Klei Aê Diê Blŭ: Klei Bi Hriêng 7:14-23
Êlan kliăng: “Lač bĕ kơ klei knhâo, “Ih jing amai kâo,” leh anăn pia klei thâo mĭn jing mah jiăng ih čiăng kơ diñu mgang ih kơ mniê knhông, kơ mniê tă tăn blŭ klei myâo mă.” (Klei Bi Hriêng 7:4-5)
Klei êmuh ksiêm mĭn: Si klei blŭ mplư mniê knhông yua čiăng kăp mplư êkei hlăk ai? Ya êlan čiăng dưi găn klei mplư? Ya klei hưn êlâo brei drei răng mơ̆ng klei hriăm hruê anei, hlăm klei mđing hmư̆ hlăk dôk tlă anăp hŏng klei mplư lač kluôm, leh anăn hŏng klei mplư kơ klei êkei mniê?
Mbĭt hŏng kdrăp ti êngao kčŭt mčhur ai tiê, klei blŭ jing sa hlăm lu mta mnơ̆ng bi blah jhat ktang hĭn Satan khăng yua pioh bi kdơ̆ng hŏng drei. Boh nik nak klei mplư kơ klei êkei mniê. Êlâo hĭn, mniê knhông jum drông êkei hlăk ai hŏng klei blŭ mjĕ mjuk leh anăn myâo, “Snăn kâo kbiă čiăng bi tuôm hŏng ih, čiăng duah ih, leh anăn kâo ƀuh ih yơh!” (êlan 15). Klei blŭ anei dưi thâo săng snei: “Klei drei bi tuôm anei amâo djŏ tăm drăm ôh, ƀiădah kâo dôk guôn ih mơ̆ng sui leh!” Ti anăp klei blŭ bi mđĭ msĕ si mâo siap, êkei hlăk ai ênưih snăk mĭndah ñu pô jing mrô sa, leh anăn ñu yơh jing mdê hĭn hŏng mniê anăn, ngă kơ ñu tluh ƀô tơl amâo lŏ săng êmăng, amâo thâo kral ôh kơ ñu knŏng jing mnuih tŭ klei jŭ jhat kơ klei tluh kơ kđeh, leh anăn klei ñu srăng jing amâo mdê hĭn hŏng hlô mnơ̆ng ôh (êlan 22-23).
Leh anăn mniê anăn lŏ blŭ ƀuăn kčŭt mčhur klei khăp ngă kơ boh kŏ dlô êkei hlăk ai phiơr đĭ hŏng klei mĭn dôk bi ƀuh klei diñu bi hrăp bi mơak diñu pô hŏng klei khăp jăk mơak êdi yơh (êlan 16-18). Knhal tuč mniê anăn juh mlur êkei hlăk ai lĕ tơdah lač ung ñu đuĕ hiu leh, sui kơh lŏ wĭt kơ sang. Klei blŭ juh mlur anei tŭ êdi kyua amâo mâo pô srăng thâo ôh klei diñu ngă leh anăn amâo mâo boh jhat ôh, ƀiădah anei knŏng jing klei blŭ luar. Hlăm Klei Bi Hriêng 6:33-35 ama brei anak thâo kơ boh jhat rŭ ênua ktang tĭt mơ̆ng ung mniê knhông. Kdlưn hĭn, sa mta klei phung mplư amâodah phung arăng mplư amâo mđing ôh, anăn jing, ti tluôn ƀăng bhă mnuih amâo ƀuh klei čhŏ mrŏ diñu ngă ƀiădah Aê Diê ăt ƀuh jih leh anăn srăng phat kđi.
Hlăm Klei Bi Hriêng 7:4-5, Mtao Y-Salômôn bi êdah dua êlan hgăm đru drei dưi găn klei lông dlăng tơdah arăng mplư hŏng klei blŭ. Tal sa, dlăng bĕ kơ klei knhâo msĕ si “amai” pô. Mdê hŏng amĭ ama, amai khăng jĕ giăm hŏng adei hĭn, kyuanăn amai khăng thâo săng ai mĭn, klei adei pô ngă. Năng ai amâo mâo ôh sa čô adei êkei čiăng hĕ amai ƀuh ñu dôk dlăng mta hră mơar, fim rup čhŏ mrŏ amâo jăk, amâodah dôk jĕ giăm hŏng mniê knhông. Kyuanăn, brei bĕ klei knhâo jing sa čô amai kăp khư̆ mgang drei mơ̆ng klei blŭ luar, klei hlăp lêñ čhŏ mrŏ, amâodah mđhuk hlue klei tluh jhat ƀai. Tal dua, brei bĕ klei thâo mĭn jing “mah jiăng” kơ anak. Boh blŭ anei hlăm Klei Aê Diê Blŭ mblang jing “găp djuê” amâodah “mnuih hlăm sang”. Msĕ snăn mơh, tơdah drei dlăng kơ Klei Aê Diê Blŭ jing msĕ si găp djuê amâodah mah jiăng drei, snăn Klei Aê Diê Blŭ srăng atăt drei mŭt hlăm klei bi mguôp mâo klei mpŭ leh anăn đru drei doh jăk, dôk kjăp čiăng dưi găn klei mplư.
Si knhuah drei tơdah hmư̆ klei blŭ ktŭng hrip mơ̆ng phung mplư?
Wah lač: Ơ Khua Yang, akâo Ih brei kâo tui duah Ih leh anăn mđing hmư̆ klei mpŭ yuôm mơ̆ng klei Ih mtô hlăm Klei Aê Diê Blŭ, čiăng kơ hŏng klei anăn ai tiê kâo dưi doh jăk nanao leh anăn êbat hlăm klei doh jăk. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Yap 30
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
