II Vajntxwv 19:14-19
Nqe cim:
“Koj cia li thov kuv, kuv yuav teb koj; kuv yuav qhia tej txujci tseemceeb uas koj tsis tau paub rau koj.” (Yelemis 33:3)
Lus nug rau sawvdaws xav:
– Vajntxwv Hexekiyas ntsib kev nyuaj dabtsi?
– Vajntxwv tivthaiv thiab tau txais nqi zog li cas?
– Peb kawm tau dabtsi ntawm Vajntxwv Hexekiyas lub siab thov Vajtswv pab rau tej kev nyuaj siab?
Tom qab uas Vajntxwv Xalumoos tuag lawm, lub tebchaws Yudas raug faib ua ob lub. Kaum xeem nyob yav Qaumteb ua lub tebchaws Yixalayees. Ob xeem Yudas thiab Npeeyamees nyob yav Qabteb ua lub tebchaws Yudas. Vajntxwv Hexekiyas yog tus vajntxwv tim kaum ob hauv lub tebchaws Yudas. Vajntxwv tau qhuas hais tias “cov vajntxwv uas kav lub tebchaws Yudas, tsis hais cov uas kav ua ntej nws lossis tom qab nws, tsis muaj ib tug cia siab rau tus Tswv npaum Hexekiyas” (II Vajntxwv 18:5-6). Vajntxwv rhuav tej mlom, tsa muaj kev pehawm tus Tswv hauv lub Tuamtsev nroog Yeluxalees.
Lub sijhawm ntawd, lub tebchaws Axilias yog lub tebchaws muaj zog, mus txeeb ntau lub tebchaws. Xyoo tim 14 uas Vajntxwv Hexekiyas kav, tus vajntxwv uas kav tebchaws Axilias npe hu ua Xenakhelis coj tubrog tuaj tua cov nroog hauv tebchaws Yudas thiab vij lug nroog Yeluxalees. Vajntxwv Xenakhelis sau ib tsab ntawv xa tuaj rau Vajntxwv Hexekiyas hais tias, nws cia li ua tus swb, thiab hais tias tus Tswv kuj zoo ib yam li lwm haivneeg tej mlom xwb, cawm tsis tau lub tebchaws Yudas dim cov Axilias txhais tes.
Ntsib raug qhov teebmeem nyuaj npaum li no, Vajntxwv Hexekiyas ua li cas? Thawj qhov, vajntxwv txib cov nomtswv mus hais rau tus cevlus Yaxayas paub thiab thov kom thov Vajtswv pab. Hos vajntxwv ces nws mus hauv tus Tswv lub Tuamtsev, thiab thov Vajtswv pab. Vajntxwv ntseeg ruaj hais tias Nws yog Vajtswv tus muaj txojsia, tus uas tsim lub ntuj lub ntiajteb, tswj tuav qaumntuj thiab kav tej nomtswv hauv ntiajteb. Muab tsis tau Nws los piv rau tibneeg tej mlom tsis muaj qabhau. Vajntxwv thov Vajtswv cev Nws txhais tes los pab cawm, kom tej tebchaws hauv ntiajteb no paub tias tsuas yog tus Tswv uas yog Vajtswv yog tus tseeb. Nqi zog yog hmo ntawd, tus Tswv ib tug timtswv los tua 185.000 tus tubrog Axilias tuag, Vajntxwv Xenakhelis thiaj swb rov qab. Txij ntawd los, tiam Vajntxwv Hexekiyas kav, lub tebchaws Yudas nyob thajyeeb thiab vammeej.
Phau ntawv Xwmtxheej Vajntxwv qhia paub tias Vajntxwv Hexekiyas ua neeg hwm Vajtswv mus tas nws sim neej, rau siab pehawm thiab ua Nws tes haujlwm. Thaum ntsib kev nyuaj siab loj, vajntxwv tsis tawmtsam ib leeg, tiamsis nws nrhiav ua li tus Tswv lub siab dhau los ntawm tus cevlus Yaxayas, thiab vajntxwv yog tus uas mus hauv lub Tuamtsev thov Vajtswv thiab qhia tej teebmeem rau tus Tswv. Ntawm vajntxwv tus kheej, qhov uas nws ua tau thiab kovyeej tsis yog vam cov tubrog lub zog tiamsis yog kev thov Vajtswv. Thaum “Tus Tswv nrog nraim Hexekiyas thiab txhua yam uas nws ua puavleej ua tau tiav” (II Vajntxwv 18:7). Vajtswv cov menyuam ua neej nyob hauv ntiajteb no yeej khiav tsis dhau tej teebmeem. Yeebncuab kuj niaj hnub ncig mus ncig los tua peb. Txojkev muaj yeej ntawm Vajntxwv Hexekiyas txhawb peb lub zog kom peb ntseeg ruaj rau tus Tswv, thov Vajtswv thiab ua raws li Vajtswv siab nyiam txhua hnub. Tus Tswv yog tus uas tuaj peb tog nrog peb tawmtsam.
Thov Vajtswv,
Tus Tswv, thov Koj pab kom nyuam yaus pehawm thiab ua Koj haujlwm ncaj ncees. Thaum ntsib kev nyuaj siab, thov Koj qhia nyuam yaus los ntawm Koj Txojlus thiab pab kom nyuam yaus ua siab ntev thov Vajtswv. Nyuam yaus tuav Tswv Yexus lub npe thov, Amees.
Thaum ntsib kev nyuaj siab hauv lub neej, peb tus kheej xwbtim daws los yog muab qhia rau Vajtswv?
Nyeem Vajluskub hauv peb lub xyoo: Yaxayas 63
Kênh Youtube BHKTHN:
