Yausuas 5:13-15
Nqe cim:
“Tus txivneej ntawd teb hais tias: Kuv tsis yog tog twg tubrog li. Kuv los no yog los ua tus TSWV pab tubrog tus thawj. Yausuas txhos caug ntua pe thiab hais tias: Tus tswv, kuv yog koj tus tubtxib, koj xav kom kuv ua dabtsi?” (Yausuas 5:14)
Lus nug rau sawvdaws xav:
– Tomqab npaj txhua yam rau cov pejxeem, Vajtswv xav kom Yausuas zeem paub hais tias Nws yog leejtwg?
– Qhov kev zeem paub no tseemceeb licas?
– Vajtswv yog tus zoo licas nyob hauv peb lubneej?
Yausuas tabtom coj tus Tswv haivneeg mus txeeb tebchaws Kana-as. Ua ntej yuav mus tua lub nroog Yelikaus, Vajtswv xav kom Yausuas zeem paub tseeb meej txog tus Tswv qhov chaw nyob hauv Yausuas thiab cov Yixalayees.
Yam xubthawj yuav tsum zeem paub yog, Yausuas ua tus coj tus Tswv haivneeg tiamsis Vajtswv thiaj yog tus Thawjcoj Uas Loj Tshajplaws. Yausuas yuav tsum mloog Nws lus (nqe 14). Yuav tsum nco ntsoov hais tias Vajtswv qhov chaw hauv peb tus kheej thiab peb Pawg Ntseeg yog ua Tus Thawjcoj Uas Loj Tshajplaws. Qhov kev zeem paub no pab peb tas siab tas ntsws pehawm tus Tswv thiab txo hwjchim tabmeeg Nws. Kev pehawm yuav tsum yog yam tseemceeb xubthawj ntawm txhua tus thiab Pawg Ntseeg. Coob tus ntseeg cia tej haujlwm, kev txhawjxeeb ua rau lawv tsis quavntsej kev pehawm, thiab ntawd yog ib ntawm tej vimchiv ua rau lawv raug swb thaum ntsib tej kev sim siab hauv lubneej.
Yam thib ob, Vajtswv yog Tus pab peb ntaus rog. “Thaum Yausuas lawv mus ze lub nroog Yelikaus, nws pom ib tug txivneej tuav rawv ib rab ntaj sawv ntawm nws hauv ntej” (nqe 13). Rab ntaj uas tus Tswv tabtom tuav rawv yog rab ntaj twb rho tawm hauv plhaub lawm. Tsis yog tus Tswv haivneeg mus tua lub nroog Yelikaus uas muaj zog tiamsis Vajtswv yog tus mus tua. Tus Tswv yeej yuav tsis tso peb thiab Nws Pawg Ntseeg povtseg hauv pluav rog sab ntsujplig. Qhov kev zeem paub tseemceeb no muaj peevxwm pab peb hla dhau tej kev sim siab thiab kev txomnyem hauv lubneej. Coob tug ntseeg ntshai poob haujlwm ces yuav tsis muaj nyiaj txiag siv hauv lubneej, tiamsis peb puas ntseeg hais tias peb muaj sia nyob tsis yog vim muaj haujlwm ua tiamsis yog tus Tswv pub rau peb? Tes haujlwm tsuas yog ib txojkev pab xwb. Twb yog vim peb tsis ntseeg li ntawd, thiaj muaj coob leej yeem tso tus Tswv thiab kev pehawm tseg mus ua haujlwm!
Yam thib peb, Vajtswv yog Tus Dawbhuv, “Tus Tswv pab tubrog tus thawj hais rau Yausuas hais tias: Cia li hle koj nkawm khau, vim thaj chaw uas koj sawv ko yog qhov chaw dawbhuv. Yausuas txawm ua li nws hais” (nqe 15). Vajtswv yog Tus Dawbhuv thiab Pawg Ntseeg xav sawv ruaj yuav tsum ua lubneej dawbhuv. Vim li ntawd, tus Tswv cov menyuam txhua tus thiab Pawg Ntseeg yuav tsum sib pab kom ua tau lubneej dawbhuv. “Thaj chaw uas koj sawv ko yog qhov chaw dawbhuv” muaj lub ntsiab hais tias thaj chaw twg muaj tus Tswv nyob ces ntawd yog thaj chaw dawbhuv, yog qhov chaw tshwj tseg rau tus Tswv, thiab vim li ntawd, peb lubneej thiab Pawg Ntseeg yog lub Tuamtsev uas tus Tswv nyob. Vajtswv Txojlus qhia tias, “Kuv yog tus TSWV uas coj nej tawm nram tebchaws Iziv los, kuv thiaj yog nej tus Vajtswv. Nej yuav tsum ua neeg dawbhuv, rau qhov kuv yog tus uas dawbhuv” (Levis Kevcai 11:45).
Zeem paub hais tias tus Tswv yog tus Thawjcoj Uas Loj Tshajplaws, yog tus Dawbhuv pab peb ntaus rog sab ntsujplig, yuav pab peb khov kho tiv dhau tej kev sim siab thaum ua neej ntseeg nrog neeg ntiajteb.
Thov Vajtswv,
Tus Tswv, nyuam yaus thov fij lubneej rau Koj. Thov Koj ua tus Tswv tswjkav nyuam yaus lubneej. Txawm yuav ntsib tej kev sim siab, thov kom nyuam yaus mloog Koj lus kom tiv dhau. Nyuam yaus tuav Yexus Khetos lub npe thov, Amees.
Peb puas ua ib siab mloog tus Tswv lus kom kawg thaum ntsib tej kev sim siab, txomnyem?
Nyeem Vajluskub hauv peb lub xyoos: II Kevcai 8.
Kênh Youtube BHKTHN:
