Khivdim 15:22-26
Nqe cim:
“Tus TSWV hais rau lawv hais tias, “Yog nej mloog kuv lus thiab ua raws li kuv lub siab nyiam, thiab muab siab npuab kuv tej kevcai txhua nqe huv tibsi, kuv yuav tsis rau txim rau nej kom muaj mob muaj nkeeg li uas kuv tso rau cov Iziv. Kuv yog tus TSWV, tus uas kho nej tej mob tej nkeeg” (Khiavdim 15:26)
Lus nug rau sawvdaws xav:
– Nqe 26 yog Vajtswv hais rau leejtwg?
– Lub homphiaj Vajtswv pub muaj Mauxes txoj kevcai yog dabtsi?
– Peb cheemtsum ua dabtsi kom pheej nyob hauv Vajtswv kev tsomkwm?
Keebtiv uas tshwm muaj zaj xwm no yog thaum Vajtswv cawm Nws haivneeg tawm ntawm kev ua qhev hauv tebchaws Iziv los, Vajtswv pub rau lawv hla dhau Hiavtxwv Liab thiab taug kev los rau roob Xinais. Thaum lawv los txog ntawm tiaj suabpuam Sules thiab mus tau peb hnub ke lawd, lawv nrhiav tsis tau dej haus li. Los txog ntawm Malas muaj qhovdej tiamsis dej iab heev haus tsis taus. Cov Yixalayees yws Mauxes heev, Mauxes thiaj thov Vajtswv pab thiab tau Vajtswv daws qhov teeb meem nqhis dej los ntawm ib yam txujci tseemceeb. Kuj yog nyob thaj chaw no ntag, dlhau los ntawm Mauxes, tus Tswv txhim muaj txojcai ntsigtxog Nws thiab tibneeg, ntsigtxog tibneeg ua rau tibneeg uas yog ua rau lwm tus thiab tus kheej. Tus Tswv hais txog Nws hais tias “Kuv yog tus TSWV, tus uas kho nej tej mob tej nkeeg.” Kom tus Tswv haivneeg pom hais tias, mloog raws li tus Tswv tej kevcai yuav pab tau lawv muaj dag zog ntawm kev xav thiab sab nqaij tawv.
Hauv Mauxes tsib phau ntawv, Vajtswv pub muaj ntau nqe kevcai ntsigtxog kev muaj dag zog. Thaum uas lawv mloog raws tej kevcai ntawd, lawv yuav tsis muaj mob muaj nkeeg. Ib yam li hauv Levis Kevcai 3:17, Vajtswv haiv neeg tsis txhob noj roj lossis ntshav vim yuav ua rau lub cev muaj mob. Levis Kevcai tshooj 11 yog cais cov tsiaj uas huv thiab tsis huv kom paub yam noj pab tau lub cev muaj zog thiab yam yoojyim ua rau muaj mob muaj nkeeg. Levis Kevcai tshooj 13, yog cov kevcai ntsigtxog qee yam mob sab nraum tawv uas kis tau rau lwm tus, tshwj xeeb yog mob ruas thiab kev qaij kom txhob kis ntxiv. Levis Kevcai tshooj 23, Vajtswv rhawv tsim muaj xya rooj kevcai dawbhuv hauv ib lub xyoo cia kom tej pejxeem sawvdaws muaj sijhawm mus pehawm Vajtswv thiab tau so haujlwm… Tej kevcai no yog Vajtswv taw qhia rau Nws haiv neeg yuav tsum coj kom ceev tau yus muaj dag zog sab ntsujplig, sab nqaij tawv thiab tsis raug mob.
Peb lub cev ntaj ntsug, lub siab thiab tus ntsujplig yeej sib lo ua ke. Vajtswv xav kom Nws cov menyuam muaj zog txhua nrho tsis hais ntawm lub siab xav, tus ntsujplig thiab lub cev ntaj ntsug huv tibsi (1 Thexalaunikes 5:23). Xav tau Vajtswv tsomkwm, peb yuavtsum mloog Nws txoj kevcai coj ua neej. Niaj hnub nimno, cov ntseeg tau Vajtswv pub muaj Nws Txojlus, peb yuav tsum nyeem, kawm thiab sib txuas nrog Vajtswv txhua hnub kom mloog tau tej uas Nws qhia kom peb ua. Thaum uas paub Vajtswv lub siab nyiam, Vajtswv tej kevcai, yuav tsum mloog raws li Nws tej lus samhwm thiab ncaj ncees ua raws li ntawd tabmeeg Vajtswv, ces Nws lo lus cogtseg hais tias, “Kuv yog tus TSWV, tus uas kho nej tej mob tej nkeeg” yeej tseem yuav muaj nqis rau peb. Thaum tau txais lo lus cogtseg lawd, txawm yog peb lub cev muaj zog lossis muaj mob, tsamthawj zoo siab lossis nyuaj siab, peb yeej kaj siab thiab txaus siab, rau qhov peb yeej ruaj siab rau Vajtswv, vim “Peb paub hais tias peb cov uas hlub Vajtswv, txawm yog peb tau zoo thiab txomnyem los Vajtswv yuav ua kom tej ntawd muaj nqis rau peb cov uas Vajtswv pom zoo hu los raws li Vajtswv npaj tseg lawm” (Loos 8:28).
Thov Vajtswv,
Vajtswv tus muaj kev hlub, nyuam yaus ua Koj tsaug uas Koj pub nyuam yaus lub cev, tus ntsujplig thiab lub siab muaj zog raws li Koj lub siab nyiam. Thov pab nyuam yaus paub muab nyuam yaus tus kheej ua khoom fij dawbhuv thiab haum Koj siab. Nyuam yaus tuav Yexus Khetos lub npe thov, Amees.
Peb puas npaj txhij mloog raws li Vajtswv txoj kevcai coj kom tau Vajtswv kho peb zoo mob nkeeg lawm tau?
Nyeem Vajluskub hauv peb lub xyoos: 1 Xwmtxheej Vajntxwv 21
Kênh Youtube BHKTHN:
