Galati 6:1-5
Kơkuh kơ lu bơngai mă mơ̆ng,
Năr âu lu bơ̆n gô tơchĕng pơwao ‘bai pơhrăm đei kơ̆l bai: Hơmet Tơdrong Glăi & Hơdai Pŭ iŏk kiơ̆ kơ lăm Sơ̆p hla bơar Nơ̆r ‘Bok Kei-Dei lăm Galati 6:1-5.
1 Ơ ‘nhŏng oh, dah iĕm ‘bôh lu ‘nhŏng oh bơ̆n bơngai lui pơm tơdrong yoch, na lu iĕm mă lui kơjăp, iĕm athei tơgŭm sư pơm mă ‘lơ̆ng hŏ. Iĕm tơgŭm sư, iĕm kư̆m athei ‘mêm mơnat kơ sư mơ̆n, ‘nĕ hil kơ sư păng iĕm athei kơchăng akâu iĕm kơdih mơ̆n, hli kơ yang Satan kư̆m wă pơhlŭ pơlung iĕm. 2 Iĕm gơh tơgŭm dih băl thoi noh trŏ tơpă, thoi Kră Yang Yêsu Krist pơkă. 3 Mă-lei dah bơngai bu lui ưh kơjăp na sư roi kơ đe khan sư lui kơjăp, bơngai ‘noh bơngai hơlĕnh. 4 Na bơ̆n athei pơlong lăng tơdrong jang bơ̆n tơ lăm tơdrong jang ‘Bok Kei-Dei, wă kơ băt bơ̆n jang ‘lơ̆ng dah ưh. Dah bơ̆n băt kơdih bơ̆n jang ‘lơ̆ng, bơ̆n gô lăp đon hiôk chơt kơdih bơ̆n. Bơ̆n ‘nĕ pơang akâu bơ̆n kơdih khan bơ̆n lui hloh kơ đe. 5 Păng bơ̆n athei wei tơdrong jang bơ̆n kơdih.
Trong tơm ‘bai pơhrăm ‘nâu:
“Ơ ‘nhŏng oh, dah iĕm ‘bôh lu ‘nhŏng oh bơ̆n bơngai lui pơm tơdrong yoch, na lu iĕm mă lui kơjăp, iĕm athei tơgŭm sư pơm mă ‘lơ̆ng hŏ. Iĕm tơgŭm sư, iĕm kư̆m athei ‘mêm mơnat kơ sư mơ̆n, ‘nĕ hil kơ sư păng iĕm athei kơchăng akâu iĕm kơdih mơ̆n, hli kơ yang Satan kư̆m wă pơhlŭ pơlung iĕm.” (Galati 6:1)
Nơ̆r jet tơchĕng pơwao:
– ‘Bok Pôl đei bơtho jơhngơ̆m đon bơ̆n hăm bơngai nai thoi yơ?
– Yua kơ kiơ sư đei pơma “athei pŭ tơdŏng dih băl” (trong 2), na sư kŭm đei khan pha dơ̆ng “bơ̆n athei pŭ kơdih kơdih” (trong 5)?
– Tơdah đei ‘bôh bơngai nai đei pŭ trăp lăm tơdrong yoch kiơ kiơ na jơhngơ̆m đon bơ̆n thoi yơ?
Kơkuh kơ đĭ đăng,
‘Bok Pôl đei pơma pơyum đĭ đăng dôm tơdrong juăt đei pơma lăm minh tơdrong noh jơ̆ ‘mêm kơ bơngai nai nhen thoi ‘mêm kơ akâu kơdih (Galati 5:14), kơplah roi pơdeh Plei Yang Bơhngol ‘Lơ̆ng, na sư kŭm dan “tơdrong ‘mêm” noh jơ̆ hơdrol. Lăm Sơ̆p hla bơar năr âu, ‘Bok Pôl đei hơlen jrŭ đei ‘bar tơdrong tơ’bôh tơdrong ‘mêm noh: Jơhngơ̆m đon hăm bơngai pơm yoch hăm bơngai pŭ trăp tơdrong ayơ ayơ noh. Hăm tơdrong nơ̆r sư athei, ‘‘Bok Pôl athei bơngai lui tơ pơlei Galati “iŏk jơhngơ̆m đon iơ̆m dim” na hơmet bơngai đei pơm yoch, păng athei tơdŏng băl tơdrong pŭ trăp (trong 1-2). Sư đei pơma pơthim kơ lu bơngai Galati oei tơchĕng thoi yơ wă pơm kiơ̆ tơdrong juăt: noh jơ̆ “pơm keh tôm tơdrong juăt”.
Bơngai đei tơchĕng lăm tơdrong “trŏ-glăI, kok-găm” nhen thoi bơngai yŏng tih ‘bơ̆t toa wă hơmet tơdrong glăI bơngai nai. Nhen thoi bơngai Pha-ri-si pơm kiơ̆ tơdrong juăt, bơngai thoi noh đei pơm “pŭ trăp ăn kơ bơngai nai tơdrong trăp ăn kơ hơngiĕng đe nai” (Mathiơ 23:4), na lu sư ưh kơ wă pŭ trăp đơ̆ng bơngai nai. Pha ra kơ tơdrong noh bơngai đei đon lui mă khan sư băt kơ tơdrong “trŏ-glăI”, sư kŭm băt kơ ‘nhŏng oh sư kăl kơ đei tơdrong hơmet ming dơ̆ng, na lu sư hơmet hăm tơdrong iơ̆m dim, wă khan lăng kơdih lu sư ưh kơ nhen minh ‘nu bơngai gĭt hloh (trong 3). Ưh kơ lăng kơ dih hloh loi păng ưh kơ pơting sư kơdih hăm bơngai nai na hiôk hơiă kơ dih (trong 4). Bơngai ‘noh sư kŭm lăng kơdih sư kŭm hơmơt kơ pơ̆k huŏng nhen thoi bơngai nai na iŏk jơhngơ̆m đon hơla păng iơ̆m dim na hơmet bơngai nai (trong 1). Nơ̆r “hơmet ming dơ̆ng” nơ̆r âu jơ̆ wă khan raih, păng wă kơ klaih thoi đêl. Hơmet ming dơ̆ng âu ưh kơ trŏ kơ phak ôh mă lei wă kơ’lơ̆ng hloh dơ̆ng.
Phara kơ noh dơ̆ng, tơdah đei ‘bôh bơngai pŭ trăp, bơngai mă đei đon lui gô wang hơdai pŭ trăp tơgŭm băl jơhngơ̆m pran (trong 2) bơngai đei đon lui ưh kơ wă pơting kơ sư hăm bơngai nai na hiôk hơiă kơ kơdih kâu ôh mă lei sư pơting kơ dih sư hăm akâu sư kơdih gơh pơm lăng lăng hăm trŏ kơ pơm ‘lơ̆ng trŏ kơ pơm ưh (trong 4). Tuch luch bơngai đei đon lui băt kơ dih sư ưh kơ trŏ ‘bok dŏng pơklaih. Bơngai đei đon lui gô iŏk đon hơla păng đĭ jơhngơ̆m tơgŭm bơngai nai lăm tơdrong sư gơh pơm, mă lei sư kŭm băt kơ dih sư ưh kơ gơh arih tơplih bơngai nai ôh, kŭm đei dôm tơdrong pŭ trăp mă “bơ̆n kăl kơ pŭ kơdih kơdih” (trong 5). Bơngai đei đon lui sư ưh kơ ơh sơ’ngon kơdih sư kơplah sư đei đĭ jơhngơ̆m tơgŭm bơngai mă pơm yoch mă lei ưh kơ đei gơh tơplih bơngai nai wă kơ pŭ hơiơch biơ̆.
Bĕ bơ̆n pôm jơhngơ̆m đon krao khan,
Ơ Yang Bơhngol ‘Lơ̆ng, apinh Ih tơgŭm inh lăng trŏ kơ kơdih kâu inh thoi yơ păng tơgŭm, bơngai nai, hơdai pŭ trăp hăm bơngai nai hăm tơdrong iŏk đon ala, hăm tơdrong ‘mêm mơnat. Yua anăn Kră Yang Yêsu Krist, Amen.
Ơ đĭ đăng bơngai mơ̆ng mă ‘mêm kơ eng,
Lu bơ̆n đei iŏk đon ala lei mă pơang akâu kơ dih kơplah hơmet bơngai nai?
‘Nhŏng oh đei pơm ‘bơm tơdrong yoch
Đĭ jơhngơ̆m đei krao khan dih băl
Gơnang kơ tơdrong mơnat hlĭch chrơp
Nơ̆r pơlung, dŏng tơgŭm đĭ jơhngơ̆m hơdai
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: I Hơ’mon 11
Kênh Youtube BHKTHN:
