Klei Aê Diê Blŭ: II Klei Yăl Dliê 24:23-27
Êlan kliăng: “… diih amâo dưi čăt đĭ ôh? Kyuadah diih lui wir leh Yêhôwa, ñu lui wir leh diih msĕ mơh” (II Klei Yăl Dliê 24:20b).
Klei êmuh ksiêm mĭn: Ya ngă phung kahan Siri knŏng ƀiă kahan dưi hĕ hŏng sa phung kahan prŏng phung Yuđa? Si ngă Mtao Y-Jôas djiê leh? Ya jing klei tuč ruê̆ kơ sa čô mnuih lui wir Aê Diê? Ya drei srăng ngă čiăng dưi tui hlue Khua Yang sĭt suôr truh ti knhal tuč?
Leh Y-Sakari djiê (II Klei Yăl Dliê 24:20-22), ti knhal tuč thŭn, mâo “phung kahan Siri hriê bi blah hŏng Y-Jôas.” Boh sĭt gơ̆, anei jing sa phung kahan Siri mâo knŏng ƀiă kahan ƀiădah dưi hŏng phung kahan Yuđa mâo lu kahan hĭn. Klei hƀuê ênuk phung ƀuôn sang Aê Diê khăng čih yăl dliê kơ klei bi blah plah wah phung kahan phung Yuđa knŏng ƀiă kahan ƀiădah mâo Aê Diê dôk mbĭt dưi leh hŏng phung kahan phung tue mâo lu kahan hĭn (II Klei Yăl Dliê 13:3-18; 14:8-15), ƀiădah bi ară anei, kyuadah Mtao Y-Jôas leh anăn phung Yuđa lui wir leh Yêhôwa Aê Diê phung aê diñu kyuanăn Aê Diê jao diñu hlăm kngan phung roh. Phung kahan Siri hriê bi blah hŏng čar Yuđa leh anăn ƀuôn Yêrusalem, bi mdjiê jih jang phung khua ƀuôn sang leh anăn mơĭt jih mnơ̆ng diñu plah mă kơ mtao ƀuôn Damas. Klei bi kmhal tuh ti dlông phung khua ƀuôn sang năng hŏng klei soh diñu kyuadah diñu mčhur leh Mtao Y-Jôas kkuh mpŭ kơ rup yang leh anăn bi mdjiê Y-Sakari amâo mâo klei soh ôh.
Amâo djŏ knŏng phung khua ôh, Mtao Y-Jôas ăt tŭ klei bi kmhal năng hŏng klei soh ñu ngă leh mơh. Tơdah phung kahan Siri đuĕ leh, Mtao Y-Jôas dôk êka kjham, phung dĭng buăl ñu bi mdjiê ñu ti jhưng ñu pĭt. Phung dĭng buăl anei amâo ư ai ôh kơ hdră, êlan Mtao kiă kriê kyuanăn anei jing mmông găl kơ diñu ngă klei rŭ ênua kơ klei Mtao mtă brei arăng bhĭr boh tâo bi mdjiê leh Y-Sakari, anak êkei pô tuôm đru leh ñu djiê amâo mâo boh klei. Leh djiê, arăng amâo dơr Mtao Y-Jôas hlăm msat pioh kơ phung mtao msĕ si Khua ngă yang Y-Jêhôida ôh (II Klei Yăl Dliê 24:16). Anăn jing klei bi knăl brei ƀuh mtao amâo mâo klei Aê Diê hơêč hmưi ôh, kăn arăng amâo dơr ñu hŏng klei mpŭ rei.
Jih jang klei truh, mơ̆ng klei phung kahan Siri hriê bi blah, plah mă dŏ ngăn, Mtao Y-Jôas êka kjham, klei arăng bi mdjiê ñu hlŏng kơ klei phung ƀuôn sang amâo dơr ñu hlăm anôk năng kơ phung mtao ôh, jing klei Aê Diê bi kmhal Mtao Y-Jôas sơăi kyuadah ñu lui wir leh Aê Diê. Wăt phung kgŭ bi kdơ̆ng hŏng mtao jing anak êkei mniê Amôn leh anăn anak êkei mniê Môap msĕ mơh brei ƀuh tơl klei mtao djiê kăn djiê hlăm kngan phung mâo klei arăng mpŭ rei. Jih jang klei bi kmhal ktrŏ anei năng hŏng klei soh mtao ngă leh. Anăn jing klei tuč ruê̆ bŏ hŏng klei ênguôt kơ sa čô mnuih lui wir leh Aê Diê leh anăn Aê Diê lui wir ñu mơh.
Khua ngă yang Y-Jêhôida bi hriăm mjuăt Mtao Y-Jôas tui hlue êlan Khua Yang hŏng jih ai tiê, ƀiădah lĕ, ai tiê mtao amâo mdê ôh hŏng lăn boh tâo (Y-Markôs 4:16-17), mjeh Klei Aê Diê Blŭ rah leh čăt mă knŏng bhiâo, ƀiădah kyua amâo mâo agha ôh, snăn ñu dliu krô mtam. Akâo Khua Yang brei kơ drei mâo ai tiê êdu êun mă tŭ klei Ñu blŭ, čiăng kơ Klei Aê Diê Blŭ mtrŭn agha êlam truh ti tur ai tiê, gưt kơ Klei Aê Diê Blŭ čiăng kơ klei hdĭp drei amâo lui wir Aê Diê ôh leh anăn Aê Diê kăn lui drei rei.
Mâo mơ̆ klei drei dôk ngă tơl atăt drei truh kơ klei lui wir Aê Diê?
Wah lač: Ơ Khua Yang, đru kâo khăp kơ Ih hŏng jih ai tiê, čuăn amâo lui wir Ih ôh čiăng tui hlue rup yang leh anăn ngă lu klei jhat ƀai tui si lăn ala anei. Akâo Khua Yang đru kâo tui hlue Ih sĭt suôr tơl truh ti knhal tuč. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Bruă Lêwi 13
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
