I Yauhas 4:10
Nqe cim:
“Txojkev hlub lub ntsiab yog li no: Tsis yog peb hlub Vajtswv, tiamsis yog Vajtswv hlub peb thiab Nws txib Nws tus Tub los tuag theej peb lub txhoj, Vajtswv thiaj zam tau peb lub txim.” (I Yauhas 4:10)
Lus nug rau sawvdaws xav:
– Vajtswv qhia tawm txojkev hlub rau peb zoo li cas?
– Qhov uas qhia tawm kev hlub ntawd muaj yam dabtsi tshwjxeeb txawv li tibneeg qhia tawm kev hlub?
– Peb kawm paub zoo li cas hais txog lub ntsiab ntawm lub koob tsheej nco txog Yexus los yug?
Kev hlub tsis yog Vajtswv tus yamntxwv xwb tiamsis Vajtswv Txojlus hais tias “Vajtswv yog kev hlub” (I Yauhas 4:8). Hais txog kev hlub, tibneeg tsuas xav txog seem uas yog kev xav thiab kev ntshaw xwb, tiamsis Vajtswv qhia tawm kev hlub los ntawm qhov uas Nws zoo siab hlo raug poob yam uas muaj nqis tshaj. Tswv Yexus, Vajtswv Leej Tub, tus uas raug txib los hauv ntiajteb yog timkhawv ntawm Vajtswv kev hlub tibneeg.
Tswv Yexus los yug ua neeg thiab tuag theej cov neeg txhaum lub txim, kom dhau qhov ntawd peb tau txais kev zam txim thiab txojsia ntev dhawv mus ibtxhis. Nov yog txojkev hlub fij tus kheej uas Vajtswv pub rau cov neeg txhaum. Raws li keebkwm tibneeg hnub thaud los txog tamsim no kuj muaj cov neeg kam qhia tawm kev hlub fij tus kheej tuag hloov lwm tus chaw. Yog li ntawd Vajtswv txojkev hlub muaj dabtsi txawv? Timthawj Paulus qhia qhov txawv ntawd li no: “Qhov uas ib tug twg yuav tuag theej tus neeg ncaj ncees, mas nyuaj kawg li. Tiamsis tej zaum yuav muaj qee leej txaus siab tuag theej tus neeg zoo thiab. Tiamsis Vajtswv qhia rau peb hais tias Vajtswv hlub peb kawg li, rau qhov thaum peb tseem ua neeg txhaum Yexus Khetos tuag txhiv peb.” (Loos 5:7-8).
Tus Tswv hlub peb thaum peb tseem yog neeg txhaum, thaum peb tsis tau tsimnyog hlub. Nov yog lub ntsiab tseemceeb uas Tswv Yexus los yug ua neeg. Thiab qhov no yog qhov uas vim li cas lub caij ua koob tsheej nco txog Tswv Yexus los yug tau muab hu ua lub caij kev hlub. Thaum uas peb tabtom npaj rau lub caij ua koobtsheej no, thov kom peb txhua tus cia siv lub sijhawm los xav txog Vajtswv txojkev hlub. Txojkev hlub ntawd yog kev hlub loj, Vajtswv them tus nqi kim heev uas yog tso Nws Leej Tub los tuag cawm neeg ntiajteb.
Vim qhov uas Yexus los yug, tuag, thiab sawv hauv qhov tuag rov qab los, peb tau los ua neeg qaum ntuj, tau los nrog Leej Txiv sib raug zoo. Nov yog pob khoom muaj nqis uas txhua tus cheemtsum txais yuav. Txhua tus ntseeg Yexus yog cov neeg uas tau txais Vajtswv kev hlub, cia li qhia txojkev hlub no mus rau lwm tus.
Thov Vajtswv,
Tus Tswv, lub caij ua koob tsheej nco txog Yexus los yug no, ib zaug ntxiv nyuam yaus rov tau kawm txog Koj txojkev hlub pub rau nyuam yaus. Txawm nyuam yaus yog neeg txhaum, tsis tsimnyog los Tswv Yexus los yug hauv ntiajteb kom nyuam yaus tau txojsia. Nyuam yaus lub siab yuav pehawm Koj, ua rau Koj tau koobmeej thiab qhia Koj txojkev hlub mus rau lwm tus. Nyuam yaus tuav Tswv Yexus lub npe thov, Amees.
Peb qhia tawm kev hlub tus Tswv thiab kev hlub cov neeg txhaum zoo li cas nyob rau lub caij ua koob tsheej nco txog Tswv Yexus los yug?
Nyeem Vajluskub hauv peb lub xyoo: I Xamuyees 23
Kênh Youtube BHKTHN:
