II Xwmtxheej 24:23-27
Nqe cim:
“…Nej yuav tsis vammeej, rau qhov nej tso tus Tswv tseg lawm, nws thiaj tso nej tseg thiab!” (II Xwmtxheej 24:20b).
Lus nug rau sawvdaws xav:
– Vim licas cov Xilias tej tubrog tsawg dua tiamsis ho tua yeej cov Yudas pab tubrog uas coob coob?
– Vajntxwv Yau-ases tuag licas?
– Qhov kawg ntawm tus neeg uas tso tus Tswv tseg yog dabtsi?
– Peb yuav tsum ua dabtsi thiaj nrog tau tus Tswv mus tas simneej?
Tomqab uas Xakhaliyas tuag (II Xwmtxheej 24:20-22) ces “xyoo ntawd, thaum lub caij nplooj ntoos zeeg, cov tubrog Xilias txawm tuaj tua lub tebchaws Yudas thiab lub nroog Yeluxalees.” Tseeb tiag ntawm no tsuas yog ib pab tubrog Xilias uas tsawg tsawg tiamsis tua yeej cov tubrog Yudas uas coob dua lawv ntau npaug. Tus Tswv haivneeg li keebkwm pheej sau txog tej zaug uas cov tubrog Yudais tsawg dua tiamsis tau tus Tswv pab tua yeej lwm haivneeg uas coob dua lawv ntau npaug (II Xwmtxheej 13:3-18; 14:8-15), tiamsis nimno, vim vajntxwv Yau-ases thiab cov Yudas tso tus Tswv uas yog lawv cov yawgkoob tus Vajtswv tseg, Nws thiaj cob lawv rau lawv tej yeebncuab tes. Cov tubrog Xilias tuaj tua Yudas thiab Yeluxalees, lawv muab cov thawjcoj tua tuag tas thiab huab tau khoom ntau heev coj mus rau pem lub nroog Damaxes lawm. Txojkev txiav txim los raug cov thawjcoj phim rau tej kev txhaum uas lawv ua, vim lawv tau haub ntxias vajntxwv Yau-ases pe mlom thiab muab Xakhaliyas uas tsis muaj txim tua povtseg.
Tsis yog cov thawjcoj xwb, vajntxwv Yau-ases kuj raug rau txim phim rau nws tej kev txhaum. Thaum cov tubrog Xilias thim rov qab lawm, vajntxwv Yau-ases raug mob sab kawg li, vajntxwv raug nws ob tug thawj tubrog muab tua povtseg thaum nws tseem pw saum txaj. Cov thawj tubrog ib txwm tsis txaus siab rau vajntxwv kev coj thiab kev ua haujlwm, yog li zaug no yog zoo sijhawm rau lawv ua pauj qhov uas vajntxwv yuam muab Xakhaliyas uas yog Yehauyadas tus tub txawb pobzeb kom tuag. Thaum tuag, vajntxwv Yau-ases lubcev tsis tau coj mus faus hauv cov vajntxwv lub toj ntxas li tus povthawj Yehauyadas (II Xwmtxheej 24:16). Qhov ntawd yog lub cim qhia hais tias vajntxwv tsis tau tus Tswv foom hmoov, tsis tau faus hauv qhov chaw nto moo.
Txhua yam teebmeem tshwmsim txij li cov tubrog Xilias tuaj tua, tej khoom raug huab, vajntxwv Yau-ases raug mob sab heev, raug tua tuag, txog rau thaum cov pejxeem tsis coj mus faus hauv qhov chaw tsimnyog puavleej yog tus Tswv kev rau txim rau vajntxwv Yau-ases thaum nws tso tus Tswv tseg. Qhov uas cov neeg ntxeev siab muab vajntxwv tua povtseg yog cov pojniam Amoos thiab Mau-am tej tub ki kuj qhia pom hais tias vajntxwv twb tsis yog tuag hauv cov neeg muaj meejmom txhais tes. Ntawd yog qhov xaus iab ntsim ntawm tus neeg tso tus Tswv thiab raug tus Tswv tso tseg.
Tus povthawj Yehauyadas tas siab qhuab ntuas vajntxwv Yau-ases mus raws tus Tswv siabnyiam, tiamsis, vajntxwv lub siab zoo li qhov av uas muaj suab zeb (Malakaus 4:16-17), cov noob uas yog Vajtswv Txojlus tau tseb tawm tsuas tuaj ib ntus tiamsis tsis muaj cag thiaj raug qhuav lawm. Thov tus Tswv pub rau peb muaj nplooj siab mos muag txais yuav Vajtswv Txojlus, kom Vajtswv Txojlus nrhau cag tob rau hauv nruab siab, ua raws Vajtswv Txojlus qhia kom peb lubneej tsis tso tus Tswv tseg thiab peb thiaj tsis raug tus Tswv tso tseg.
Thov Vajtswv,
Tus Tswv, thov pab nyuam yaus tas siab hlub Koj, tsis tso Koj tseg mus ua raws lub ntiajteb tej kev phem. Thov pab nyuam yaus muab siab npuab Koj mus txog hnub kawg. Nyuam yaus tuav Yexus Khetos lub npe thov, Amees.
Peb puas tabtom ua tej yam uas yuav ua rau peb tso tus Tswv tseg?
Nyeem Vajluskub hauv peb lub xyoo: Levis Kevcai 13
Kênh Youtube BHKTHN:
