anăn phĭ amâo dưi mnăm ôh. Phung ƀuôn sang ƀuah blŭ dŭñ dŭñ kơ Y-Môis, ñu ur kwưh kơ Khua Yang leh anăn Khua Yang wĭt lač brei kơ diñu êa mnăm hŏng klei yuôm bhăn. Ti anôk anei, hŏng Y-Môis, Khua Yang brei klei bhiăn klei mtă bi mguôp hŏng Aê Diê, hŏng mnuih mkăn leh anăn wăt hŏng hjăn pô mơh. Khua Yang pia kơ Ñu pô jing “Pô bi hlao” čiăng kơ phung ƀuôn sang ƀuh, klei gưt ngă hlue si klei bhiăn Khua Yang mtă srăng đru tŭ dưn kơ klei suaih hlăm klei mĭn ai tiê wăt hlăm mngăt.
Hlăm Êma hdruôm hră Y-Môis čih, Aê Diê brei lu klei bhiăn klei mtă djŏ kơ klei suaih asei mlei. Tơdah phung ƀuôn sang Aê Diê djă pioh klei Aê Diê mtă diñu srăng tlaih mơ̆ng klei ruă duam. Msĕ si hlăm hdruôm hră Bruă Lêwi 3:17, phung ƀuôn sang Aê Diê amâo dưi ƀơ̆ng prăi amâodah êrah ngă bi jhat kơ klei suaih asei mlei. Bruă Lêwi kdrêč 11 kah mbha hlô mnơ̆ng doh leh anăn amâo doh đru bi klhak mta mnơ̆ng ƀơ̆ng jăk suaih leh anăn mta mnơ̆ng ƀơ̆ng ênưih ba klei ruă. Bruă Lêwi kdrêč 13, klei bhiăn kơ đa mta klei ruă tưp hlăm klĭt, msĕ si klei bhiăn hŏng klei djŏ phung leh anăn êlan hdră răng mgang klei tưp. Bruă Lêwi kdrêč 23, Khua Yang mkŏ mjing kjuh gưl knăm doh jăk grăp thŭn čiăng kơ phung ƀuôn sang mâo mmông găl nao kkuh mpŭ leh anăn mdei, đa đa mkăn… Dŭm mta klei bhiăn anei mơ̆ng Khua Yang pô ktrâo mtô kơ phung ƀuôn sang Ñu ngă hlue, čiăng răng kriê anak mnuih tlaih mơ̆ng klei ngă bi jhat kơ klei suaih pral hlăm mngăt ai tiê leh anăn hlăm kđeh asei mlei.
Klei hdĭp kđeh asei mlei, ai mĭn leh anăn mngăt ai tiê drei bi mguôp mbĭt. Khua Yang čiăng phung anak Ñu mâo klei suaih pral hlăm mngăt ai tiê klei mĭn leh anăn wăt asei mlei msĕ mơh (I Têsalônik 5:23). Tơdah čiăng Aê Diê mgang pioh, brei drei đup gưt dôk hdĭp tui si klei Ñu atăt gai. Hruê anei, phung đăo kơ Krist mâo Aê Diê brei Klei Aê Diê Blŭ, brei drei dlăng, hriăm Klei Aê Diê Blŭ leh anăn bi mguôp hŏng Khua Yang grăp hruê čiăng kăp mđing hmư̆ klei blŭ mơ̆ng Ñu. Tơdah thâo klei Aê Diê čiăng, thâo klei bhiăn Ñu, drei gưt klei Ñu mtă leh anăn ngă klei kpă ênô ti anăp Khua Yang, snăn klei ƀuăn “Kâo jing Yêhôwa, Pô bi hlao ih” ăt mâo ênoh yuôm hŏng drei. Hlăk anăn wăt tơdah klei hdĭp drei hŏng asei mlei suaih pral amâodah ruă duam, klei jing găl ênưih amâodah dleh dlan, ƀiădah mngăt ai tiê drei mâo nanao klei êđăp ênang leh anăn mơak mơai, kyua đăo kjăp snei “Jih jang klei jing jăk kơ phung khăp kơ Aê Diê” (Rôm 8:28).
Si ngă drei kăp đup gưt kluôm ênŭm mơ̆ klei Khua Yang atăt gai?
Wah lač: Ơ Khua Yang kâo khăp, bi mni kơ Khua Yang kyua Ih răng pioh nanao kâo suaih pral hlăm mngăt ai tiê wăt hlăm asei mlei tui si klei čiăng jăk Khua Yang. Akâo Khua Yang đru kâo thâo myơr asei mlei kâo jing mnơ̆ng ngă yang hdĭp leh anăn doh jăk bi mơak kơ Ama. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Klei Yăl Dliê 21
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
