Blŭng a 1:1
Kơkuh kơ đĭ đăng bơngai mă mơ̆ng,
Năr ‘nâu lu bơ̆n gô tơchĕng pơwao ‘bai pơhrăm đei kơ̆l ‘bai: Blŭng A kiơ̆ kơ Sơ̆p Hla bơar ‘Bok Kei-Dei Blŭng a 1:1.
1 Blŭng-a Kră Yang ‘Bok Kei-Dei pơjing plĕnh păng teh.
Trong tơm ‘bai pơhrăm ‘nâu:
“Blŭng-a Kră Yang ‘Bok Kei-Dei pơjing plĕnh păng teh” (Blŭng a 1:1)
Nơ̆r jet tơchĕng pơwao:
– Plĕnh teh pơtơm blŭng a thoi yơ?
– Nơ̆r đơ̆ng Sơ̆p Hla bơar ‘Bok Kei-Dei tơblang phara kơ nơ̆r kon bơngai tơblang noh liơ?
– Đei pơlung kơ bơ̆n thoi yơ kơplah pơhrăm gah blŭng a kơ tôm tơdrong?
Kơkuh kơ đĭ đăng,
Tu tơm tơdrong plĕnh teh noh kơ̆l tơm kơ lơ tơdrong hơ’mon đơ̆ng sơ̆ truh tơ dang ei. Chăl adrol sơ̆ lu bơngai mơdrŏng mơdro sa tih, lu kon pơlei jum dăr kơ Isơrael đei lu tơdrong hơ’mon roi gah tơdrong tơblah tơduă lu yang păng lu sem dơrong lăm đak dơsĭ, đơ̆ng noh jing đei plĕnh teh. ‘Bok Môis, bơngai mă đei hŏk pơhrăm hơđăl dêh truh tơ 40 sơnăm kơplah sư oei tơ dêh Êyiptơ chăl noh sơ̆, đei Kră Yang tơgŭm wă chih Sơ̆p Hla bơar Blŭng a, đei roi kơ bơ̆n nơ̆r kơđeh: “Blŭng a Kră Yang ‘Bok Kei-Dei pơjing plĕnh teh” (trong 1). Pơtơm blŭng a kơ tôm tơdrong noh đơ̆ng ‘Bok Kei-Dei păng tơdrong Sư pơjing.
Nơ̆r “Blŭng a” tơdra tơbăt tơm tơdrong pơjing plĕnh teh păng kon bơngai. Kră Yang pơjing plĕnh păng teh kơlih kơ thoi noh jô̆ khan tơdrong pơjing plĕnh teh ‘nâu đơ̆ng lu yang. Anăn “’Bok Kei-Dei” khan “Êlim”, pơma hơđăl Kră Yang oei hơdai lăm tơdrong ‘lơ̆ng rŏ Sư. ‘Bok Môis chih: “Adrol kơ kông đak tam mă đei, teh hăm dêh char tam mă jing. Adrol kơ ‘măng blŭng truh tơ ning-mônh Ih boih Kră Yang ‘Bok Kei-Dei.” (Hơriso 90:2). Plĕnh teh đei đơ̆ng blŭng a sơ̆ mălei ‘Bok Kei-Dei, Tơ’ngla mă pơjing plĕnh teh ưh kơ đei blŭng a pănh tuch luch. Sư đei ling lang păng ưh kơ đei layơ tôch, Sư oei oei ling lang, ưh kơ tơplih.
Bơngai mă chă lăng hơlen dêh noh Isasac Newton sư đei pơm kơ măt ‘năr păng lu sơnglŏng tơdrŏ. Lăm minh năr ei, bơngai mă hơgei anăn sư ‘bok Halley lăng ‘bôh na ưang păng jet gah bơngai mă pơm tơdrong noh. Kơplah kơtơ̆ng nơ̆r tơl tơdrong ‘nâu đơ̆ng lu kơcheh ‘long tơ̆r pơklep băl ưh kơ đei đơ̆ng bu pơm ôh, ‘bok Halley ưh kơ hiôk păng ưh kơ lăp đon. Lei na ‘bok Newton tơblang, dah tơdrong ‘nâu đei bơngai pơm, lei na plĕnh teh ‘nâu ‘lơ̆ng hloh liơ mă đei kơdih, tơpă noh đơ̆ng Yang mơsêh hăm tơdrong hơgei đei pơm.
Jing bơngai lui kơ Kră Yang, bơ̆n hơdai hăm bơngai chih hla bơar Hêbrơ thoi âu: “Na lu bơ̆n dang ei, yua kơ bơ̆n lui, na bơ̆n băt kơ ‘Bok Kei-Dei gơh pơjing plĕnh teh hăm ‘bơ̆r Sư sơkat. Thoi noh mă dôm tơdrong kiơ kiơ bơ̆n ‘bôh dang ei tă lĕch đơ̆ng bơ̆n ưh kơ ‘bôh ngăl.” (Hêbrơ 11:3). ‘Bok Kei-Dei pơjing plĕnh teh. Đơ̆ng nơ̆r sư sơkat păng tơdrong jang Yang Bơhngol ‘Lơ̆ng Sư. Pêng Anăn Yang ‘Bok Kei-Dei ‘noh pơtơm blŭng a kơ tôm tơdrong. Sư bơih Yang arih ling lang, đei adrol kơ đĭ đăng, pơjing tôm tơdrong păng bơwei tôm tơdrong. Sư bơih Tơ’ngla lu bơ̆n lui yom păng kơkuh.
Lu bơ̆n pôm đon lăm tơdrong krao khan,
Kơkuh kơ kơ Ih Kră Yang, ư-ang kơ pêng anăn Yang lăm ‘Bok Kei-Dei mă arih ling lang, Tơ’ngla mă pơjing plĕnh teh păng dêh char ‘lơ̆ng rŏ ‘nâu. Inh bơnê kơ Kră Yang yua kơ Ih pơm dôm tơdrong păng Ih bơih ăn kơ inh lui sơng iŏk păng kơkuh kơ Ih. Apinh đĭ chăl arih inh ling lang ră roi. Tơ’ngla mơsêh pơjing. Krao khan yua anăn Kră Yang Yêsu Krist, Amen.
Ơ đĭ đăng lu bơngai mơ̆ng mă ‘mêm kơeng,
Dang ei bơ̆n gô pơm kiơ wă bơnê ư-ang kơ tơdrong mơsêh Kră Yang pơjing plĕnh teh?
Dôm tơmam đơ̆ng Kră Yang pơjing
Đĭ đăng sem dơrong Sư chă ăn anăn
Kră Yang Tơ’ngla ‘lơ̆ng rơgoh
Inh ‘mêm kơ Ih, ‘blŏk ling lang ưh kơ hiơt.
Đŏk Sơ̆p Hla bơar ‘Bok Kei-Dei lăm pêng sơnăm: I Hơ’mon 16
Kênh Youtube BHKTHN:
