2 Kevcai 31:1-8
Nqe cim:
“Tus TSWV yuav mus ua Koj ntej thiab nrog nraim Koj. Nws yuav tsis ncaim Koj lossis tso Koj tseg; Koj tsis txhob poob siab lossis ntshai” (2Kevcai 31:8)
Lus nug rau sawvdaws xav:
– Mauxes ntuas, txhawb Vajtswv haivneeg thiab Yausuas li cas?
– Mauxes tej lus qhia pom leejtwg yog Tus thawjcoj loj tshaj?
– Zeem paub li no pab peb li cas rau hauv kev ua Vajtswv haujlwm?
Ua ntej mus nrog Vajtswv nyob, Mauxes tau hais tej lus txhawb zog rau cov Yixalayees. Mauxes totaub lawv zoo heev txog lawv tej kev txhawj, kev zoo siab uas yuav npaj mus ntaus txeeb lub tebchaws uas Vajtswv coglus tseg. Tej zaum, ib txoj kev txhawj hauv lawv lub sijhawm no yog Mauxes yuav tsis nrog lawv hla tus dej Yauladees mus rau tebchaws coglus. Mauxes yog lawv thawj tus thawjcoj thiab kuj yog tus uas nrog nraim lawv txij thaum tawm hauv tebchaws Iziv los txog rau lub sijhawm no. Mauxes yog ib tug thawjcoj uas txawj coj heev thiab pab tau Vajtswv haivneeg kawm tau ntau yam kawg nkaus li.
Zeem paub li no, txij nqe 3 mus txog rau nqe 8 Mauxes ntau zaus ntuas Vajtswv haivneeg hais tias, tsis yog nws lossis ib tug neeg twg, Vajtswv xwb thiaj yog tus mus ua ntej coj lawv kev. Cia li tso siab rau Vajtswv, tsis txhob tso siab rau nws. Tsis tas li ntawd Mauxes tseem hu Yausuas sawv rau Vajtswv haivneeg hauv ntej txhawb Yausuas zog, pab tus uas yuav hloov nws chaw kom tsis muaj kev txhawj, kev hnyav siab rau tes haujlwm uas Vajtswv cob. Qhov uas Mauxes ua, zoo li ib lub kevcai rau nws muab nws lub meejmom cob rau Yausuas tim ntsej tim muag ntawm Vajtswv haivneeg xubntiag. Ua ib tus thawjcoj txuas ntxiv, tsis muaj ib yam dab tsi yuav zoo thiab muaj nqis tshaj thaum uas tau Mauxes txhawb zog: “Tus TSWV yuav mus ua Koj ntej thiab nrog nraim Koj. Nws yuav tsis ncaim Koj lossis tso Koj tseg; Koj tsis txhob poob siab lossis ntshai” (nqe 8).
Ib tug thawjcoj ntawm sab ntsujplig yuavtsum zeem paub yam uas tseemceeb tshaj plaws hauv yus tes haujlwm coj yog Vajtswv, Nws yog tus Thawjcoj uas loj tshaj txeev mus ua ntej coj Nws haivneeg kev, Nws yog Tus “yuav tua txhua haivneeg uas nyob tid” kom yuav tau lawv lub tebchaws rau Nws haivneeg nyob, Vajtswv yeej tsis tawm lossis tso Nws haivneeg tseg. Tsis ua li cov thawjcoj ntiajteb no, yuam pejxeem yuavtsum mloog yus lus, siv hwjchim tswj pejxeem, tiamsis thawjcoj ntawm sab ntsujplig ces yuavtsum zoo li qhev ua haujlwm rau sawv daws. Ntawd thiaj yog tus uas Vajtswv siv ua tiav Nws lub homphiaj rau Nws haivneeg (Malakaus 10:42-45). Yog li ntawd, ib tus thawjcoj tsis yog tus coj kev thiab pab kom sawvdaws ua tiav Vajtswv tes haujlwm xwb, tiamsis yog txog thaum Vajtswv nrhiav ib tus los hloov yus chaw, yuavtsum zoo siab thiab txhawb tus uas Vajtswv xaiv ua thawjcoj ntawd zog, kom Vajtswv tes haujlwm thiaj yuav tsis tu ncua. Zeem paub Vajtswv yog Tus Thawjcoj uas loj tshaj pab tau peb txhua tus sib koom, sib pab ua tiav Nws lub homphiaj rau pawg ntseeg.
Thov Vajtswv:
Vajtswv, ua Koj tsaug, vim Koj yog tus thawjcoj uas muaj hwjchim loj tshaj plaws hauv Koj pawg ntseeg. Thov pab tagnrho peb txhua tus uas yog koj menyuam txeev mus raws Koj tus neev taw kom koom tes ua tiav tes haujlwm Koj muab cob. Nyuam yaus tuav Cawmseej Tswv Yexus lub npe thov, Amees.
Ib tsoom mloog uas hmov tshua,
Peb ua ib tus thawjcoj li cas kom pom hais tias Vajtswv thiaj yog tus thawjcoj uas muaj hwjchim loj rau hauv pawg ntseeg?
Nyeem Vajluskub hauv peb lub xyoos: Cov Thawjtswj 7
Kênh Youtube BHKTHN:
