Klei Aê Diê Blŭ: Klei Bi Hriêng 22:6,15
Êlan kliăng: “Ai tiê hđeh bŏ hŏng klei mluk, ƀiădah klei mkra hŏng giê srăng bi kbưi klei mluk anăn” (Klei Bi Hriêng 22:15)
Klei êmuh ksiêm mĭn: Pruê̆ blŭ “mkra hŏng giê” si čiăng lač? Si ngă klei mkra mjuăt bi hmăi kơ anak? Jing anak, si knuih brei drei mâo tơdah amĭ ama mkra mjuăt? Jing amĭ ama, si drei srăng mkra mjuăt anak?
Klei Bi Hriêng 22:15 bi mguôp mbĭt hŏng êlan 6 ti dlông: “Bi hriăm hđeh thâo êlan ñu srăng tui hlue, leh anăn tơdah ñu mduôn ñu amâo srăng weh ôh mơ̆ng êlan anăn.” Wăt tơdah mâo klei bi hriăm leh mơ̆ng hđeh, phung hđeh amâo dưi weh đuĕ ôh kơ klei ngă soh. Jih jang phung amĭ ama bi hriăm brei phung hđeh weh đuĕ sơăi kơ klei ngă soh, ƀiădah êjai ênuk digơ̆ hlăk krah digơ̆ khăng ngă bruă hŏng klei mluk, kƀah klei thâo mĭn. Klei Aê Diê Blŭ mtă brei amĭ ama “mkra hŏng giê” amâo djŏ čiăng lač kơ klei bi knap, bi ruă kơ asei mlei, bi êka kơ ai tiê ôh, ƀiădah čiăng lač kơ klei mkra mjuăt phung anak hŏng klei khăng. Jih jang klei ngă soh hŏng klei bhiăn Aê Diê, bi klăk hŏng klei kpă ênô phung đăo, brei amĭ ama khut khat bi hriăm phung anak weh đuĕ leh anăn lui hĕ. Tơdah amĭ ama amâo mâo mkra mjuăt hŏng klei khăng leh anăn amâo djŏ mmông ôh snăn klei mưng jhat, klei măk ƀai srăng djă păn kjăp amâodah kă hlăm ai tiê phung hđeh; ƀiădah, bi tơdah amĭ ama mkra mjuăt djŏ mmông, djŏ êlan hdră snăn phung hđeh srăng thâo kral klei soh leh anăn kmhal, lŏ wĭt kơ êlan kpă, klei djŏ. Klei mkra mjuăt hŏng klei djŏ srăng mprăp kơ phung hđeh grăp knhuang hdĭp djŏ tui si Klei Aê Diê Blŭ, tơdah digơ̆ prŏng leh digơ̆ srăng jing phung anak êkei leh anăn phung anak mniê mâo klei tŭ dưn kơ Khua Yang.
Hruê anei, arăng kăm amâo lŏ brei čăm anak ôh kyuadah mâo lu phung hđeh tŭ klei čăm biêng hlăm gŏ sang mơ̆ng phung amĭ, phung ama kƀah klei thâo săng, amâo thâo bi hriăm mjuăt phung anak, amâodah hŏng klei krêñ ngă klei bi êka kơ asei mlei leh anăn ai tiê phung anak. Ƀiădah amâo djŏ ôh amĭ ama lui tha amâo mđing ôh kơ klei bi hriăm phung anak. Aê Diê jao bruă bi hriăm mjuăt phung anak kơ amĭ ama kyuanăn bruă mkra mjuăt phung anak jing bruă yuôm bhăn snăk. Amâo djŏ ôh kyua tuôm hŏng klei dleh dlan hlăm bruă mkra mjuăt klei phung anak khăng kŏ, măk ƀai leh anăn kreh bi kdơ̆ng snăn lui hĕ klei mkra mjuăt anak. Brei amĭ ama gĭr bi hriăm anak lui jih klei mưng jhat leh anăn bi hriăm digơ̆ klei jăk hŏng Klei Aê Diê Blŭ. Tơdah khăp kơ anak brei drei bi hriăm anak Msĕ si Klei Bi Hriêng mtă leh: “Hlei pô amâo čăm mkra anak êkei ñu hŏng giê bi êmut kơ gơ̆ yơh, ƀiădah hlei pô khăp kơ gơ̆ kriăng mkra gơ̆” (Klei Bi Hriêng 13:24). Tơdah amâo mâo mkra mjuăt hŏng klei khăng ôh leh anăn mđhuk phung hđeh ênưih snăk atăt digơ̆ kơ klei ngă soh hŏng Aê Diê leh anăn hŏng mnuih.
Jing anak, brei drei thâo săng kyua khăp kơ anak kyuanăn yơh amĭ ama mkra mjuăt, tơdah amĭ ama mkra mjuăt drei hŏng giê, drei ruă sa amĭ ama ruă pluh. Jing amĭ ama, boh nik nak pô jing amĭ, brei jhŏng mkra mjuăt anak hŏng klei khăp, kyuadah tơdah mơâo mơŭng, anak srăng jing jhat, klei anăn srăng bi jhat kơ anak, kơ gŏ sang leh anăn kơ Phung Sang Aê Diê.
Si ngă drei bi hriăm leh anăn mkra mjuăt phung anak čô hlăm gŏ sang, hlăm Phung Sang Aê Diê hŏng klei khăng leh mơ̆?
Wah lač: Ơ Khua Yang, kâo lač jăk kơ Ih brei leh Klei Ih Blŭ đru kâo bi hriăm phung anak čô êbat tui êlan Ih. Brei kơ kâo mâo klei thâo mĭn hlăm klei bi hriăm leh anăn mkra mjuăt phung anak. Đru phung anak kâo thâo gưt asăp amĭ ama, lui jih klei soh, leh anăn hdĭp bi mơak kơ Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Phung Khua Phat Kđi 1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
