Pajlug 22:6, 15
Nqe cim:
“Tej menyuam yau yeej los ua li tej neeg uas tsis paub qabhau, tiamsis rab nplawm yuav qhia kom lawv paub coj tus yam ntxwv zoo” (Pajlug 22:15)
Lus nug rau sawvdaws xav:
– Lolus “rab nplawm” txhais li cas?
– Kev qhuab ntuas pab tau menyuam li cas?
– Yog menyuam, peb yuavtsum muaj tus cwjpwm li cas thaum niam txiv nplawm?
– Ua leej niam leej txiv, peb yuavtsum qhuab ntuas menyuam li cas?
Pajlug 22:15 tau txuas nrog rau nqe 6 uas sau ua ntej saud: “Qhia menyuam kom paub ua nws lub neej, nws yuav nco ntsoov tej lus ntawd mus tas nws sim neej” Txawm yog tau qhia txij thaum yau los, tiamsis menyuam yeej zam tsis dhau kev ua yuam kev. Niam txiv pheej qhia menyuam kom khiav deb kev txhaum, tiamsis txawm lawv twb muaj hnub nyoog lawm los lawv pheej nyiam ua yam vwm ntsuav, ruam thiab tsis ua tib zoo xav. Vajtswv Txojlus qhia cov ua niam txiv kom siv “rab nplawm” tsis tau txhais hais tias ua phem lossis ua rau menyuam lub cev raug mob lossis kev puas siab puas ntsws, tiamsis muaj lub ntsiab hais tias coj nruj hauv kev qhuab ntuas menyuam. Txhua tes haujlwm uas tawmtsam Vajtswv Txojlus, tawmtsam lub neej ntseeg, niam txiv yuavtsum ua nruj qhia menyuam yuavtsum tso tseg, khiav deb. Yog niam txiv qhuab ntuas tsis nruj, tsis yog sijhawm ces kev puas, kev xyaum phem “yeej nyob hauv menyuam lub siab” (nqe 15 HMOWSV) tiamsis yog niam txiv qhuab ntuas yog sijhawm, yog cai ces menyuam yuav paub nws kev txhaum, kho qhov yuam kev, tig rov los taug txoj kev zoo. Qhuab ntuas yog pab tau menyuam ib kauj ruam zuj zus ua neej yog li Vajtswv Txojlus qhia, thaum loj hlob yuav dhau los ua cov tub cov ntxhais muaj nqis rau Vajtswv.
Niaj hnub nimno, tebchaws txwv tsis pub ntaus menyuam vim muaj ntau tus menyuam raug tsim txom nyob hauv tsev neeg, los ntawm cov niam txiv tsis muaj kev paub thiab kev xav cob qhia menyuam, lossis kev npau taws sai ces ntaus menyuam sab thiab ua rau puas siab ntsws. Tiamsis qhov ntawd tsis tau txhais hais tias niam txiv tso tseg tsis quav ntsej kev cob qhia menyuam. Vajtswv tau muab lub luag haujlwm cob qhia menyuam rau peb cov uas niam txiv, yog li ntawd kev qhuab ntuas menyuam yeej yog qhov uas tseemceeb. Hauv kev cob qhia menyuam muaj kev khwv vim menyuam kheev muaj tus cwjpwm tawv ncauj, tsis mloog lus, tawmtsam tiamsis tsis txhob vim li ntawd tso tseg kev tsis nplawm menyuam. Niam txiv yuavtsum ua siab ntev qhia menyuam tshem tawm tej kev xyaum phem tseg, thiab yuavtsum tu menyuam los ntawm tus cwjpwm mos muag raws li Vajtswv Txojlus qhia. Hlub menyuam yuavtsum qhuab ntuas menyuam raws li phau Pajlug qhia: “Tus uas tsis siv rab nplawm kuj yog ntxub nws tus tub, tus uas hlub nws tus tub yeej yuav ua tib zoo nplawm qhuab qhia” (Pajlug 13:24). Tsis qhuab ntuas nruj thiab cia menyuam ua raws nws siab nyiam yuav yooj yim coj lawv mus rau kev txhaum tawmtsam Vajtswv thiab tib neeg.
Ua menyuam yuavtsum totaub hais tias niam txiv hlub thiaj qhuab ntuas, thaum niam txiv nplawm yus ib nplawg, yus mob ib, tiamsis niam txiv mob tshaj pes tsawg npaug lawd saud. Ua niam txiv, tshwjxeeb tus niam yuavtsum muaj lub siab tawv qhuab ntuas yus cov menyuam rau hauv kev hlub, tiamsis yog peb cia menyuam ua raws li nws siab nyiam, ces menyuam yuav ua kev phem rau nws tus kheej, tsev neeg, tebchaws thiab pawg ntseeg huv tibsi.
Thov Vajtswv:
Tus Tswv, Nyuamyaus ua Koj tsaug uas tau pub Koj Txojlus pab nyuamyaus cob qhia me nyuam ua neej taug Koj txoj kev. Thov pub rau nyuam yaus muaj tswvyim cob qhia, qhuab ntuas menyuam. Thov Koj pab kom nyuam yaus cov menyuam paub mloog niam txiv lus, txawj tso tseg yam uas lawv ua yuam kev thiab paub ua neej haum Vajtswv siab. Nyuam yaus tuav Cawmseej Tswv Yexus lub npe thov, Amees.
Ib tsoom mloog uas hmov tshua
Peb puas tau coj nruj qhuab ntuas menyuam raws li kev cob qhia menyuam hauv tsev neeg hauv pawg ntseeg tsis tau?
Nyeem Vajluskub hauv peb lub xyoos: Cov Thawjtswj 1
Kênh Youtube BHKTHN:
