Mathais 5:21-24
Nqe cim:
“Tiamsis yog nej tsis zam txim rau lwm tus, nej Leej Txiv tus uas nyob saum ntuj ceebtsheej yuav tsis zam txim rau nej thiab.” (Mathais 6:15).
Lus nug rau sawvdaws xav:
– Mauxes txoj Kevcai txiav txim rau tus neeg tua neeg los ntawm yam dabtsi?
– Tswv Yexus qhia li cas hais txog kev nyob sib haum?
– Peb yuav ua li cas kom nyob tau sib haum ntawm yus cov kwvtij muag nus?
Tswv Yexus tab tom qhia txog txoj cai ua raws li tus Tswv txoj Kevcai hauv lub siab. Hauv Vajtswv Kaum Nqe Kevcai, nqe rau txwv tsis pub tua neeg (Khiavdim 20:13). Tiamsis Tswv Yexus tej lus qhia paub, yog ntxub lossis cem yus cov kwvtij ces twb ua txhaum tua neeg lawm. Tus Tswv hais tias: “Tiamsis nimno kuv qhia rau nej hais tias, yog leejtwg chim rau nws tus kwvtij, tus ntawd yuav raug txim, thiab tus uas hais rau nws tus kwvtij hais tias, neeg ruam, ces luag yeej yuav coj tus ntawd mus rau cov nomtswv txiav txim; thiab tus uas hu nws ib tug kwvtij hais tias, neeg vwm, ces tus ntawd lub txim txaus nws poob mus rau hauv ntujtawg lawm.” (nqe 22). Tus Tswv qhia hais tias lub siab chim, cem, hais saib tsis taus lwm tus ces twb raug lub txim tua neeg thiab tsis zam rau leejtwg li. Txhais tau tias, sib ntxub txawm yog muaj qhov vimchiv yog thiab tsis yog los tus Tswv tsis txaus siab li. Ua neeg muaj lub siab sib ntxub yuav dhau mus ua neeg tua neeg. Ib tug neeg ua li no tsis tsimnyog fij khoom lossis thov Vajtswv, yog nws tsis xub hais kom zoo siab lossis nrog cov kwvtij sib hais haum tso (nqe 24; Malakaus 11:25).
“Hais sib haum” lossis ua kom nyob sib haum yog zam txim thiab ua kom rov qab muaj kev sib raug zoo. Zam txim yog thawj kaujruam hais sib haum thiab tus Tswv twb qhia nyob hauv zaj lus Tswv Yexus qhia thov Vajtswv: “Thov koj zam txim rau peb ib yam li peb twb zam txim rau cov uas ua txhaum rau peb lawm.” (Mathais 6:12). Thaum zam txim lawm, tes haujlwm ua txuas ntxiv yog kho kom rov muaj kev sib raug zoo. Tus Tswv ntuas kom peb yuav tsum ua neej sib haum nrog txhua tus kom tsimnyog yog Nws menyuam: “Cov uas ua rau neeg nyob sib haumxeeb, cov ntawd tau koob hmoov; Vajtswv yuav hu lawv hais tias, lawv yog Vajtswv cov menyuam!” (Mathais 5:9). Tiamsis peb tsis paub tias tus neeg uas peb hais kom haum ntawd puas kam hais haum nrog yus, tiamsis Vajtswv Txojlus qhia kom peb yuav tsum tau siv zog hais tas siab: “Nej yuav tsum ua txhua yam zoo raws li nej paub ua, nej thiaj yuav nrog sawvdaws nyob sib haum.” (Loos 12:18).
Los ntawm tus Tswv tej lus qhia no, peb kawm paub tus cai ua neej nyob sib haum, thiab peb siv tus cai no los ua neej sib raug zoo nyob hauv tsevneeg. Kev ua neej yeej nyuaj kawg, thiab cov neeg txhaum nyob ua ke hajyam nyuaj dua. Peb sawvdaws puavleej ntsib raug qhov uas hais tsis sib haum, sib cav sib ceg hauv tsevneeg. Cia kom qaij thiab daws tau kev tsis haum nyob hauv txojkev hlub, saib taus, peb yuav tsum ua neej muaj lub siab los hais kom haum raws li tus Tswv tej lus qhia. Kev ua neej sib haum ntawm peb tsis yog tsevneeg muaj kev sib pab zoo xwb, tiamsis kev sib raug zoo nrog tus Tswv los kuj yuav tsum loj hlob, ua rau tus Tswv tau ntsejmuag thiab. Yuav tsum nco ntsoov hais tias peb yuav mus cuag tsis tau tus Tswv yog hais tias peb tsis tau hais haum nrog yus cov kwvtij nkauj muam.
Thov Vajtswv,
Nyuam yaus Leej Txiv! Ua Koj tsaug vim Tswv Yexus txaus siab los tuag txhiv, nyuam yaus thiaj tau zam txim thiab dim. Thov Koj pub kev hlub, kev txawj ntse, ua siab ntev rau nyuam yaus kom ua neej haum nrog tej kwvtij nkauj muam raws li Koj qhia. Nyuam yaus tuav Tswv Yexus lub npe thov, Amees.
Ib tsoom mloog uas hmov thiab tshua,
Peb puas tau ua neej txaus siab hlo hais haum nrog yus cov kwvtij nkauj muam lawm tau?
Nyeem Vajluskub hauv peb lub xyoo: Levis Kevcai 27
Kênh Youtube BHKTHN:
