Chivkeeb 16:1-6
Nqe cim:
“Txhua yam uas koj ua koj yuav tsum nco ntsoov tus TSWV, nws thiaj yuav coj koj taug txojkev uas yog txoj tseeb” (Pajlug 3:6).
Lus nug rau sawvdaws xav:
– Xalais ntsib yam teebmeem twg thiab nws kom nws tus txiv ua yam dab tsi?
– Qhov nuj nqis uas Anplas ncaws hau yuam kev yog dab tsi?
– Zaj xwm no ua kev kawm rau peb li cas hauv txoj kev sib yuav thiab lub tsev neeg?
Tom qab uas Anplas tau yuam kev nram tebchaws Iziv tas lawd (Chivkeeb 12:10-20), Xalais rov yuam kev ua txhaum ntxiv. Vim pom hais tias laus lawm tsis muaj menyuam, tos tsis taus xav muaj menyuam rau nws tus txiv, nws thiaj cia lwm tus “pab yug menyuam rau nws” raws txoj kevcai nyob rau tiam ntawd. Yog li ntawd, Xalais thiaj kom Anplas mus pw nrog nws tus ntxhais qhev Iziv kom muaj menyuam los tuav nws cajces (nqe 2). Raws txoj kev coj noj coj ua ces Xalais tes haujlwm tsis txhaum tiamsis txhaum vim Xalais tsis ua siab ntev tos li Vajtswv coglus tseg lawm (Chivkeeb 13:16), nws maj nrhiav haukev daws nws kev ntshaw raws li siab nyiam. Qhov uas pom Xalais tsawg kev ntseeg li ntawd, twb tsimnyog Anplas nplig siab, txhawb zog thiab ntuas nws pojniam kom tso siab rau Vajtswv, ntseeg thiab tos li Vajtswv ua raws li lus cogtseg lawm. Tiamsis Anplas tseem “mloog raws” li nws pojniam hais thiab mus pw nrog Hankas. Qhov uas Anplas ncaws hau yuam kev ua rau peb nco txog Adas kuj mloog raws li nws pojniam hais noj tsob txiv Vajtswv txwv (Chivkeeb 3:6).
Tus txiv feem xyuam hauv txoj kev sib yuav tseemceeb heev. Nws yuavtsum muaj Tswvyim zoo, sawv khov thiab txiav txim siab ua yam uas yog rau lub tsev neeg. Tej zaum pojniam yuav kom ua yam ub yam no, tiamsis tus txiv yuavtsum zeem paub hais tias qhov ntawd puas haum Vajtswv siab thiab muaj cai tsis ua yam txhaum thaum pojniam taij kom ua. Peb pom qhov uas Anplas ncaws hau yuam kev ua rau muaj kev kub ntxov, muaj teebmeem rau tsev neeg, thaum Hankas muaj menyuam hauv plab xwb nws twb ua saib tsis taus Xalais uas yog nws tus tswv li. Hankas muaj menyuam raws li Xalais siab xav tiamsis tsis raws li Vajtswv siab nyiam, Xalais thiaj raug ris tej uas tus ntxhais qhev ua saib tsis taus nws. Muaj kev sib khib, sib ntxub ntawm ob tug pojniam nyob rau hauv ib lub tsev neeg. Nuj nqis uas Anplas thiab Xalais ua yuam kev nyob ua ntu zus hauv keeb kwm Vajtswv haivneeg los txog niaj hnub nimno. Cov Yixalayees yog (Xalas tus tub Ixaj cajceg) thiab cov Alav yog (Hankas tus tub Yisamayees cajceg) niaj hnub ua yeeb ncuab thiab tseem yuav ua yeeb ncuab mus ntxiv.
Zaj xwm no ua rau peb kawm tau ntau zaj tseemceeb hauv txoj kev ua niam txiv thiab lub tsev neeg: Tim ib, menyuam yog koob hmoov uas Vajtswv pub rau thaum uas yog Nws lub sijhawm; Tim ob, ntseeg tas siab thiab ua siab ntev tos li Vajtswv siab nyiam, tsis ua li yus siab nyiam xav ntshaw; Tim peb, ob niam txiv yuavtsum thov Vajtswv rau txhua yam uas yuav ua thiab tsis txhob ua tej yam uas yuav tsuas kis tsis zoo rau tom qab; Tim plaub, ob niam txiv puavleej yuav ris tej uas ua yuam kev thiab thov Vajtswv pab kom hla dhau tej kev sim siab thiab tsis sib liam txim.
Thov Vajtswv,
Vajtswv, thov pub nyuam yaus muaj koj txoj kev txawjntse thiab ntseeg Koj tas siab kom tsis ua yam yuam kev rau tsev neeg. Thov pab nyuam yaus paub txeev vamkhom Vajtswv kom hla dhau tej kev sim siab hauv txoj kev ua txij nkawm. Nyuam yaus tuav Cawmseej Tswv Yexus lub npe thov, Amees.
Ib tsoom mloog uas hmov tshua,
Peb puas thov Vajtswv ua ntej thaum uas peb tus txiv lossis tus pojniam kom peb ua ib yam dab tsi?
Nyeem Vajluskub hauv peb lub xyoos: Pajlug 4
Kênh Youtube BHKTHN:
