Klei Aê Diê Blŭ: Klei Bi Hriêng 29:11
Êlan kliăng: “Mnuih mluk bi êdah jih klei ñu ngêñ, ƀiădah mnuih thâo mĭn kơ̆ng klei ñu ăl.” (Klei Bi Hriêng 29:11)
Klei êmuh ksiêm mĭn: Ya klei mdê ti krah “mnuih mluk” leh anăn “mnuih thâo mĭn” hlăm klei bi êdah klei mĭn ai tiê? Si yuôm klei bi êdah anei hlăm klei bi tăng mgăl? Si êlan Klei Bi Hriêng anei đru drei mgaih mkra klei bi mgăl?
Tui si hră mblang King James Version mblang êlan Klei Bi Hriêng anei snei: “mnuih mluk hưn jih ai tiê ñu pô, ƀiădah mnuih thâo mĭn srăng kơ̆ng tơl truh kơ êdei”.
Snăn, “mnuih mluk” jing mnuih ruăt kuăt hưn jih ya klei ñu mĭn, wăt klei amâo yuôm hưn ôh, leh anăn lač hŏng knuih amâo năng mâo ôh, hŏng klei “ngêñ”. Lu mnuih lač dah mnuih msĕ snăn kpă ênuah, hdĭp sĭt, si mĭn si blŭ yơh, ƀiădah Klei Aê Diê Blŭ lač snei, anăn jing klei bi knăl kơ phung “mnuih mluk”. Phung khăng hưn ktưn nanao kơ diñu jing “mnuih hdĭp sĭt kpă”, si bi mĭn lač snăn yơh, srăng ƀuh snei, srăng jing jăk hĭn lu snăk tơdah ka tuôm lač ôh, ƀiădah hlăk thâo săng klei anei jing êla đei leh yơh. Mâo lu mnuih tơdah tlă anăp hŏng klei amâo bi djŏ hlăm sang Aê Diê, hlơr ăl krêñ mtam, yua boh blŭ ktrŏ kjham hŏng phung tuôm jing ayŏng amai adei pô, ruăt kuăt čih mdah hlăm internet klei blŭ jhat hdơ̆ng pô, êran mơ̆ng sang anei kơ sang adih hiu blŭ jhat kơ mnuih drei bi êmut čiăng bi hrăp ai… răng bĕ huĭdah lĕ hlăm klei jing msĕ si “mnuih mluk bi êdah jih klei ñu krêñ”. Ƀiădah “mnuih thâo mĭn” srăng “bi êdu leh anăn kơ̆ng klei ăl”, pruê̆ blŭ anei ăt mblang jing bi êđăp amâodah kriêp ñăt (Klei Mmuñ Hđăp 65:7; 89:9). Snăn, mta čuăn mơ̆ng “mnuih thâo mĭn” amâo djŏ ôh kơ̆ng pioh klei ăl kăp guôn mâo hruê mmông srăng bluh mtuh, ƀiădah knang kơ klei pap Khua Yang lăm luihĕ klei ăl krêñ, msĕ si “Khua Yang brei ênai ktang êa ksĭ poh yă dôk kriêp ñăt”, ngă bi “kriêp ñăt” angĭn poh yă jhŏng ktang.
“Kơ̆ng klei ñu ăl” tơl hbĭl? Tơl truh kơ djŏ hruê mmông leh anăn anôk djŏ găl. Năng ai drei đĭ ai kyua sa čô “mnuih mluk” ti krah anôk lu mnuih, ƀiădah “mnuih thâo mĭn” amâo srăng lŏ wĭt ngă mmông anăn mtam ôh, ƀiădah akâo kơ Khua Yang pap brei leh anăn năng ai dưi bi tuôm hjăn hŏng “mnuih mluk” čiăng dưi đru rŭ mdơ̆ng diñu. Ƀiădah năng ai lu mta klei mâo, knŏng dưi bi grăng tơl mmông drei wĭt hŏng Khua Yang! Blŭ mdê, mâo đa mta klei drei amâo knŏng kơ̆ng ôh, ƀiădah wăt brei hlŏng wơr bĭt hĕ!
Jing phung đăo kơ Krist, drei amâo blŭ klei luar ôh (Êphêsô 4:25), amâo blŭ klei bi mklăk hŏng ai tiê klei mĭn drei ôh, ƀiădah klei anăn amâo djŏ ôh jing klei hưn bi êdah jih djăp mta klei amâo djŏ mmông, amâo djŏ anôk leh anăn amâo djŏ mnuih. Drei amâo blŭ ôh ya mta klei êngao kơ klei sĭt kpă, ƀiădah akâo kơ Aê Diê brei kơ drei klei thâo mĭn, čiăng thâo hŏng hlei pô drei năng blŭ leh anăn hŏng hlei pô drei amâo yuôm ôh blŭ, čiăng kơ ya mta klei drei blŭ srăng ba klei đru rŭ kơ pô dôk hmư̆.
Si ngă drei mâo klei mĭn čiăng blŭ djŏ mmông, djŏ anôk, djŏ mnuih mơ̆?
Wah lač: Ơ Khua Yang, akâo Khua Yang đru kâo mâo klei thâo mĭn čiăng thâo hbĭl năng blŭ, leh anăn knŏng blŭ klei năng, čiăng kơ đăm bi têč hnêč ayŏng amai adei kâo. Akâo Khua Yang brei kâo dưi đru rŭ hdơ̆ng hmei hŏng klei blŭ djŏ găl. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yôsuê 17
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
