Klei Aê Diê Blŭ: Y-Yôsuê 5:13-15
Êlan kliăng: “Gơ̆ lač, “Hơăi, kâo jing khua kơ phung kahan Yêhôwa. Snăn yơh kâo hriê anei.” Y-Yôsuê kŭp ƀô̆ ti lăn kkuh mpŭ, leh anăn lač kơ gơ̆, “Ya klei khua kâo mtă kơ dĭng buăl ih?” (Y-Yôsuê 5:14)
Klei êmuh ksiêm mĭn: Leh mprăp jih djăp mta klei kơ phung ƀuôn sang, ya klei Aê Diê čiăng kơ Y-Yôsuê thâo kral hlei Ñu Pô jing? Si hnơ̆ng yuôm kơ klei thâo săng anei? Hlei Pô Aê Diê jing sĭt hŏng drei?
Y-Yôsuê dôk gĭt gai phung ƀuôn sang Aê Diê bi blah mă čar Kanaan. Êlâo kơ klei bi blah prŏng Yêrikô, Aê Diê čiăng kơ ñu thâo săng djŏ si anôk Aê Diê jing hŏng ñu leh anăn hŏng jih jang phung ƀuôn sang Israel.
Mta klei tal sa brei thâo săng, wăt tơdah Y-Yôsuê gĭt gai phung ƀuôn sang Aê Diê, ƀiădah Aê Diê yơh jing Pô Gĭt Gai Ti Dlông Hĭn. Brei Y-Yôsuê đup gưt kơ Ñu (êlan 14). Brei hdơr bĕ snei, amâo mâo ôh anôk mkăn pioh kơ Aê Diê hlăm grăp cô leh anăn hlăm Phung Sang Aê Diê jing mdê hĭn kơ anôk Pô Gĭt Gai Ti Dlông Hĭn. Thâo săng klei anei, đru kơ drei jih ai tiê kkuh mpŭ leh anăn luă gŭ ti anăp Aê Diê. Kkuh mpŭ kơ Aê Diê brei dưm êlâo hĭn hlăm grăp čô leh anăn Phung Sang Aê Diê. Lu phung đăo lui klei rŭng răng hlăm klei hdĭp ngă bi gun kpăl klei kkuh mpŭ kơ Aê Diê, leh anăn, anăn yơh jing sa hlăm lu mta phŭn knhal diñu dluh lĕ tơdah tlă anăp hŏng klei lông dlăng hlăm ƀuôn sang.
Mta klei tal dua, Aê Diê jing Pô bi blah brei kơ drei. “Êjai Y-Yôsuê dôk giăm ƀuôn Yêrikô, ñu kngưr ală dlăng. Nĕ anei, sa čô êkei dôk dơ̆ng ti anăp ñu djă đao gưm hliê. Y-Yôsuê nao kơ gơ̆ leh anăn lač, “Ih tĭng kơ hmei, amâodah tĭng kơ phung roh hmei?” (êlan 13). Đao gưm Khua Yang dôk djă jing “đao gưm hliê”. Amâo djŏ phung ƀuôn sang Aê Diê bi blah hŏng Yêrikô jhŏng ktang ôh, ƀiădah Aê Diê Pô yơh. Ñu ăt kăn tuôm lui drei leh anăn Phung Sang Aê Diê Ñu hlăm klei bi blah hlăm mngăt grăp hruê rei. Thâo săng klei anei jing yuôm snăk đru drei dưi găn gao jih klei lông dlăng leh anăn klei dleh dlan truh hlăm klei hdĭp. Lu phung đăo huĭ luč bruă knuă amâo srăng lŏ mâo prăk kăk hdĭp mda, si ngă drei đăo mơ̆ snei, drei dôk hdĭp amâo djŏ kyua bruă knuă ôh, ƀiădah kyua Aê Diê brei? Bruă knuă knŏng jing mnơ̆ng yua ba. Kyuadah drei amâo đăo msĕ snăn, kyuanăn yơh drei yap bruă knuă jing yuôm hĭn kơ Khua Yang leh anăn klei kkuh mpŭ kơ Ñu.
Mta klei tal tlâo, Aê Diê jing Pô Doh Jăk, “Khua kơ phung kahan Yêhôwa lač kơ Y-Yôsuê, “Toh hĕ hdruôm jơ̆ng ih, kyuadah anôk ih dôk dơ̆ng anăn jing anôk doh jăk pioh kơ Aê Diê.” Leh anăn Y-Yôsuê ngă snăn” (êlan 15). Aê Diê jing Doh Jăk leh anăn Phung Sang Aê Diê čiăng dôk kjăp ăt brei hdĭp hlăm klei doh jăk msĕ mơh. Kyuanăn, grăp čô anak ƀuôn sang Aê Diê leh anăn Phung Sang Aê Diê brei bi đru hdơ̆ng pô čiăng dưi hdĭp doh jăk. “Anôk ih dôk dơ̆ng anăn jing anôk doh jăk” čiăng lač ti anôk mâo Khua Yang dôk anôk anăn jing anôk doh jăk yơh, jing anôk pioh hjăn kơ Ñu, leh anăn kyuanăn, klei hdĭp drei pô leh anăn Phung Sang Aê Diê yơh jing Sang Yang kơ Khua Yang dôk. Klei Aê Diê Blŭ lač, “Kyuadah Kâo jing Yêhôwa, …snăn brei diih jing doh jăk, kyuadah Kâo Pô jing Doh Jăk” (Bruă Lêwi 11:45).
Thâo kral kơ Khua Yang jing Pô Gĭt Gai Ti Dlông Hĭn, Pô Doh Jăk dôk bi blah brei kơ drei hlăm klei bi blah mngăt myang, đru drei dôk kjăp găn gao klei lông dlăng êjai hdĭp klei hdĭp đăo ti krah lăn ala.
Si ngă drei čuăn đup gưt Khua Yang gĭt gai tơl knhal tuč tơdah tuôm hŏng klei dleh dlan mơ̆?
Wah lač: Ơ Khua Yang, kâo myơr klei hdĭp kâo kơ Ih. Akâo Ih jing Khua Yang leh anăn jing Khua kơ klei hdĭp kâo. Wăt tơdah klei hdĭp lu lĭn klei lông dlăng, brei kâo đup gưt knŏng hjăn klei Khua Yang gĭt gai čiăng dưi găn gao. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mtô Mñă Klei Bhiăn 10
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
