Mathais 21:14-17
Nqe cim:
“Tej menyuam yaus thiab menyuam mos puavleej hu nkauj qhuas koj. Koj nyob tso siab lug tsis ntshai koj tej yeebncuab, koj tav tau txhua tus uas ua phem rau koj txoj haukev.” (Ntawv Nkauj 8:2)
Lus nug rau sawvdaws xav:
– Tswv Yexus tau ua dabtsi rau cov neeg raug mob, thiab Nws tau qhuas li cas?
– Cov povthawj thiab cov xibhwb qhia Vajtswv txoj kevcai tau ua li cas?
– Thaum peb tau txais koob hmoov loj ntawm tus Tswv, peb yuav tsum ua neej li cas?
Tomqab uas Tswv Yexus ntiab cov neeg muag khoom thiab pauv nyiaj tawm hauv tshav puam sab nraud ntawm lub Tuamtsev mus lawm, cov neeg raug mob, yog cov uas raug lwm tus xyeej, tuaj cuag Tswv Yexus thiab Nws kho lawv txhua tus zoo huv tibsi. Tswv Yexus tau khuv leej thiab kho cov neeg no tej kev mob, tiamsis cov povthawj thiab cov xibhwb qhia Vajtswv txoj kevcai yeej tsis quav ntsej tej no hlo li. Lawv kuj pom tej txujci tseemceeb uas tus Tswv ua tiamsis lawv tsis hu nkauj qhuas tus Tswv, tsis tas li ntawd xwb, thaum hnov tej menyuam yaus hu nkauj qhuas Tswv Yexus, lawv tseem chim kawg li thiab. Lawv chim vim tej ntsiab lus hauv zaj nkauj “Hauxanas Daviv tus Tub” ib zaug ntxiv lees hais tias Tswv Yexus yog tus Mexiyas, yog qhov uas cov povthawj thiab cov xibhwb qhia Vajtswv txoj kevcai tsis xav lees yuav. Lawv thiaj yuam Tswv Yexus hais kom tej menyuam ntawd txhob hu nkauj li ntawd ntxiv, tiamsis Tswv Yexus tau siv nqe lus hauv Ntawv Nkauj 8:2 los teb rau lawv hais tias txawm cov menyuam yaus thiab cov menyuam mos liab los yeej paub qhuas tus Tswv thaum pom tej uas Nws tau ua dhau los. Tu siab dhau, uas cov povthawj thiab cov xibhwb qhia Vajtswv txoj kevcai yog cov laus neeg, muaj kev kawm txawj kawm ntse deb dav tiamsis ho tsis qhuas tus Tswv, tseem ua tabkaum rau tus Tswv thiab. Nyob hauv Lukas 19:40 sau tseg txog qhov uas Tswv Yexus teb cov povthawj thaum lawv hais kom Nws cov thwjtim ua twjywm hais tias, “… yog lawv cov no ua twjywm lawm los tej pobzeb yeej yuav qw.” Tus Tswv xav kom lawv zeem paub hais tias txawm yog tej yam uas tsis muaj siab ntsws los yeej tseem xav qhuas Vajtswv, tiamsis lawv muaj lub siab tawv kawg li.
Niaj hnub nimno, peb yuav tsum zeem paub hais tias peb tsuas yog cov neeg digmuag sab ntsujplig uas tau tus Tswv kho zoo, peb tsuas yog lwm haivneeg uas tsis muaj cuabkav los pehawm tus Tswv vim Txoj Kevcai. Tiamsis nimno peb txais tau koob hmoov zoo kawg nkaus ntawm Tswv Yexus thaum tau nkag lawm hauv tus Tswv lub Tsev thiab tau ywjpheej hu nkauj qhuas Nws. Peb cia li hu nkauj qhuas tus Tswv tag nrho peb lub siab, cia li fij tag nrho peb lub neej rau tus Tswv kom tau ua Nws haujlwm. Peb tsis txhob zoo li cov povthawj thiab cov xibhwb qhia Vajtswv txoj kevcai hnub thaud uas tsis zeem paub tus Tswv txoj koob hmoov, tsis hu nkauj qhuas tus Tswv hauv lawv lubneej. Peb tsis txhob ua neej tsis quavntsej tej uas tus Tswv tau ua rau peb lawm, thiab kuj tsis txhob thuam lossis tav lwm tus haukev hu nkauj qhuas tus Tswv. Peb tsis txhob hu nkauj qhuas tus Tswv tibleeg xwb tiamsis yuav tsum txhawb lwm tus lub zog thiab sib pab kom sawvdaws hu nkauj qhuas tus Tswv nrog peb.
Thov Vajtswv,
Vajtswv tus muaj hwjchim loj kawg nkaus, nyuam yaus to taub tias nyuam yaus tau txais koob hmoov loj kawg li, vim Tswv Yexus tau tuag cawm nyuam yaus dim thiab rov txhim kho nyuam yaus lub neej tshiab. Thov pab kom nyuam yaus niaj hnub qhuas Koj txojkev hlub thiab txhawb kom coob leej coob tus los koom qhuas Koj nrog nyuam yaus thiab. Nyuam yaus tuav Yexus Khetos lub npe thov, Amees.
Peb lubneej thiab tej lus hais puas tabtom tav lwm tus txoj haukev tuaj hu nkauj qhuas tus Tswv?
Nyeem Vajluskub hauv peb lub xyoos: I Xwmtxheej Vajntxwv 14
Kênh Youtube BHKTHN:
