Filipis 1:27-30
Nqe cim:
“…nej muab siab rau ntseeg thiab ua ib lub siab tawmtsam yeebncuab kom yeebncuab tsis txhob rhuav tau Txojmoo Zoo uas nej ntseeg.” (Filipis 1:27)
Lus nug rau sawvdaws xav:
– Timthawj Paulus nqua hu cov ntseeg nyob hauv nroog Filipis yuav tsum ua neej zoo li cas?
– Cov ntseeg Yexus tsimnyog ua li cas thaum raug ntiajteb tawmtsam?
– Vajtswv Txojlus cog tseg tias peb yuav tau dabtsi thaum tiv txomnyem vim tus Tswv?
Timthawj Paulus nqua hu cov ntseeg nyob hauv nroog Filipis yuav tsum ua neej kom phim Yexus Txojmoo Zoo. Nqe lus “ua lub neej raws li” muaj lub ntsiab hais tias ua neej kom tsimnyog lub npe hu ua tus ntseeg Txojmoo Zoo. Filipis yog ib lub nroog uas cov nomtswv Loos kav (Tes Haujlwm 16:12) yog li tus pejxeem uas muaj npe ua pejxeem Loos, lawv txaus siab rau qhov ntawd. Timthawj Paulus xav qhia kom cov ntseeg cia li txaus siab thiab ua neej kom tsimnyog qhov uas lawv tau ua pejxeem Loos li cas, ces lawv kuj yuav tsum nco ntsoov lawv yog pejxeem qaum ntuj thiab (Filipis 3:20) yog li yuav tsum ua neej kom phim Yexus Khetos Txojmoo Zoo. Qhov keebtiv Paulus nqua hu cov ntseeg li ntawd yog vim muaj tej kev tawmtsam tabtom tshwm tuaj. Lawv raug ntau yam kev ntxub, tsimtxom ntawm tej yeebncuab.
Yog tus ntseeg Yexus, peb tsis nyuaj siab thaum raug lub ntiajteb tawmtsam, ntxub peb. Dab ntxwgnyoog tsis xav kom leejtwg nrog tus Tswv mus. Nws yuav muab tej kev sim siab los tso rau ntawm txojkev peb mus thiab tsis xav kom peb qhia kev ntseeg rau lwm tus. Yog li ntawd, peb yuav tsum ceevfaj, ua tib zoo saib kom tsis raug tej kev sim siab thiab tsis ntshai yeebncuab txojkev tawmtsam (nqe 27).
Timthawj Paulus qhia paub peb tus yeebncuab yuav raug puastsuaj, peb yuav dim. Yog li, Vajtswv cov menyuam tsis ntshai, tsis qaug zog thaum ntsib tej kev tawmtsam, yuav tsum saib tej ntawd zoo li koob hmoov tiv vim tus Tswv lub npe. Peb tabtom nrog cov timthawj taug ib txojkev mus, thiab qhov ntawd muaj tus Tswv nrog nraim. Timthawj Paulus hais tias, los ntawm Yexus Khetos, peb tsis yog tau txais koob hmoov los ntseeg xwb tiamsis tseem tau nrog tus Tswv tiv txomnyem thiab (nqe 29).
Cov ntseeg Yexus yeej yuav ntsib kev tsimtxom thaum nrog tus Tswv mus thiab ua lub neej raws li Vajtswv Txojlus qhia. Tiamsis peb yog Vajtswv menyuam ces peb lub homphiaj yog ua kom zoo li tus Tswv ua. Thiab lub neej ua tus ntseeg dawbhuv, peb yuav tsum koom nrog yus tus Tswv tiv txomnyem. Timthawj Paulus hais tias, peb yog cov uas tau txais koob hmoov nrog Yexus Khetos, yog li peb kuj yuav tsum raug txomnyem ib yam li Yexus Khetos, thaum kawg peb kuj yuav tau lub tshwjchim ci ntsa iab nrog Nws (Loos 8:17-18). Vajtswv cov menyuam txaus siab hlo raug kev ntxub, tsimtxom vim tus Tswv lub npe, thiab zeem paub qhov ntawd yog ib txojkev tau qhuas vim nrog tus Tswv tiv kev mob. Tus Tswv tsis cia peb raug sim siab hnyav dhau qhov peb tiv taus (I Kauleethaus 10:13), thiab Nws niaj hnub nrog nraim peb. Yog li, peb tsis ntshai thaum raug yeebncuab tawmtsam.
Thov Vajtswv,
Vajtswv, ua neej nyob hauv lub ntiajteb no, nyuam yaus niaj hnub raug tej neeg ntiajteb ntxub, tsimtxom. Thov Koj pab kom nyuam yaus txaus zog nyiaj tiv yeebncuab tej kev tawmtsam thiab tsis ntshai. Thov Koj pub kev kaj siab thiab kev ntseeg Koj rau nyuam yaus. Nyuam tuav Tswv Yexus lub npe thov, Amees.
Peb puas txhawj ntshai, thaub rov thaum ntsib lub ntiajteb tawmtsam?
Nyeem Vajluskub hauv peb lub xyoo: Yauhas 4
Kênh Youtube BHKTHN:
