Klei Aê Diê Blŭ: Klei Mphŭn Dơ̆ng 16:1-6
Êlan kliăng:“Hdơr bĕ kơ Ñu hlăm jih êlan ih êbat, leh anăn Ñu srăng bi kpă êlan ih.” (Klei Bi Hriêng 3:6)
Klei êmuh ksiêm mĭn: Ya klei dleh dlan H’Sarai dôk tlă anăp leh anăn ya klei ñu akâo kơ ung ñu ngă? Ya boh tŭ jhat mơ̆ng klei Y-Abram đưt kŏ soh čhuai? Ya klei hriăm kơ drei mơ̆ng klei yăl dliê anei hlăm klei jing ung mô̆ leh anăn gŏ sang?
Leh klei soh čhuai Y-Abram ngă ti čar Êjip (Klei Mphŭn Dơ̆ng 12:10-20), ară anei H’Sarai lĕ lŏ ngă klei soh čhuai. Kyua ƀuh ñu jing mniê plao sui đei leh, H’Sarai ruăt čiăng djăl mâo anak čuê brei djuê ana kơ ung, snăn ñu čuăn yua hdră êlan “kkiêng hrô brei” tui si klei bhiăn ênuk hlăk anăn. Snăn yơh ñu trông čhai hŏng ung brei dôk hŏng dĭng buăl mniê Êjip ñu čiăng mâo anak lŏ čuê djuê ana (êlan 2). Klei ñu bi êdah amâo soh ôh tui si dhar kheh ƀuôn sang ênuk anăn, ƀiădah ñu soh kyua amâo dưi gĭr dôk guôn klei Aê Diê ƀuăn (Klei Mphŭn Dơ̆ng 13:16) ƀiădah ruăt ngă tui si hdră êlan klei mĭn pô dê. Tơdah ƀuh klei mô̆ akâo kƀah klei đăo msĕ snăn, năng djŏ Y-Abram bi juh, mtă mtăn leh anăn mñă kơ mô̆ brei đăo knang leh anăn dôk guôn klei Aê Diê čiăng. Bi anei ñu lĕ lŏ “gưt asăp” mô̆ leh anăn ư ai dôk H’Agar dĭng buăl mniê. Klei Y-Abram đưt kŏ soh čhuai lŏ mñă kơ drei hdơr klei Y-Ađam kyua gưt asăp mô̆ snăn ƀơ̆ng hĕ boh Aê Diê kăm ghă (Klei Mphŭn Dơ̆ng 3:6).
Klei ung jing pô gĭt gai hlăm klei jing ung mô̆ jing yuôm snăk. Brei ung jing mnuih kjăp ai tiê klei mĭn leh anăn thâo mĭn čuăn ngă djăp mta bruă hŏng klei djŏ kơ gŏ sang. Mô̆ dưi akâo êmuh, ƀiădah brei ung thâo kral klei akâo êmuh anăn bi mơak kơ Aê Diê amâodah hơăi, leh anăn dưi hngah tơdah klei akâo êmuh anăn amâo djŏ ôh. Klă nik yơh klei Y-Abram đưt kŏ soh čhuai atăt truh kơ klei mtŭk mtŭl hlăm gŏ sang, kyuadah H’Agar tơdah ƀuh ñu ba tian leh, ñu lŏ bi êmut hĕ kơ khua mniê ñu. Wăt tơdah klei H’Agar ba tian jing djŏ hdră H’Sarai čiăng, ƀiădah amâo djŏ tui si klei Aê Diê čiăng ôh, snăn yơh ñu tŭ klei bi hêñ mơ̆ng dĭng buăl mniê ñu pô. Leh anăn klei bi nač bi êmut bi roh truh ti krah dua čô mniê hlăm sang. Boh tŭ jhat mơ̆ng bruă wăt Y-Abram leh anăn H’Sarai ngă soh čhuai, ăt dôk nanao hlăm hƀuê ênuk phung ƀuôn sang Aê Diê ruah truh kơ hruê anei. Klei bi roh ti krah phung Israel (djuê ana Y-Isăk, anak H’Sarai) leh anăn phung Arap (djuê ana Y-Ismaêl, anak H’Agar) ăt adôk nanao.
Klei yăl dliê brei kơ drei klei hriăm yuôm bhăn hlăm klei jing ung mô̆ leh anăn gŏ sang: Tal sa, anak aneh jing mnơ̆ng Aê Diê brei djŏ tui si hruê mmông ñu; Tal dua, jih ai tiê đăo knang leh anăn gĭr dôk guôn klei Aê Diê čiăng, đăm mgaih mkra tui si klei mĭn drei pô dê ôh; Tal tlâo, jih dua ung mô̆ brei tui duah klei Aê Diê čiăng hlăm jih jang klei čuăn ngă, weh đuĕ mơ̆ng bruă ngă soh čhuai atăt kơ boh tŭ jhat ênguôt hnĭng; Tal pă, jih dua ung mô̆ brei tŭ bruă klam hrăm mbĭt kyua bruă ngă soh čhuai pô ngă, leh anăn akâo kơ klei pap Khua Yang čiăng dưi tlă anăp hŏng klei lông dlăng, amâo bi mplĕ lư klei soh hdơ̆ng pô ôh.
Si ngă drei êmuh Khua Yang mơ̆, êlâo kơ klei čuăn ư ai amâodah hngah kơ klei mô̆ amâodah ung akâo êmuh?
Wah lač: Ơ Khua Yang, akâo Khua Yang brei kơ kâo klei thâo mĭn leh anăn klei đăo knang khut khat kơ Khua Yang, čiăng kơ kâo đăm čuăn ngă klei soh čhuai kơ gŏ sang kâo ôh. Brei kâo knang nanao kơ Khua Yang čiăng dưi găn gao jih jang klei lông dlăng hlăm klei jing ung mô̆. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Bi Hriêng 4
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
