Bơtho Khôi Juăt 31:22-30
Trong tơm: “Yua kơ Inh băt kơ jơhngơ̆m iĕm arăng dêh kơplah inh oei arih oei hơdai hăm lu iĕm hlôi blah plơ̆ boih hăm Kră Yang thoi noh, pơma kiơ đơ̆ng rŏng kơ inh lôch kơnh, lu iĕm wă blah plơ̆ dang yơ dơ̆ng!”
(Bơtho Khôi Juăt 31:27)
Nơ̆r jet tơchĕng pơwao:
– ‘Bok Môis đei chih răk dôm tơdrong kiơ?
– Sư chih roi kon pơlei Isơrael jơ̆ minh kon pơlei thoi yơ?
– Bơ̆n kăl kơ pơm kiơ wă wei tơdrong ‘mêm Kră Yang ding truh tôch?
Tơdrong Kră Yang ‘Bok Kei-Dei roi ăn kơ ‘bok Môis păng ‘bok Jôsuê băt lê̆ adrol tơdrong kon pơlei Isơrael blah plơ̆ Kră Yang tơ anăp kơnh jơ̆ minh nơ̆r tơbăt đei chih răk lăm hla bơar, dan ‘bơ̆t cheng Hom Tơdrong Pơgơ̆p Kră Yang, mă ‘bok Môis kư̆m iŏk yua hla bơar noh wă bơtho păng roi tơbăt ăn kơ kon pơlei Isơrael. Măloi, nơ̆r noh kư̆m roi ăn dơ̆ng kơ lu Kră pơgơ̆r, yŏng pơgơ̆r na mưh ‘bok Môis lôch, lu sư bơih pơtrơp bơtho, tơ’blŏk dơ̆ng kơ kon pơlei gah tơdrong răm pơmat tat gô truh dah lu sư achăng lê̆ Kră Yang. Dah wă khan ‘bok Môis ưh kơ đei hlĭch kiơ ôh gah dôm nơ̆r khan lê̆ adrol âu, yua kơ sư băt hơđăl dôm jơhnơr kon pơlei Isơrael lăm dôm sơnăm tơchar glă. Sư băt hlôh ‘bôh nhen kon pơlei arăng kơ̆l blah plơ̆ Kră Yang. Rŏ lăng lơ bơngai anat kơ hlôh gah tơdrong Kră Yang khan lê̆ adrol dôm tơdrong âu lăm kơplah jơ ‘nâu kon pơlei oei ‘mêm dêh kơ Kră Yang. Pơm kiơ̆ dôm nơ̆r Kră Yang bơtho. Mă khan ‘nâu jơ̆ minh tơdrong răm pơmat tat dêh kơ kon pơlei Isơrael, mă-lei kăl tơpă wă tơ’blŏk kơ kon pơlei kơplah lu sư mơ̆t oei lăm dêh char Kră Yang pơkă wă ăn ‘nĕ yua kơ tơdrong arih tôm mah na jing ưh pă gơnang kơ Kră Yang. Rok kiơ̆ tơdrong arih ưh kơ ‘lơ̆ng thoi lu bơngai tơmoi, hiong tơdrong ‘lơ̆ng rơgoh păng jing kơnê̆ ‘mê̆ ‘mach jơhngơ̆m kon pơlei ‘mêm yom kơ Kră Yang dang ei ưh kơ tôm wă hơđơ̆ng lu sư kư̆m oei ‘mêm yua kơ Kră Yang păng đĭ jơhngơ̆m pơm kiơ̆ rim năr.
Rok trong năm tơ pơlei, rim ‘nu bơngai lui đei lơ ‘nhŏng oh năm hơdai bơ̆n. Mă-lei lăm dôm chăl arih phara băl, bơ̆n ‘bôh đei ‘nhŏng oh bơ̆n mơ’nah ưh pă năm hơdai bơ̆n bơih. Lăm lu bơngai noh sơ̆ bơ̆n ‘bôh sư ‘mêm tơpă kơ Kră Yang păng kư̆m đei mơ’nah wei lăng khul bơngai lui.
Tơpă tơdrong ‘nâu ưh kơ đei kiơ hlĭch ôh, yua kơ thoi ‘bok Môis đei khan, lăm jơhngơ̆m kon bơngai bơ̆n arăng păng blah plơ̆ Kră Yang. Thoi noh, jơhngơ̆m ‘mêm kơ Kră Yang dah ưh kơ wei rong rim năr dôm tơdrong juăt gah bơhngol hăm tơdrong pơhrăm nơ̆r ‘Bok Kei-Dei, krao khan, akŭm kơkuh kơ Kră Yang păng arih pơm kiơ̆ nơ̆r Kră Yang bơtho, lei tơdrong ‘mêm noh kư̆m jing hiong kiơ̆ kơ jơ năr, păng tuch luch phŏ truh tơ Kră Yang ưh kơ đei lăm chăl arih bơ̆n dơ̆ng. Kră Yang ‘mêm kơ bơ̆n păng oei ‘mêm kơ bơ̆n ling lang ưh kơ tơplih. Apinh Kră Yang ăn kơ bơ̆n kư̆m wei jơhngơ̆m ‘mêm yom kơ Kră Yang truh đĭ chăl arih.
Bơ̆n juăt kơ wei jơhngơ̆m ‘mêm yom kơ Kră Yang thoi yơ?
Ơ Kră Yang, Ih bơih ‘Bok ‘bôh nhen lăm jơhngơ̆m inh arăng păng blah plơ̆ Ih. Apinh Ih tơgŭm inh rim năr oei ‘măn jơ tơchĕng pơwao kơ jơhngơ̆m inh ‘mêm yom kơ Ih wơ̆ tŏk rim năr, krao khan hăm anăn Kră Yang Yêsu Krist, Amen.
Đŏk Sơ̆p Hla bơar ‘Bok Kei-Dei lăm pêng sơnăm: I Samuel 26
Kênh Youtube BHKTHN:
