Klei Aê Diê Blŭ: Philip 1:27-30
Êlan kliăng: “… dôk kjăp sa ai, sa klei mĭn mđrăm mbĭt čiăng mgang klei đăo kơ klei mrâo mrang jăk, leh anăn amâo mâo klei huĭ ôh kơ phung roh diih.” (Philip 1:27)
Klei êmuh ksiêm mĭn: Khua ƀĭng kna Y‑Pôl iêô mthưr phung đăo ti Philip si brei dôk hdĭp? Si brei phung đăo kơ Krist wĭt ngă ti anăp klei lăn ala bi kdơ̆ng? Si klei guh kơang Khua Yang ƀuăn brei kơ drei tơdah tŭ klei knap mñai kyua Khua Yang?
Khua ƀĭng kna Y‑Pôl iêô mthưr phung đăo ti Philip brei dôk hdĭp năng hŏng Klei Mrâo Mrang Jăk Yang Krist. Boh blŭ “hdĭp năng” mblang jing dôk dơ̆ng ƀơ̆ng huă djŏ tui si anăn pia kơ sa čô mnuih buôn sang. Philip jing sa boh ƀuôn prŏng phung Rôm kiă kriê (Bruă Phung Khua Ƀĭng Kna 16:12) kyuanăn phung ƀuôn sang mâo klei dưi jing phung ƀuôn sang Rôm leh anăn diñu kdrưk mơak kyua klei anăn. Khua ƀĭng kna Y‑Pôl mâo klei mĭn čiăng mñă kơ phung đăo, tơdah diñu mâo klei kdrưk mơak leh anăn si klei dôk hdĭp năng djŏ hŏng klei jing phung ƀuôn sang Rôm, brei hdơr diñu ăt jing phung ƀuôn sang Ƀuôn Ala Mtao Adiê msĕ mơh (Philip 3:20) kyuanăn brei dôk dơ̆ng ƀơ̆ng huă bi năng nanao hŏng Klei Mrâo Mrang Jăk Yang Krist. Phŭn knhal kơ klei ñu iêô mthưr phung đăo msĕ snăn, kyuadah dôk mâo klei bi kdơ̆ng hgăm. Digơ̆ dôk tŭ klei bi kah, ngă jhat mơ̆ng phung roh.
Jing phung đăo kơ Krist, drei amâo bi kngăr ôh tơdah phung lăn ala bi kdơ̆ng, ñĕ đuĕ. Satan amâo čiăng ôh mâo hlei pô tui hlue Khua Yang. ñu srăng dưm klei mplư ti êlan klei hdĭp drei, leh anăn kăn čiăng mơh drei kah mbha klei đăo drei kơ pô mkăn. Kyuanăn, brei drei dôk răng nanao, čiăng ñĕ đuĕ mơ̆ng jih jang klei mplư hgăm, leh anăn čuăn ai tiê amâo huĭ ôh ti anăp klei phung roh ksŭng ngă kơ drei (êlan 27).
Khua ƀĭng kna Y‑Pôl brei thâo, phung roh srăng rai tuč, bi drei srăng mâo klei bi mtlaih. Kyuanăn, phung anak Aê Diê đăm huĭ, đăm êdu ai ôh ti anăp klei bi kdơ̆ng, ƀiădah mklăk wĭt brei dlăng klei anăn jing sa klei pap tơdah tŭ klei knap mñai kyua Anăn Khua Yang. Drei hlăk dôk mbĭt hlăm sa kdrăn blah hŏng phung khua ƀĭng kna, leh anăn ti anôk anăn mâo nanao Khua Yang dôk mbĭt. Khua ƀĭng kna Y‑Pôl lač klă, kyuadah hŏng Yang Krist, drei amâo djŏ knŏng đăo kơ Krist ôh, ƀiădah wăt tŭ klei knap mñai kyua Ñu msĕ mơh (êlan 29).
Phung đăo kơ Krist sĭt nik srăng tuôm hŏng klei arăng ngă jhat tơdah tui hlue Khua Yang leh anăn dôk hdĭp tui si hnơ̆ng čuăn Klei Aê Diê Blŭ mtô. Ƀiădah jing leh anak Aê Diê snăn klei drei kñăm čiăng jing msĕ si Ñu. Leh anăn hlăm knhuang jing doh jăk, drei srăng kah mbha mbĭt klei knap mñai mbĭt hŏng Khua Yang Pô Bi Mtlaih drei. Khua ƀĭng kna Y‑Pôl lač leh, drei jing phung dưn ngăn mbĭt hŏng Yang Krist snăn srăng tŭ klei knap mñai mbĭt hŏng Ñu mơh, ƀiădah ti knhal tuč drei srăng mâo klei guh kơang mbĭt hŏng Ñu (Rôm 8:17-18). Phung anak Aê Diê hmiêt mkăp tŭ drông klei arăng ñĕ đuĕ, ngă jhat kyua Anăn Khua Yang leh anăn thâo kral klei anăn jing klei mơak tơdah kah mbha mbĭt klei knap mñai mbĭt hŏng Khua Yang. Khua Yang amâo brei klei lông dlăng truh êgao kơ hnơ̆ng drei dưi tŭ ôh (I Kôrantô 10:13), leh anăn Ñu nao mbĭt hŏng drei nanao ktuê êlan dleh knap anăn. Kyuanăn, drei čuăn ai tiê amâo huĭ ôh ti anăp klei phung roh bi kdơ̆ng.
Si ngă drei huĭ mơ̆, kdŭn tluôn mơ̆ tơdah tuôm hŏng klei bi kdơ̆ng mơ̆ng phung lăn ala?
Wah lač: Ơ Khua Yang, dôk hdĭp ti krah lăn ala, kâo tŭ klei arăng ñĕ đuĕ, ngă jhat nanao. Akâo Khua Yang đru kâo mâo djăp klei ktang tlă anăp hŏng klei phung roh bi kdơ̆ng leh anăn amâo huĭ ôh. Akâo Khua Yang brei kâo mâo klei êđăp ênang leh anăn đăo knang kơ Khua Yang nanao. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y‑Yôhan 4
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
