Loos 9:30-33
Nqe cim:
“…Lwm Haivneeg yeej tsis xyaum coj raws li txojkev ncaj ncees, tiamsis vim lawv ntseeg, lawv thiaj ua tau neeg ncaj ncees” (Loos 9:30)
Lug nug rau sawvdaws xav:
– Timthawj Paulus xav hais txog yam dabtsi thaum nws hais tawm tej yam sib txawv ntawm haivneeg Yixalayees thiab lwm haivneeg?
– Lub ntsiab ntawm qhov uas tus Tswv yuav muab ib lub pobzeb tso rau hauv lub nroog Xi-oos thiab lub pobzeb ntawd yuav ua rau neeg ntog yog dabtsi?
– Yuav ua cas peb thiaj tau suav hais tias neeg ncaj ncees?
Timthawj Paulus hais txog ib qhov tseeb uas xav tsis thoob cuag li rov quav qees, ntawd yog lwm haivneeg tsis nrhiav kev ncaj ncees tiamsis lawv ho tau kev ncaj ncees, ntawd yog kev ncaj ncees los ntawm kev ntseeg (nqe 30). Dua li haivneeg Yixalayees tau tus Tswv pub muaj txoj kevcai kom ua neej phim li haivneeg tau xaiv, tiamsis lawv ho siv tus kheej lub zog ua raws txoj kevcai kom tau suav hais tias ncaj ncees. Txawm yuav coj txoj kevcai zoo npaum licas, los lawv yeej yuav mus tsis txog qib uas tau suav hais tias ncaj ncees (nqe 31). Keebtiv yog vim lawv tsis ua raws li tej uas tus Tswv qhia kom lawv tau suav hais tias ncaj ncees los ntawm kev ntseeg, yog qhov uas tus Tswv twb npaj tseg rau tibneeg puag thaum chivkeeb los. Vajtswv Txojlus hais tias: “Twb yog vim Anpees ntseeg, nws thiaj muab tej uas zoo dua Ka-ees li fij rau Vajtswv. Vim Anpees ntseeg, Vajtswv thiaj suav hais tias Anpees yog tus ncaj ncees” (Henplais 11:4). “Anplas thiaj cia siab ntsoov rau tus TSWV tej lus, vim nws muaj kev cia siab, tus TSWV thiaj txaus siab heev rau nws thiab suav hais tias nws yog ib tug neeg ncaj ncees” (Chivkeeb 15:6). Txhua xyoo, tus povthawj hlob muab tus tsiaj theej txhoj los tua, muab cov ntshav los ua khoom fij daws tagnrho cov pejxeem lub txim (Levis Kevcai 16). Tus tsiaj theej txhoj tsis muaj ib qho phem raug tua yog ua yamntxwv txog Tswv Yexus, Nws cov ntshav yuav ntws los ntxuav tibneeg tej kev txhaum.
Nyob hauv nqe 33, Timthawj Paulus siv tej lus uas nyob hauv Yaxayas 8:14 thiab Yaxayas 28:16 los qhia meej txog lub pozeb dawm neeg taw uas tus Tswv tso hauv lub nroog Xi-oos, ntawd yog Tswv Yexus, uas yog Lub Zwmtxwv Thib Ob ntawm Vaj Peb Leeg, yog lub pobzeb ntawm kaum tsev, yog lub plag ruaj khov rau cov uas ntseeg. Tu siab kawg li! Haivneeg Yixalayees tsis lees yuav Nws. Lawv tsis muab Tswv Yexus tso ua lub pobzeb txhim rau ntawm kaum tsev, uas yog lub plag ntawm txojkev ntseeg tiamsis ho muab tshem tawm. Lub pobzeb no thiaj dawm lawv taw ntog vim lawv pom Tswv Yexus tsis zoo li tus Mexiyas uas lawv tabtom tos, vim txojkev cawmdim los ntawm kev ntseeg hnov tsis zoo cuag kev coj raws txoj kevcai, vim tej uas tus Tswv qhia txawv tej uas neeg ntiajteb xav,… Ntawd yog vimchiv ua rau haivneeg Yixalayees nrhiav tsis tau kev ncajncees. Lawv cuab zog nrhiav tiamsis nrhiav tsis tau!
Timthawj Paulus qhia tshwm ib qhov tseeb: Yuav ua tsis tau neeg ncaj ncees los ntawm kev coj raws txoj kevcai tiamsis tsuas yog los ntawm txoj koob hmoov uas Vajtswv pub, thiab los ntawm kev ntseeg peb thiaj txais tau xwb. Txojkev ntseeg tseemceeb heev nyob hauv kev txais yuav tus Tswv txoj koob hmoov. Tus uas ntseeg Tswv Yexus yuav tau Vajtswv suav hais tias ncaj ncees thiab tau txojsia ntev dhawv mus ibtxhis (Yauhas 3:16). Thov tus Tswv pub rau peb txais yuav Cawmseej Yexus txoj koob hmoov los ntawm kev ntseeg thiab tas siab ntsws tshajtawm Tswv Yexus txojkev cawmdim rau lwm tus.
Thov Vajtswv,
Tus Tswv, thov ua Koj tsaug vim nyuam yaus tau suav hais tias ncaj ncees vim Koj txoj koob hmoov thiab nyuam yaus txojkev ntseeg! Nyuam yaus yuav tsis poob ntsejmuag thaum ntsib Koj. Thov pab nyuam yaus rhais ruam hauv txojkev ntseeg thiab coj tau coob leej los txais Koj txoj koob hmoov. Nyuam yaus tuav Yexus Khetos lub npe thov, Amees.
Ib tsoom cov mloog uas hmov thiab tshua,
Peb puas tseem tabtom ua haujlwm zoo kom tau kev ncaj ncees?
Nyeem Vajluskub hauv peb lub xyoos: Loos 8
Kênh Youtube BHKTHN:
