Pajlug 7:14-23
Nqe cim:
“Suav hais tias lub tswvyim yog koj tus muam, thiab kev txawj ntse yog koj tus phoojywg zoo. Tej lus ntawd yuav tswj tsis pub kom koj mus ti luag tej pojniam, thiab tej pojniam uas hais lus mos lus muag” (Pajlus 7:4-5)
Lus nug rau sawvdaws xav:
– Niam ntiav siv lolus hais dag ntxias tus tub hluas li cas?
– Lub qhov uas yuav hla dhau kev dag ntxias yog dabtsi?
– Zaj kawm no ceebtoom peb txog yam dabtsi ntawm kev mloog lus thaum ntsib kev dag ntxias, tshwjxeeb yog kev dag ntxias ua nkauj nraug?
Cev zam sab nraud rub neeg lub siab thiab tej lus dag ntxias yog dab Ntxwgnyoog ib yam cuabyeej txaus ntshai uas pheej tua peb, tshwjxeeb yog kev dag ntxias mus ua kev nkauj nraug. Chiv thawj yog tus niam ntiav hais tej lus qab zib ntxim hlub rau tus tub hluas ntawd hais tias, “kuv thiaj tawm tuaj nrhiav koj, mas kuv xav ntsib koj kawg li, muaj hmoo kuv thiaj ntsib koj ntawm no!” (nqe 15). Cov lus hais li ntawd txhais hais tias: “kev sib ntsib ntawd tsis yog sib ntsib yuam kev, tiamsis yog tus uas xav ntsib ntev lawm” lossis “yog tus uas twb tos ntev lawm”. Hauv tej lus dag ntxias mos muag qab zib li ntawd, tej zaum ua rau tus tub hluas ntawd xav hais tias, yus yog tus ib, yog tus tshwjxeeb rau tus pojniam ntawd. Nws lub siab thiaj qaug lias rau tus pojniam thiab tsis xav hais tias yus yog tus raug dag ntxias mus ua kev nkauj kev nraug, thiab yuav zoo li tus tsiaj uas luag cab mus tua (nqe 22-23).
Txuas ntxiv mus, tus pojniam ntawd rov hais tej lus mos lus muag hais tias nws twb npaj txhua yam txhij tos tus tub hluas ntawd lawm, thiaj ua rau tus tub hluas ntawd xav hais tias ntshai nkawd yuav muaj kev txaus siab txaus ntsws zoo heev (nqe 16-18). Thaum kawg tus pojniam ntawd haub ntxias tus tub hluas thiab hais tias kuv tus txiv mus kev deb lawm, ntev heev nws mam rov los. Cov lus hais no ua rau tus tub hluas tso siab heev, vim yuav tsis muaj leejtwg pom, tsis ntshai raug txim li, tiamsis nws tsis paub, ntawd tsuas yog tej lus dag xwb. Hauv Pajlug 6:33-35 hais txog leej txiv qhia rau tus tub paub hais tias nuj nqis uas tus niam ntiav tus txiv ua pauj yuav hnyav heev. Muaj ib yam uas tus neeg dag ntxias thiab tus neeg raug dag ntxias tsis ua zoo saib yog; txawm tsis muaj leejtwg pom tej kev phem kev qias uas lawv ua los Vajtswv yeej pom thiab yuav rau txim rau lawv.
Hauv Pajlug 7:4-5, Vajntxwv Xalumoos qhia 2 lub tswvyim uas pab hla dhau tej kev sim siab thaum ntsib txoj kev dag ntxias los ntawm tej lus hais. Tim 1, ciali saib tswvyim zoo li yus tus muam, tus muam tsis zoo thooj li niam txiv, tus muam yog tus uas nyob ze nws tus nus heev dua, vim li ntawd tus muam paub zoo nws tus nus tej kev xav thiab tej haujlwm ua. Yeej tsis muaj ib tus nus twg xav kom nws tus muam ntsia pom nws tabtom saib tej duab yees liab qab uas tsis tsimnyog saib lossis pom nws tabtom nrog ib tus niam ntiav nyob ua ke. Yog li ntawd, cia li saib tswvyim zoo li peb ib tus muam pab tav tej lus dag ntxias, lus qias thiab pab kom peb tsis ua raws li txoj kev ntshaw mus ua kev phem kev qias. Tim 2, cia kev txawj ntse ua yus “phoojywg”. Lolus no muaj lub ntsiab hais tias yog yus cov “txheeb ze”. Ib yam li ntawd, yog peb saib Vajtswv Txojlus zoo li peb tus “phoojywg” peb cov “txheeb ze” ces Vajtswv Txojlus yuav coj peb kev, pab kom peb ua tau lub neej dawbhuv thiab sawv ruaj khov hla dhau txoj kev dag ntxias.
Thov Vajtswv:
Vajtswv, thov pab kom nyuam yaus paub nrhiav Koj thiab mloog raws li Koj tej lus qhia kom nyuam yaus muaj lub siab dawbhuv, tawmtsam yeej txoj kev phem qias. Nyuam yaus tuav Cawmseej Tswv Yexus lub npe thov, Amees.
Ib tsoom mloog uas hmov tshua,
Peb ua li cas thaum uas hnov tej lus mos lus muag ntawm tus neeg dag ntxias?
Nyeem Vajluskub hauv peb lub xyoos:Teev Npe 30
Kênh Youtube BHKTHN:
